1 TIMOTIYUT 2
2
Tamban eeko logorak wone
1Wone aa'nduk yokkiriyak mbakirak nogo yokkiri o. Yi aakumi ndi aakumi abok aret inake Ala nggino yoge, tamban eeke, aakumi inake yoge, eeppagage nogo, ”Wa,” yoge, eeke logonok nduk, yokkege agarik o. 2It aap inendagembogut inom, aap iyo'nggok abok aret inom, ninarum abe wonogwe iigak, niniki warak a'nuk, Ala liirogon mugurok nugu logonet, niniki ugun tayenak logowak nduk, it inom inake tamban eeke logot o. 3Togop eekwi kiinok, ninagap ndaka Ala inikilom mbake menggerak me, op aret o. 4At nen yi aakumi ndi aakumi abok aret inagap ndappunuk, wone at ari menggerak wone nogo ineenu aruwak lak, ”Ao,” inombake menggerak. 5At Ala ambit aret menggerak. Ndi, aakumi inom, Ala inom, terak inake yonggo nappegak aap ambit Keritut Yetut aret o. 6At yi aakumi ndi aakumi abok piinogo piinok, at eebe paga inili agago inonggo mbaneegerak. Ti eereegerak nogo ti, Ala nen yi aap ndi aap abok eeppiyoorak kooneegerak pagak yuurak eyom panggoni wagagerak me, aret pagak yereegerak. 7Ala nen yi aakumi ndi aakumi abok eeppiyoorak kooneegerak nogo, it aap endekem mendek Ala ari menggerak wone ineenu a'nuk, abet mbariyak wone nogo ti, mamuninake logowak nduk mippanege, ndi, yi awi ndi awi yoranet nege logowak nduk, yonggo panege eereegerak o. Wone ti, pilit lek abu abet aret yokkigi o.
8Togop me, it aap yi awi ndi awi abok aret inanini mbakwi, wone wakwi, eeka'lek obeelom mban logonet, ineenggi nippunuk, tamban eeko logowak nduk, ”Ao,” lombok inombake minggirak.
9Ndi, it kumi iniki warak kenok, inayum-inagali liirogon yikkologo mengga kwak, yi kumi ndi kumi abok aret iniki warak a'nuk, togop aret inayum-inagali nggirik-nggerok liirogon aret yikkologo logowak o. Ineeruwak awi wuppunuk laanggwi, mbuti abinakwi mendek yikwi, eyoonggen laambu kigirikwe nogo mendek mban yikkologwe, ndi, yum onggo nggwok kenok mban kunogo yikwi, eekak yuurak ti mage o. 10It kumi Ala wone waganggo menggaarak mendek nen inayum-inagali liippunuk yikkologo mengga kwak, yi obeelom ndi obeelom eeriyak nogo ti, ndak-ndak aret liippunuk eeko logowak o. 11It kumi nogo ti, inoone lek aap inabu'me kwi'na'nuk wone mamunggologo logowak o. 12-14At Kawa aa'nduk lek o. Aram aa'nduk wakkagagerak me, kumi ti, inoone lek logonet, inoreewi inoone liirogon konenggo logowak o. Ibilit nogo nen aap Aram ambo'me laganulik. Ata, kwe ambo'me lagangge mbareegi, kwe nogo nen maluk eereegerak me, ”Kumi nen aap mamunirogwe, ndi, it kumi nen aap inabu'me tebembiinok, Yi eeri nak, ndi eeri nak, yorogwe, eeko logorak ti mage o,” yinuk, ari minggirak. 15Kwe nogo maluk eereegerak ti kwe, it kumi nogo iniki warak logonet, Ala wone abet mbakwi, aakumi iniki kunik aganakwi, ndi, maluk eeka'lek obeelom mban wonogwe, eekwi iinok perak, it inaagalogwe ndaganakwi iigak Ala nen inagap ndaganake logogin o.
Currently Selected:
1 TIMOTIYUT 2: WNO
Highlight
Copy
Compare
Share
Want to have your highlights saved across all your devices? Sign up or sign in
