KELUARAN 40
40
Manetualain Lalaa Temak nananapadedeik de nanafe hehelik neu Manetualain
1 Manetualain nafa'da Musa nae, 2“Mapadedeik Au Lalaa Temak neu bula ka esa fain esa. 3Tao Peti Hehelu-balataak fo isin-na Paleta ka sanahuluk-kala leo dalek neu, fo tao temak tatanan-na neu uluk. 4Pe'da mei no hata-heton leo dalek neu. Tao banu eik-kala leo dalek neu boe, fo tao banuk-kala neu banuk eik lain. 5Pe'da mei tunu-hotu lilopilas fo mamanak tunu boomenik-ka neu Peti Hehelu-balataak-ka matan-na, ma lolo'e tema lelesu neu Lalaa Temak lelesun-na. 6Pe'da mei tunu-hotuk soaneu tutunu-hohotu nanatunuk-ka neu Lalaa Temak lelesun-na matan-na. 7Pe'da baak oe neu Lalaa Temak no mei tunu-hotuk ndia tala'da, boema sali oe leo dalek neu. 8Basa soona, lofa temak neu fo ana okofeo-na Lalaa Temak so'dan-na, ma lolo'e tema lelesu neu lelesuina manai uma so'dan-na.
9Basa soona, o muse tunu-hotu Lalaa Temak no hata-heton lalaena leo Au, no enon-na leoiak: lose mina neu basa hata lala'en-na nenik mina feta, soona basa sila-la nanafe hehelik soaneu Au. 10Tunu-hotu mei tunu-hotuk-ka no basa hata-heton lala'en-na, no enon-na leondiak boe, fo ela basa-basan lala'en-na nanafe hehelik soaneu Au. 11Tao leondiak neu baak oe no buin-na boe.
12Basa ndia soona, madenu Harun no anan-nala mai leo Lalaa Temak lelesun-na mai, fo ala safe aoinan-nala. 13Pake papake imam-ma neu Harun, ma lose mina neun, fo ela nanahele hehelik soaneu nalalau-naoono Au da'di leo imam. 14Boema madenu anan-nala mai deka, fo pake ba'du kabaek neus. 15Boema lose mina neus sama leo o lose mina neu sila aman, fo ela sila boeo hapu lalalau-laoono Au da'di leo imam. No feta mina ndia, de sila leon-na ho'u lahele imam-ma bela-ba'un neme tititi-nonosik leo tititi-nonosik neu.”
16Musa tao basa-basan lala'en-na, sama leo Manetualain paletan-na. 17Boema nai bula ka esa fain esa nai teu ka dua dalek, fo lelek leoina Israel-la la'oela Masir boema, lapadedeik Manetualain Lalaa Temak ndia. 18Musa pe'da buin-nala, dii-nala, tao ai betubalan-nala leu, ma napadedeik natetetu diin-nala. 19Boema ana lofa Lalaa Temak doon-na ma ana tao tema popotik neu lain, sama leo Manetualain paletan-na. 20Basa boema, ana pe'da batu ka duak sila-la leo Peti Hehelu-balataak dale neu. Boema Musa tatana Peti ndia tatanan neu de ana tao ai ndondolon-nala leo suek-kala dalek neu. 21Boema ana pe'da Peti ndia nai Lalaa Temak dale, de ana lolo'e tema popotin-na neu Peti matan-na, sama leo Manetualain paleta neun.
22Basa boema, Musa pe'da mei nai Lalaa Temak dale, nai boboan kii, fo nai temak-ka dean-na, 23boema ana pe'da loti nanasadiak-ka neu mei ndia lain, sama leo hata fo Manetualain paletan neu Musa 24Ana pe'da banu eik-ka nai Lalaa Temak dale, nai boboan kona, fo nasasalematak no mei ndia, 25boema ana de'de napila banuk sila-la nai Manetualainmatan-na. 26Ana pe'da mei tunu-hotuk-ka nai Lalaa Temak dale, fo nai temak-ka matan-na, 27boema ana tunu boomenik kaboomenik sama leo hata fo Manetualain paletan neu Musa. 28Musa lolo'e Lalaa Temak-ka tema lelesun-na, 29ma ana pe'da mei tunu-hotuk soaneu tutunu-hohotuk nanatunuk-ka nai lelesu ndia matan-na. Ana tunu-hotu tutunu-hohotu nanatunuk ma tutunu-hohotu nanasadiak-ka nai mei tunu-hotuk ndia lain. 30Ana pe'da baak oe liti nai Lalaa Temak no mei tunu-hotuk-ka tala'da, boema ana sali oe leo dalek neu. 31Musa, Harun no anan-nala safe ei liman nai ndia, 32nai lelek ala masok leo Manetualain Lalaa Temak dale leu do ala deka loo mei tunu-hotuk-ka. 33Musa tao laa okofefeok Lalaa Temak ma mei tunu-hotuk ndia, boema ana lolo'e lelesuina uma so'dak-ka, tema lelesun-na neu. Boema basa tatao-nono'ik ndia.
Manetualain ndela-sa'an potin-na Lalaa Teman Malalao-malalafun-na
(Bil. 9:15-23)
34 #
1Raj. 8:10-11; Yes. 6:4; Yesk. 43:4-5; Nin. 15:8 Basa boema, ko'as-sa kona mai, de ana potiketu Manetualain Lalaa Teman-na, de Lalaa Temak ndia henuk no Manetualain ndela-sa'an. 35Hu ndia de, Musa ta hapu masok leo Lalaa Temak ndia dalek neu fa. 36Metema ko'as ndia kae neme Manetualain Lalaa Temak lain mai soona, leoina Israel-la ofeheni sila uma ofun-nala fo ala lali leo mamana fe'ek leu. 37Tehu metema ko'as ndia ta kae fa soona, ala ta la'o leme ndia mai fa. 38Nai lelek leoina Israel-la bei laleu-lalaak, Manetualain nai Lalaa Temak ndia dalek fo nalupa ko'as nai fai lele'don-na, ma nalupa ha'i nai fai le'odaen-na.
Currently Selected:
KELUARAN 40: twu
Highlight
Copy
Compare
Share
Want to have your highlights saved across all your devices? Sign up or sign in
