IMAMAT 1
1
Tutunu-hohotuk nanatunuk
1 Manetualain naloo Musa neme Lalaa Teman dale mai, de Ana fen nakanenetek-kala nde ia, 2fo hataholi Israel-la muse tao tungan.
Metema, hataholi esa tunu-hotu bana soaneu tutunu-hohotuk nanatunuk ba'eneu Manetualain soona, ana bole tunu-hotu ndia sapi, ndia bi'ilopon do ndia bi'ihiin-na. 3Metema, nanatunu-hotuk ndia sapi esa soona, bana ndia muse mane, ma ta lu'u-la'ak fa. Muse neni sapi ndia leo Manetualain Lalaa Teman-na lelesun-na neu, fo ela Manetualain dalen-na nahiik hataholi ndia. 4Boema, muse ana lalaa liman-na neu bana ndia langan lain, soona neukose Manetualain sipok tunu-hotun fo sala-singon hapu do'o do ampon. 5Basa soona, muse ta'ti sapi ndia nai Lalaa Temak-ka lelesun-na, bafan-na. Imam-imam fo Harun tititi-nonosin-nala, muse tunu-hotu daan-na soaneu Manetualain boema pisi daak ndia neu mei tunu-hotuk-ka boboan haas, fo nai Lalaa Temak-ka lelesun-na matan-na. 6Basa soona, hataholi ndia muse ali heni bana ndia loun-na, fo ana tete'te bana ndia paan-na. 7Imam-imam-mala, muse laladuduluk ai neu mei tunu-hotuk lain, fo tao ha'i neu. 8Muse tao paa tutunu-hohotuk nanatete'tek-kala no langan-na ma minan-na, leo ha'i lain neu. 9Boema, hataholi ndia muse safe sapi ndia tei-aten, ma sakibolon-na, fo imam malalau-maoono-la, muse tunu la'iesak-kana. Tutunu-hohotuk ndia boon-na, nandaa no Manetualain dalen-na.
10Metema, bana nanatunu-hotuk ndia bi'ilopo esa, do bi'ihiik esa soona, bana ndia muse mane, ma ta lu'u-la'ak fa. 11Hataholi ndia, muse do'do bana ndia nai mei tunu-hotuk-ka boboan kii, boema imam-mala muse po'a daan-na neu mei tunu-hotuk-ka boboan haas. 12Tete'te basa bana ndia paan-na soona, imam-ma muse tao basa paa nanatete'tek-kala no langan-na, ma minan-na leo ha'i manai mei tunu-hotuk lain neu. 13Boema hataholi ndia muse safe bana ndia tei-aten ma sakibolon-na. Basa soona, imam-ma muse tunu-hotu la'iesak paa ndia nai mei tunu-hotuk lain soaneu Manetualain. Tutunu-hohotuk ndia boon-na, nandaa no Manetualain dalen-na.
14Metema, nanatunu-hotuk ndia manupui esa soona, muse manupui kateu, do kaluaana. 15Imam-ma muse neni manupui ndia leo mei tunu-hotuk-ka neu, fo ana po'de la'di lesuha'in-na, fo tunu langan-na nai mei tunu-hotuk lain. Muse lose manupui ndia daan-na neu mei tunu-hotuk-ka boboan-na. 16Muse kee heni nutun-na, no isin-na lala'en-na, fo tu'us leo mei tunu-hotuk-ka boboan dulu neu, fo nai mamana afu-a. 17Basa soona, muse siin neu manupui ndia li'da huun-na, tehu ta bole ketu heni li'dan-na fa. Soona, muse tunu manupui ndia, nai mei tunu-hotuk lain. Tutunu-hohotuk nanatunuk ndia boon-na, nandaa no Manetualain dalen-na.
Currently Selected:
IMAMAT 1: twu
Highlight
Copy
Compare
Share
Want to have your highlights saved across all your devices? Sign up or sign in
