1 KORINDUT 11
11
1At Keritut eeke menggerak an liippunuk, eeke minggirak pogom, kit nen an eeke nogo liippaninuk eeko logonip o.
Kumi inayum inomba langgunik logonet, tamban eeko logorak wone
2Kit nen kulinik-kalinik noba aberak logonet, yi wone ndi wone yokkirage nagagirak nogo liippunuk eerit nogwe me, ”Kit obeelom aret o,” yinuk, yokkiragi. 3At Ala abu'me ti, Keritut. Ndi, Keritut abu'me ti, aap. Ndi, aap inabu'me ti, kumi, togop aret monggoorak me, wone ti, liippubagip nduk, yokkiragi. 4Togop me, at Keritut enggali arukwak, nit Ala apuri kuwak eeppunuk, ninabetagi nggoorogo punuk, tamban eekwi, Ala wone yorogwe, eeko logorak perak op o. 5Ndi, it kumi nogo nen inayum inomba nggoorak logonet, tamban eekwi, Ala wone yorogwe, eekwi iinok ti, we inagap mbelenak negen logonet eekwi me, inogonggelomini inenggali nggo-nggo eeppiyookwak, inayum inomba langgunik logonet, eeko logorak op o. 6It kumi inayum inomba langgunik lek kenok, inagali liirogon yirik lek kenok ti, inenggali mbako menggaarak me, inayum inomba nggoorak logonet, tamban eeruwok mbakwi iinok, mondok inenggali kaawak nduk, inagali inom yirik lek negen logonet, eeko logorak op mbakop? Togop eeriyak meek me, inayum inomba langgunik logonet, tamban eekwi, Ala wone yorogwe, eeko logowak o. 7-9Ala nen aap ti, kumi inake wakkoolik. Kumi ti, aap inake wakkagagerak me, aap inalom ti kumi lek o. It kumi inalom ti, aap aret me, inayum langgunik logonet, inogonggelomini inabu'me tebe yinuk, inayuk wuko logowak o. Ndi, aap perak, Ala nen, ”An tiyappanugo logowak o,” yinuk, at etenggen pogom aret wakkagagerak me, aap ti, Ala abu'me tebe yinuk, inabetagi nggoorogo punuk, tamban eeko logorak op o. 10Ti kenok, it mbogut paga Ala yonggo nugu menggaarak melaikat nogo nen kit kumi liippinagagwi me, aap inayuk wuko monggotak kiyaawak nduk, kinayum kinomba langgunik aret logonip. 11-12Yi mendek ndi mendek wo'nirage menggerak alom ti Ala aret o. Ndi, kit kumi kinalom ti, aap aret kwe, kit aap perak, kumi nen aret ndakkinako menggaarak me, it kumi lek nen kit aap wigannariyak lek o. Ndi, it aap lek nen kit kumi kunduk wigannariyak lek mban me, ninowe endagembogut ninom niniki kunik me, niniki ambit lambunik logonet, eeko logowok o.
13Togop me, tamban nggwok paga eeko logonet, it kumi inayum nggoorogo punuk, tamban eeriyak op mbakop? Kit nen mban kiniki kooninip. 14-15Ndi, it kumi nogo inanobak naberak logowak nduk, ineeruwak wogoragagerak me, ineeruwak nggorek kenok, nit aap nen, ”Ti obeelom aret o,” mbakwi nogo lek a? Ndi, nit aap nogo nineeruwak nggorek kenok, ninenggali ogwe niyo, mbanggo monggoorak nogo lek a? 16Yi eekwi nogo paga it aap ando kinenggela'me nen, ”Yogop eeriyak lek o,” yinuk, inoone nabenak mban yogwe iinok, ”Nit yime inom, it Ala apuri ando yi awi ndi awi kuwak eeko menggaarak inom, alik eekulik ti mban eeko monggoorak o,” yinuk, yoret o.
Mbi iloolinggen amburu noorak yoragagerak wone
17Noreewi o. Kit kuwak eeri wogo nogotik, obeelom eekwi lek maluk eekwi kiigirak me, an wone yi yokkiraakit mbakirak nogo ti, wogoppinagage logonet, yokkiraagin lek o. Mbekkirage negen logonet aret yokkiraagin o. 18Wone aa'nduk koonogo yokkiraakit mbakirak nogo yi o. Kit Ala apuri mendek kuwak eeko monggotak nogo kit-kit aret ogoorik-ogoorak eekkologwe naruk konengge nagarik, ”Yi abet aret yogwe ilik?” mbakirak. 19Kit wone-wone yogo logonetak lek nen, taani nen wone obeelom yogwe nogo alom kin a'netak lek kwe, wone-wone yogo monggotak nogo paga alom kenom aga o. 20-21Kit kuwak eeppunuk, kinambi kinalitak lombok nonggo logonet, it ando nengga'lek abu wonogwe iigak, kit ando mban tiyaaket nunggwi, ndi, amburu ndonggorogon nenok kumili-kumili agan nugwi, eekwi kigirak me, ninowe ambi larak inom, amburu inom, abe noorak nduk, kuwak eekwi lek ugun-ugun eekwi kiigi o. 22Wologwe wae. Kinagi-kinambi nonggo logorak kinawi wurik lek kenok, Ala awi wurik me ugun-ugun eeri unggogo ogotik? Ndi, Ala apuri kuwak eeko menggaarak meek eerogo piigo logonet, it inamendek lek nogo inenggali kaawak nduk, eeginakwi lek mba'nuk yogo ogotik? Kit togop aret eekwi me, an nonggop yokkira? ”Kit op aret eekwi o,” yinuk, yokkiroorak mbakop? Mondok lek o.
23At ninowe endagembogut nen eeko logorak yo'nireegerak wagangge nagagirik, yokkiragagirak nogo eebe yi aret o. At ninowe Yetut waruwak nduk awo pigagangga'lek kagak, ne tiyom oonikiya paga roti mbi eenggime wagangge nagagirik. 24”Ala wa,” yinuk, kareke logonet, ”Yi an neebe negen aret me kit kinake aret o. An noba abeko logonet, nonggo logonip o,” yinuk, yorage nagagirik, nunggugwaarak. 25Nonggo nogogwaarik, ti'nuk, mbi wee'lek larak ando nenok, amburu toolak togop aret eenggime wagangge nagagirik, ”Ala nen kinom lambumbinagarak wone ngget mendek koonogo pereegerak nogo nawoneninu kilikkirage kit abet mbarubagip nduk, namiya kinake wundigin nogo amburu toolak yi kwak aret me, kiniki noba abeko logonet, nonggo logonip o,” yinuk, wogorage mbareegi, nunggugwaarak. 26Yetut woroorak tokkogo logonet, roti mbi inom, amburu toolak inom, ne ambi nenggak, ne ambi nenggak eeko logonet, ”Ninowe Yetut ninake abet aret kambeegerak kagi,” yinuk, nggwok paga paganggo monggoorak.
27Ti kenok, kit ninowe endagembogut ambi larak inom, amburu toolak inom, we wuppagagi-perambagagi nunggwi kiinok, ninowe eebe inom, amiya inom, maluk eerogo pugu logonet, aret nonggo monggotak kiigo. 28Kit aa'nduk kiniki liippatinuk, mbi inom, amburu inom, nonggo logorak perak op. 29Kit kiniki liippaka'lek logonet, maluk kinikime tebenak kagak, mbi inom, amburu inom, nunggwi kiinok perak, Ala anini ninoba pinanuwak, mba'nuk, nonggo monggotak kiigi o. 30Kit ti eekwi paga kinenggela'me time kineebe ambik andi eekkinake, ndeyak eerogo pinagage, ndi, ando kambit nogwe, eeko ogotik. 31Nit aa'nduk, niniki liippatinuk maluk paganggwi niinok, peebi Ala nen nit eekwi liippinaninuk, maluk onggo ninoba pinanigin lek o. 32Peebi it aakumi nggween paga mendek abok aret inowak loonogo maluk onggo inoba piige logonet, nit ninom ninoba pinanege kero, yogondak ninowe endagembogut nen nit eeko monggoorak liippinaninuk, niniki koonogo pinanege menggerak.
33Togop me, noreewi o. Mbi amburu noorak nduk, kuwak eeri wogwe kiinok, ambugwi aret nabagip nduk, toginako logonip o. 34Ndi mbi-amburu noorak nduk, kuwak eeko logonet, mbi abu nen ndonggok togon nunggwi kiinok, Ala nen maluk eekkinake kero, kinambi wee'lek kiname nen mondok ndonggok togon nenok wogo logonu o. Wone ando ti, an pekkiya wage logominggirik, ninom logonet, yokkiraagin o.
Currently Selected:
1 KORINDUT 11: WNO
Highlight
Copy
Compare
Share
Want to have your highlights saved across all your devices? Sign up or sign in
