1 TIMOTIYUT 3
3
Ala apuri unde logorak mippiyoorak wone
1”Aap ambi nen, An Ala apuri unde logokit, mbake kenok, at eeriyak mbakerak nogo ti, op aret o,” yinuk, aakumi nen yogo menggaarak nogo ti, abet aret yogo menggaarak o. 2Aap ambi Ala apuri unde logorak mippuurak mbakwi kenok ti, aakumi inoone at oba pugulik kenok, akwe ambit kenok, iniki tum waka kenok, iniki warak kenok, li'lak mban eeke menggerak kenok, inanoniya laka kenok, aakumi op mamuniroorak kenok, 3amburu kumili aganake ndonggorogon nenggeelik kenok, anini mbet-mbet wunggeelik iniki yanggonak kenok, yawi pegeelik kenok, wu inikilom mbakeelik kenok, aap togop mendek ti, Ala apuri unde logorak op aret o. 4Aap ambi Ala apuri unde logorak ti, ayuk warak logonet, at aagapuri liirogon ndegeninake menggerak kenok mban mippuurak. 5Aap ambit nen at aagapuri lombok liirogon unde logorak kobak menggerak kenok, Ala apuri ti, nonggop togon unde logogin? 6Aap awo ngget iluk Ala miikerak kenok mippuurak lek o. Ibilit iniki wogoppake mbareegi, maluk eeppereegerak nogo kwak, aap ti togop iniki wogoppatemenggerak paga maluk eeppege kero, mippuurak lek o. 7Mippugwi iinok, maluk eeremenggerak paga aakumi nen abok mbanggwi iinok, pagi keele pugu enggaanok nggerok ari minggi kwak, Ibilit nen aap ti, togop aret iniki nomongge kero, it aap endekem mendek nen at eeke abok mbanggo logonet, ”Aap ti obaabut koonak aret o,” yogwe iinok mban mippuurak o.
Aap yeenggwaaragak mippiyoorak wone
8Ndi, it aap yeenggwaaragak nogo togop aret it inayuk warak logonet, inoone mbere lek ambiret mban yogo menggaarak kenok, anggur amburu kumili aganake menggerak ndonggorogon nunggulik kenok, wu kolaawok nduk aakumi wiwi eeginakulik kenok, 9ndi, wone kote kumaarak wonagagerak niniki abet mbakwi wone nogo porogo logonet, iniki obeelom koonnage kenok mban eekwi kenok, aap ti mendek mippiyoorak op aret o. 10It aap yeenggwaaragak logorak ti, aa'nduk inabut mbambunuk, inoone inoba piiga'lek iinok perak, mippiyoorak. 11It inakuwi ti togop aret inayuk warak logonet, wone inambe irip paga wonok nugulik kenok, iniki warak kenok, ndi, yi eekwi ndi eekwi ineenggi omaawi eerit nugwi kenok, kumi togoti mendek iinok, inogonggelomini yeenggwaaragak mippiyoorak op aret o. 12It aap yeenggwaaragak ti, inakuwi ambit wogo kenok, ndi, inapuri inom, at inom menggaarak inom, ndegeninako logonet, wone liirogon lengganogo yorogwe iinok mban mippiyoorak op aret o. 13It aap yeenggwaaragak eerit nugu menggaarak nogo abe koonak eekwi iinok, inendage warak aret logogun o. Ndi, nit niniki Yetut Keritut oba panggombunuk abet mbakwi wone nogo, it inagabiti mbaka'lek logonet, yoranet nugu logogun aret o.
Wone kote kumaarak wonagagerak wone
14-15An mbet-mbet keya woraakit nduk, niniki luunik logonet, wone yi liiru mbanggege kwe, ambi yiluk ari kagak eerukwak, Ala apuri inenggela'me logonet, nonggop eerit nege logorak keenu a'nok nduk, liiru yi mbanggege agarik o. Wone Ala ari menggerak wone o eyak nu'lek wuraberak ti, Ala mondok eenik menggerak apuri Yetut eebe paga kuwak eeko menggaarak nogo aret. 16Nit Ala wone abet mba'nuk waganggo monggoorak kote kumaarak lombok wonagagerak nogo yi o.
”At aap pogom aret kin ari wage mbareegi, yi Ala
aput mbaruwak nduk, Aberiniki nen kin eeppereegerak.
Kin eeppege mbareegi, mbogut paga yonggo nugu menggaarak
melaikat nen at eebe inigen kogwe, Ala wone ineenggo'lek
mendek wonogome yoranet nogwe, it aap abok aret at abet mbakwi, eeko mbareegwa, wi ugwi iigak, wonok laganeegerak o,”
yinuk, yogo menggaarak nogo mondok abet aret kogo o.
Currently Selected:
1 TIMOTIYUT 3: WNO
Highlight
Copy
Compare
Share
Want to have your highlights saved across all your devices? Sign up or sign in
