Mavingu 4
4
A zileletelo za dadani.
1Vanana, ingisani a gonziselelo ya dadani, u yi pangamela kasi ma fela ku zwisisa.
2Hakuva nzi mu nyika a gonzo yi nene, u nga tsiki a gonziselelo ya mina.
3Hakuva mina nzi wa hi nʼwana dadani, nʼwana a nga yece a ranzekako ka mamani;
4Dadani i lo nzi gonzisa aku: mbilu ya wena a yi namarele timhakeni ta mina; layisa zileletelo za mina u ta hanya. Levi 18:5; 1 Kro. 28:9
5Hlota wutlhari ni kupimisisa, nga rivali timhaka ta nomu wa mina, u nga ti tsiki.
6U nga tsiki wutlhari, gi ta ku hlayisa, i ranze, gi ta ku hanyisa.
7A wutlhari xilo xo ranga, gi lave; ava kupimisisa hi zontlhe lezi u nga nazo.
8Gi kulise, gi ta ku kulisa; oku u gi angarela gi ta ku nehela wudzunzo.
9Gi ta bombisa a hloko ya wena hi wumbhuri, i ta ku ambexa xidlodlo xa wudumo.
10Ingisa nwananga, u amukela timhaka ta mina, malembe ya kuhanya ka wena ma tava manyingi.
11Nzi ku gonzisa tindlela ta wutlhari, zi ku fambisa hi tisoko ta nongameto.
12Laha wena na u famba, cima a milenge ya wena yi nga ta khunguvanyeka, i loku u tsutsuma cima u nga ta khubeka.
13Khomisisa a gonziselelo, u nga yi tsiki; i hlayise, hakuva hi yona wutomi ga wena.
14U nga engheni tisokweni ta vakubiha, nga fambi ndleleni ya vabihileko.
15Yi potse, u nga hunzi hi ka yona, otsoloka, u hunza.
16Hakuva cima a va etleli loku va nga se maha kubiha, i wurongo cima a giti loku va nga se wisa munhu.
17Hakuva a kubiha xibaba lexi va gako xona, anwa vinya ga tihanyi.
18Kanilezi a ndlela ya valulamileko yi kotisa kuwonekela ka mixo, oku ku enzelekako kala a hlikanhi wu mbhelela.
19A ndlela ya vaonhi yi fana ni munyama, va xi tivi lexi xi va khubekisako.
20Nwananga, ingisisa timhaka ta mina; emba ndleve ya wena kuwulawuleni ka mina.
21Ti nga suki mahlweni ya wena, i hlayise xikari ka mbilu ya wena.
22Hakuva tona mbutomi ni ka wihi loyi a ti kumako, i hi muri mirini wakwe wontihe.
23Hlayisa mbilu ya wena ku hunza zontlhe, akuva yona i hlowo ya wutomi.
24U ngavi na nomu wa zidomudomu, milomu yi kanganyisako a yive kule na wena.
25A mahlo ya wena ngha ma cuwuka hi kutshonometa, i tisiyi ta wena ti kongoma mahlweni ka wena.
26Alakanya a ndlela ya milenge ya wena, tindlela ta wena tontlhe a ti tiyiswe.
27U nga hunzulukeli xinenesii hambu xibhabheni, umesa konzo wa wena kubiheni. Deut. 5:32; Jox. 1:7
Tshwa Bible © Bible Society in Mozambique, 1972, 2007.