Mavingu 3
3
A ku tsumba Jehova.
1Nwananga, u nga rivali nayo wa mina, anilezi a mbilu ya wena a yi hlayise zileletelo za mina; Deut. 8:1; 30:16
2Hakuva zi ta engetela masiku ya wena, i malembe ya kuhanya ka wena, zinwe ni kurula ka wena.
3A wuxinji ni zinene ngha zi nga humi ka wena, i bohelele nhanwini ya wena; i tsale lomu mbilwini ya wena:
4Kasi wa fela ku kuma tipswalo ni kupimisisa ahlweni ka Nungungulu ni ka vanhu.
5Tsumba Jehova hi mbilu ya wena yontlhe, nga tsumbi kupimisisa ka wena wutsumbu. 1 Kro. 28:9
6U ta mu ingisa tindleleni tontlhe ta wena, ena i ta lulamisa a tisoko ta wena.
7U nga ti hlayi lezaku u tlharihile, hava Jehova, u huma kubiheni. Isa. 5:21; Rom. 12:16
8Wu tava muri a nkaveni wa wena, i mongo marambyini ya wena.
9Dumisa Jehova hi tshomba ya wena, i mavele yo ranga ya pfuno wa wena: Ekso. 23:19; Deut. 26:2
10Kasi magomba ya wena ma ta tala, i mapipa ya wena ma ta tala hi vinya giswa.
11Nwananga, u nga kanyisi kulaya ka Jehova, nga tsanwiswi hi kukawuka kakwe: Maheb. 12:5; Kuv. 3:19
12Hakuva loyi Jehova a mu ranzako, wa mu kawuka, hwatsi hi dadani a tsayisako nʼwana loyi a mu ranzako.
13I katekile munhu loyi a kumako wutlhari, i loyi a kumako kupimisisa.
14Hakuva a ku bhinzula zona ka hunza a ku bhinzula siliva, i bhinzu ga zona gi hunza bhinzu ga nzalama.
15Gi hunza makoral hi lisima, ontlhe lezi zi ku navelako a zi ringani na gona.
16A kuleha ka masiku ku le canjeni ga gona ga xinene, canjeni ga gona ga xibhabha ku na ni kupima ni wudzunzo.
17A tindlela ta gona tindlela ti tsakisako, i tisoko ta gona ti tele hi kurula.
18I sinya ya wutomi ka lava va gi kumako, katekile loyi a gi hlayisako.
19Hi wutlhari Jehova i lo yimisa misava, i kupimisisa i lo yimisa matilo.
20Hi wutivi gakwe a mati ya le kueteni ma lo phuxuka, i marefu ma wisa nzhokati.
21Nwananga, u nga vumeli lezi zilo zi nwalala mahlweni ya wena, layisa wutlhari gi tiyileko ni kupimisisa.
22Zonake zi tava wutomi ga muhefemulo wa wena, i zimanimani ka nhamu ya wena.
23Zonake u ta famba na u tiyile ndleleni ya wena, i nenge wa wena cima wu nga ta khunguvanyeka.
24Loku uya kuetleleni cima u nga ta chava, na, u ta etlela, ni wurongo ga wena gi ta nanziha.
25U nga dzukiswi hi chawo wa xitshuketi, e hambu kuhlokiswa ka vakubiha laha ku ta ngata.
26Hakuva Jehova i tava kutsumba ka wena, ta ponisa a nenge wa wena lo tlhanwini.
27U nga ali ni xivuno xa wena ka loyi a vumalako, oku zi hi ntanwini wa wena lezaku u zi maha.
28U nga wuli ka muakelane wa wena uku: Famba u ta wuya kambe, zi ta ku nyika manziko! Kasi lezo lexi a xi lavako ka wena xi kona. Deut. 24:14
29U nga alakanyeli kubiha hi muakelane wa wena, oku a tsumba lezaku i tshamile hi kurula ka wena.
30U nga holovi ni munhu mahala, oku yena a nga ku gohelangi nchumu.
31U nga naveli a munhu wa lunya, nga hlawuli ni yinwe ya tindlela takwe.
32Hakuva a wakubiha manyala ka Jehova, anilezi i xaka ga valulamileko.
33A xiruko xa Jehova xi lomu ndlwini ya vakubiha, anilezi yena wa katekisa wuakelo ga valulamileko. Levi 26:3
34Hizinene wa tseketsela vatseketseli, anilezi wa nyika tipswalo ka lava va ti koramisako. Isa. 66:2; 1 Ped. 5:5; Jak. 4:10
35A titlhari ti taga tshomba ya wu dzunzo, anilezi a zipumbu zi ta wiswa ti-nganeni.
Tshwa Bible © Bible Society in Mozambique, 1972, 2007.