KELUARAN 39

Tao imam-ma bua papaken-na nana taok

(Kel. 28:1-14)

1Bezaleel no Aholiab tao bua papake makaluku-makatele neme temak kabelik balau, pilabalanggeok ma pilas soaneu basa imam-mala nai lelek lalalau-laoono nai Kama Malalao-malalafuk dale. Papake imam soaneu Harun, nanataok sama leo hata fo Manetualain paletan neu Musa.

2Efod nanataok neme tema abalutu, temak kabelik balau, pilabalanggeok ma pilas, ma aba lilopilas. 3Ala tutu lilopilas bibiak-kala, de basa boema ala kaka'das da'di abas lutuanak, boema ala tenun no temak abalutu, ma temak kabelik balau, pilabalanggeok ma pilas. 4Basa ndia boema, ala tao ma efod, tali papa'a aluk dua, fo seun neu boboan-na. 5Kalikee abalutu-a, ala taon neme abas matak esa mai, de ala seun neu ba'du sakun ndia, nalosa ala da'di esa, sama leo hata fo Manetualain paletan neu Musa. 6Ala fola batu poemata dula pilas, boema ala taon leo su'udoo lilopilas dale neu. No sila malelainan-na, de ala doki-dulak Yakob ana ka sanahulu duan-nala na'den-nala neu batu sila-la. 7Basa boema, ala tao batu sila-la neu efod-ta tali alun-nala da'dileo ta'du-tana nasanene'dak neu Israel leo ka 12n-nala, sama leo hata fo Manetualain paletan neu Musa.

Tao babaa fanak

(Kel. 28:15-30)

8Bezaleel no Aholiab tao babaa fanak fo tataon-na sama no tao efod, ma seseu-sosoon boeo matak esa. 9Ala tao lan balakak fo diku duak-kana, loloa nanalun senti beke 22. 10Nai babaa fanak ndia, tao batu poemata dalak 4 neu babaa fanak ndia. Nai dalak makasososak-ka tao batu poemata dula pilas, batu kabelik dula kunik, batu poemata dula fulak. 11Nai dalak ka dua, batu poemata dula momo'dok, batu poemata dula balau ma intan. 12Nai dalak ka telu, tao batu poemata dula balau, batu poemata dula pilas, ma batu poemata dula pelabalanggeok. 13Nai dalak ka 4, tao batu poemata dula momo'do-balau, batu poemata dula momo'dok ma batu poemata dula kuni-mangadilak. Muse pa'a batu poemata ka 12 sila-la nenik lilopilas. 14Yakob ana ka sanahulu duan-nala na'den-na nanadoki-dulak nai poemata sila-la, fo da'di ta'du-tanan-nasanene'dak neu Israel leo ka sanahulu duan-nala. 15Boema ala tao-la namosina dua neme lilopilas isik-ka mai, de ala tatalin sama leo tali-a. 16Ala tao la suek lilopilas dua boe, de ala taon neu babaa fanak ndia pe'dan duas, poin-na. 17Boema ala tao namosina lilopilas ka duak sila leo suek sila-la dalek neu, 18ma pe'dak-ka duak-kala nanapa'ak neu su'udook-ka duak-kala, nalosa babaa fanak ndia hapu nanatutik no efod tali alun manai uluk-ka. 19Boema ala tao seluk suek lilopilas dua bai, de ala taon neu babaa fanak ndia, nai pe'dan manai dalek-ka dae, fo pe'dak manala'e efod. 20Basa ndia boema, ala tao-la suek lilopilas dua, de ala taon neu efod tali alun ka duak manai uluk-ka, deka no seseu nanatutin-na dae faaanak, fo nai kalikee abalutu nisilain-na. 21Nandaa no Manetualain paletan neu Musa, de suek babaa fanak-ka nanatutik no tali balau manai efod, nalosa babaa fanak ndia nahele nai kalikee lain de ta natapo'i fa.

Tao bua papake fe'ek soaneu imam-mala

(Kel. 28:31-43)

22Ba'du manalu fo nanapakek nai efod lain, nanataok neme temak kabelik balau mai. 23Ala tao latea-lahele lesuha'in-na nenik temak nanatenuk, fo ela boso siihenin lai-lai. 24-26Ala balias okofefeo su'udoo daen-na nenik dalima boak, neme temak abalutu, temak kabelik balau, pilabalanggeok ma pilas, de ala tata'dan nenik kileik lilopilas, fo nandaa no Manetualain paletan neu Musa.

27Ala tao ba'du kabaek fe Harun no anan-nala, 28tema fefeo langak, papa'a langak, lopo ei keke'uk abalutu, 29ma kalikee nanatenuk neme temak abalutu, temak kabelik balau, pilabalanggeok ma temak pilas, fo balias-sana nenik seseu-sosoo mana'ahiik, sama leo Manetualain paletan neu Musa. 30Boeo ala tao balias neme lilopilas isik-ka mai, fo da'di ta'du-tanan-nae sila nanahele hehelik soaneu Manetualain. Dede'ak ia la nanadoki-dulak neu balias sila: “Nanahele hehelik soaneu Manetualain.” 31Balias sila-la nanataok neu tema fefeo langak manai uluk-ka, fo nandaa no Manetualain paletan neu Musa.

Tatao-nono'ik ndia nanatao nakababasak

(Kel. 35:10-19)

32Mate'en-na, Manetualain Lalaa Teman-na tatao-nono'in, basa la'iesak-kana. Hataholi Israel-la tao basa hata lala'en-na, sama leo hata fo Manetualain paletan neu Musa. 33Ala leni fe Musa, Lalaa Temak no basa hata-heton lala'en-na, soloka'don-nala, ai betubalan-nala, dii-la no dii ein-nala, 34tatanak fo taon neme bi'ihiimane loun fo nanalosek nenik dula pilas, tatanak fo taon neme bana louk mangana'uk, teman popoti langan-na. 35Peti Hehelu-balataak-ka no isin-na batu dua, no ai ndondolon-na, ma tatanan-na, 36mei no basa hata-heton lala'en-na ma loti tunu-hotuk, 37banu eik lilopilas isik-ka, banun-nala no basa hata-heton lala'en-na, mina soaneu banuk-ka, 38mei tunu-hotu lilopilas-sa, mina feta, boomenik kaboomenik, Lalaa Temak-ka tema lelesun-na, 39mei tunu-hotu liti no kafa nananala'ek neme liti mai, ai ndondolok, ma basa hata-heton lala'en-na; baak oe fo mamana sasafek-ka no buin-na, 40temak soaneu uma so'dan-na, ma dii-la no dii ein-nala, lelesuina manai uma so'dak-ka tema lelesun-na, boema tali-nala, Lalaa Temak ai papakun-nala; basa lou-laak fo nanapakek nai Lalaa Temak dale, 41ma imam-mala bua papake makaluku-makatelen nai lelek lalalau-laoono nai Kama Malalao-malalafuk dale, ma bua papake hehelik soaneu Harun no anan-nala. 42Hataholi Israel-la tao basa tatao-nono'ik ndia, sama leo Manetualain paletan neu Musa. 43Musa palisak basa hata lala'en-na, de nita nae ala tao lan nandaa sama leo Manetualain paletan-na. Boema Musa fes baba'e-papalak.

Currently Selected:

KELUARAN 39: twu

Highlight

Copy

Compare