1 KORINDUT 12
12
Aberiniki nen ninalitak lombok unde eeppinaneegerak wone
1Noreewi o. Aberiniki nen ninalitak lombok unde eeppinaneegerak nogo kit kineenggo'lek wonogwe kiyo, yokkira o.
2Kit aa'nduk, Ala wone konengga'lek wonogo logonet, kuguwak nebet-ndalok ari lek mendek kagak, ”Ndogop yo'nirage kogo,” yinuk, mugurok nogo nogogutak nogo, kineenu aret o. 3Kit Aberiniki kinikime wonage logonet, ”Kat Yetut yi kugi pulunogo pagagi o,” yinuk, yoriyak op mbakop? Ndi, Aberiniki kinikime lek logonet, ”Kat Yetut nowe kendagembogut aret o,” yinuk, yoriyak op mbakop? Togop yoriyak mondok meek me, kineenu logobagip nduk, yokkiragi.
4Aberiniki nen ninalitak lombok unde eeppinanege menggerak nogo ti, ambik wonage kwe, at eebe perak, ambit nen aret tumbu'nirage menggerak. 5Ndi, nit Ala eyabu eeko monggoorak ti, alitak lombok wonage kwe, ninowe endagembogut eebe ambit aret ake eeko monggoorak. 6Ndi, eerit nogo monggoorak nogo ti, ninalitak lombok eerit nogo monggoorak kwe, Ala nen mban eeppinanit nage kagak eerit nogo monggoorak. 7Aberiniki nen nit-nit mban obeelom eekko'net nogo logowak nduk, ninalitak lombok unde eeppinaneegerak me, eerit nogo logonet, unde eeppinaneegerak nogo yelok aret kogo logogun o. 8Aberiniki ambit nogo nen nit ando niniki warak logonet, wone koonogo yorogo logowak nduk, unde eeppinanege, ando yi wone ndi wone alom nineenu a'nuk, liirogon yorogo logowak nduk, unde eeppinanege, 9ando abet mba'nuk eeko logowak nduk, unde eeppinanege, ando aakumi andi iinok, obeelom eeginako logowak nduk, unde eeppinanege, 10ando eerubok mendek eerit nogo logowak nduk, unde eeppinanege, ando Ala wone yorogo logowak nduk, unde eeppinanege, ando aakumi nen wone agan nugwi nogo abok aret, ”Yi abet agan nugwi ilik, pilit agan nugwi a?” yinuk, yelok kogo logowak nduk, unde eeppinanege, ando aakumi inoone nineenggo'lek kwe, lalin negen taati aret wappunuk, it inoone paga lombok yorogo logowak nduk, unde eeppinanege, ndi, ando at ambi ari kagak, ”Togop yigi o,” yinuk, abut laganogo yorogo logowak nduk, unde eeppinanege, eeke menggerak. 11Ti eeppinanege menggerak abok aret at Aberiniki eebe alik ambit nen at iniki mbaketak ndak-ndak aret ninalitak lombok unde eeppinanege menggerak.
Nineenggi-niniyok ambik aret kwe, nineebe ti ambit aret yoragagerak wone
12Nineenggi-niniyok yereegerak-pereegerak ti, ambik aret wonage kwe, nineebe ti ambit aret wonage ti kokwak, Keritut eebe ambit aret kwe, at eenggi-iyok negen nit apit aret ogoorik o. 13Togop me, nit Yakuri mendek inom, kit endekem mendek inom, kit aakumi inayeloman inom, inayeloman lek we wondet aago wonogwe inom, Aberiniki nogo paga nen nit abok aret nineebe ambit kumbinaneegerak me, niyo eneeri ambit nonggo monggo kwak, at Aberiniki eebe ambiret aret nit abok ninikime mambinaneegerak.
14Togop me, nineebe alik mban wonage lek o. Nineenggi-niniyok yereegerak-pereegerak abok aret nineebe ambit paga mban kunik wonage o. 15Ti kenok, wone ogut wakkagak ambi yokkira o. Aap ambi iyok nen ari logonet, ”An at eenggi mendek lek me, at eebe paga kunik lek aret agarik o,” ari kenok, at eebe paga kunik lek abet aret mbakop? 16Ndi, aruk nen ari logonet, ”An nogo at enegen mendek lek me, at eebe paga kunik lek aret agarik o,” ari kenok, at eebe paga kunik lek abet aret mbakop? 17Nineebe abok tigitogon nogo ninigen mban ogobakkigi'netak nen nonggop togon ninaruk konenggo logonetak mbakop? Ndi, nineebe abok tigitogon ti, ninaruk mban ogobakkigi'netak nen, nonggop togon yi mendek ndi mendek obari kogo logonetak mbakop? Togop logorak meek o. 18At Ala nen iniki koombege nagagirik, nineenggi-niniyok yereegerak-pereegerak alitik-alitak ninanobak me nen ndegen-ndegen aret kumbinanit ogu niniyok me wambi nagagerak. 19Nineenggi-niniyok yereegerak-pereegerak mban logonetak nen, nano paga kunik logonetak mbakop? 20Lek o. Nineenggi-niniyok yereegerak-pereegerak ti, ambik aret kwe, nineebe ti ambit aret o.
21Ti kenok, ninigen nogo nen nineenggi yoge logonet, ”Kat nen ambi ee'naburak lek me, neebi o,” yoge, ndi, ninanobak nen niniyok yoge logonet, ”Kat nen ambi ee'naburak lek me, neebi o,” yinuk yoge, eeriyak op mbakop? Togop yuurak lek o, noreewi o. 22Nit nineebe iya, ndi, nineenggi-niniyok yereegerak-pereegerak nogo ti meek mbakwi kwe, lek kenok, nineebe alik nen eeko logorak meek me, abu iya lombok aret o. 23-25Nit nineenggi-niniyok yereegerak-pereegerak ando etenggen abe amuni mbanak kenok, liippugwi lek kwe, ando etenggen maluk kenok, ogobakkigirogo pugwi, ando ninenggali arukwak nduk, nobakkologwe, eeko monggoorak. Nineenggi-niniyok ambi nen ambi abuwa eekak, ambi nen ambi abuwa eekak, eeko logowak nduk, at Ala nen nineebe ogobakkigirogo pinanege logonet, nineenggi-niniyok ogoorik-ogoorak logokwak, etenggen maluk kenok, ogobakkigikkologo logowak nduk, koonogo pinaneegerak. 26Togop aret kooneegerak me, kineenggi ambit iluk mbanggirage kenok, kineebe abok aret andi eekkinake, ndi, kinetenggen abe me, aakumi nen wigirogwe iinok, kineebe abok aret wigirogwe, eeko menggaarak.
27Togop me, kit kinalitak lombok Keritut eenggi-iyok aret me, at eebe kinom kunik aret ogotik o. 28Ndi, Ala nen at apuri kuwak eeko menggaarak inenggela'me nen aa'nduk nappiigak mendek leenogo piige, ti'nuk, it inabu'me Ala wone yorogo menggaarak mendek mippiige, ndi, it inabu'me Ala wone mamunirogo menggaarak mendek mippiige, ndi, it inabu'me eerubok mendek eekwi, aakumi andi obeelom eeginakwi, yeenggwaarogwe, wone lengganinakwi, inoone lombok lalin yogwe, inalitak lombok eerit nogo logowak nduk, unde agago mippiyareegerak me, 29it abok aret nappiigak mendek logowak nduk, eeginabeegerak mbakop? It abok aret Ala wone yorogo logowak nduk, mippiyareegerak mbakop? It abok mamunggak logowak nduk leenogo piyareegerak mbakop? Ndi, it abok eerubok mendek eeko logowak nduk, kooneegerak mbakop? 30It abok andi kenok obeelom eeginako logowak nduk, yoragagerak mbakop? It abok inoone lalin yogo logowak nduk, mippiyareegerak mbakop? Ndi, it abok aret inoone yogwe nogo. ”Togop yigi o,” yinuk, yorogo logowak nduk, wogoragagerak mbakop?
31Lek o, noreewi. Ala nen ninalitak lombok unde eeppinaneegerak me, yokkiragi o. ”Ala nen peebi unde eeppiyareegerak mendek lek o. Ata, aa'nduk unde eeppiyareegerak nogo mendek unde eeppinagawak nduk, yogo logonip o,” yinuk, yokkirage kwe, ambi mondok iya lombok eeko logorak wone ambi yokkira o.
Currently Selected:
1 KORINDUT 12: WNO
Highlight
Copy
Compare
Share
Want to have your highlights saved across all your devices? Sign up or sign in
