1 KORINDUT 10
10
Kuguwak amuli kunggwi iyo, yoragagerak wone
1Noreewi o. Muta nen nit ninombomini wogoren nage kagak, eereegwaarak nogo kobak ogwe kiyo, aberogo yokkira o.
It abok aret ndugwi nen tu nigiren nage, niyo mogongge kenok, it abok aret wunda nogwe, eereegwaarak nogo ti paga 2nit Keritut oone waganggwi mendek mbaruwak nduk, niyome wanggo monggo kwak, it Muta oone waganggwi mendek yelok iyaawak nduk, eeppiyareegerak kogo. 3Ti eeko nogogwaarik, roti mbi mbogut paga nen wugira wagagerak nogo it abok aret nunggwi, 4ndi, yugum wake mbareegi, Ala nen niyo wogoragagerak nogo eebe Keritut aret inom nagagerak me, it abok aret nunggwi, eereegwaarak kwe, 5it ando nggwok nogo Ala ale'nggen inombarulik me, karume time kambit nogo logonet, inowak nggininit nagagerak nogo o.
6Ti eereegwaarak nogo it, ”Maluk eeruwok o,” mba'nuk, eerit nogo nogogwaarak kwak, nit ndak-ndak, ”Maluk eeruwok,” mba'nuk eerit nogwe niyo, nit liippako logowak nduk, eereegwaarak. 7It aakumi ando nen kugi eeko logonet, ”Kugi aanggo warogo nunggwi, ti'nuk, ndawi unggwogwe, eereegwaarak o,” yinuk, liiru mbanak nogo ndak-ndak kit kuguwak amili kuniyak mage o. 8Ndi, it ando ndawi wappunuk, kumi ugun-ugun wurinabit nogo mbareegwa, ne ambit paga ineebe ambik 23,000 aret kambit nogogwaarak nogo kwak, nit togop ee'ninabukwak ugun aganabit nugu logorak mage o. 9It ando nen Ala anini eeppogo mbareegwa, waalo nen eyak mbaninabit nage mbareegi, kambit nogogwaarak nogo kwak, nit togop aret kambit nookwak, Ala anini eeppuurak mage o. 10It ando nen ineebi-ineeba yogo mbareegwa, Ala yonggo mbogut paga mendek melaikat ambi aakumi inoorit nege menggerak nogo nen inoorogo piinet wage mbareegi, kambit nogogwaarak nogo kokwak, nit togop aret ninooke kero, nineebi-nineeba yogo logorak mage o.
11It eereegwaarak nogo ti, in wakkagak nit nineenu aruwak nduk, eereegwaarak me, o age yobok eeriyak nogo ninoba panggoni wage kagak, nit yogondak wonogwe nogo niniki lippatuwok nduk, wone yi liiru mbanniragagerak.
12Ti kenok, aap ambit-ambi, ”An Ala wone abu liippigirak me maluk eerigin lek o,” mbake kenok, yigeebu wangge kero, iniki liippatinuk, logowak o. 13Kit kiniki nggagangginake menggerak nogo ti, alik mendek paga lek o. Ata, yi aakumi ndi aakumi iniki nggaganinake menggerak nogo mendek paga mban aret kit kiniki nggagangginake kaamunggup kwe, at Ala nen nit ee'ninake nogo mondok liippinanege menggerak me, kiniki nggagangginake kagak, kinomaawi lek arit unggwage logonet, maluk eekwi kiyo, Ala nen tu mbininogo pinagagin o.
14Ti kenok, noreewi o. Kit an niniki kunik me, kuguwak amuli kuniyak mage o. 15Kit aap kiniki warak aret me, wone yokkirage yi, kit mban kiniki wakkogo logonip o. 16Nit niniki ambit lambunik logonet, amburu toolak waganogo at Keritut amiya wundeegerak nogo paga lambunogo pinaneegerak me, ”Ala wa,” yinuk, nonggo monggoorak nogo lek a? Ndi, mbi karerogo nonggo monggoorak nogo ti, nit niniki ambit lambunik logonet, at ninake kambeegerak abeko logonet, nonggo monggoorak nogo lek a? 17Nit nineebe apit aret kwe, mbi ambit aret karerogo ma'mat nunggwi me, nineebe ambit lambunik aret ogoorik o.
18It Iterali eeko nogogwaarak nogo wakkaanip o. Ala aanggo wonok wogwe inom, warogo Ala wogogo logonet, nunggwi inom, Ala nen ndak-ndak eeppiige menggerak lek mbakop? 19An wone ti ngge nduk yokkirage mbakop? ”Obeelom eekkolaabagip nduk, kugi aanggo warogo nonggo logonip o,” yinuk, yokkirage mbakop? Ndi, ”Maluk eekkinake kero, kuguwak amuli kunggo logonip o,” yokkirage mbakop? 20Mondok lek o. An yokkirage ti, it aakumi endekem mendek nogo nen inagugi aanggo warogo wogorogwe nogo ti, Ala ake warogo wogogwi lek o. Ata, it inagugi inake aret warogo wogorogwe me, inagugi kinoba age kero, kit kinom kunik eeko logorak an mondok, ”Neebi,” mbake logonet, yokkiragi o. 21Ninowe endagembogut amburu toolak inom, kugi Tile amburu toolak inom, imbirak lambunogo punuk nenggak yuurak mondok meek o. Ndi, ninowe endagembogut ambi larak inom, ti'nuk, kugi Tile ambi larak inom, imbirak lambunogo punuk noorak ti kunduk, abu meek mban o. 22Nit ninowe endagembogut anini eeppuurak op mbakop? Nit ninomaawi ambik, ndi, at omaawi lek mbakop?
23Lek o. Yi mendek ndi mendek eeriyak mage lek abok ugun eeriyak op aret kwe, eerit nogo logonet perak, nit ambi obeelom eekkoloorak nduk, eekulik o. Ando maluk ee'ninaburak kagak we aanom warogo aret eerit nogo monggoorak. Yi mendek ndi mendek abok eeriyak ti, op aret kwe, apit op eekkoloorak nduk, eekwi ti lek o. 24Kit kinobaalombok mban eekko'net nogo logorak lek o. Ata, kinoreewi inikilom mbaruwak nduk inom aret eeppiinet nogo logonip o.
25-26”Yi mendek ndi mendek nggween paga yime wonage nogo abok at Ala mban unde aret o,” yinuk, liiru mbanak wonage me, kit wam mbanak pasar eekwi paga onggo punuk, alom kobak logonet, ugun nonggo logorak op aret o.
27It aap abet mbaka'lek mendek nen wam larak kinom noorak nduk, wigirage kenok, kinom na noorak mbakwi kiinok, larogo wokkirogwe nogo, ”An op namun ilik, lek a?” mbaka'lek kagak ugun aret nonggo logorak op aret kwe, 28-29aap alik ambi nen, ”Yi kugi aanggo warak mendek lakaarak o,” yinuk, yokkirage kenok perak, kit ugun noorak op aret kwe, at yokkirage nogo nen, ”An op namun ilik, lek a?” iniki aaninggin logonet, yokkirage me, at ake noorak lek mbo puurak aret o.
Mbo puurak op aret kwe, kit ando nen, ”Ndi, an ugun noorak op mbake neegak, at ambi noorak paga nonggop nduk, mage yo'nirage agandik? 30Ndi, an nobaalombok Ala, Wa, yinuk, nengge neegak, it aakumi nonggop nduk, nabok mbanggo agaarik?” yogwe kiigirak me, noreewi o.
31Kinambi nunggwi, kinagi nunggwi, yi eekak ndi eekak abok aret eeko logonet, Ala endage tiyappuurak nduk mban eeko logonip o. 32-33An aakumi inale'nggen mbaruwak nduk, inake yi eekak ndi eekak eeke logonet, an obeelom logokit mba'nuk, eekkolage lek o. Ata, Ala nen it inagap ndappiyaawak nduk, obeelom eeppiinet nage minggirak nogo ndak-ndak, kit togon, it Yakuri mendek inom, Yunani mendek inom, Ala apuri yi awi ndi awi kuwak eeko menggaarak abok aret eeppiinet nogo logonet, non mbanogo piyookwak, liippunuk, eeppiinet nogo logonip o.
Currently Selected:
1 KORINDUT 10: WNO
Highlight
Copy
Compare
Share
Want to have your highlights saved across all your devices? Sign up or sign in
