Obadia 1
1
Xiprofeto ha Edome.
1A muwoniso wa Obadia. Xungetano ni Edome Hosi Jehova i ngalo: Hi zwile a mahungu ma tako hi ka Jehova, a tsukano wu rumilwe xikari ka matiko, wu yaku: Vukani, a hi vukeni hi mu hlomela yimpi! Jer. 49:14; Am. 1:11
2Nzi ta ku maha tsongwani ka wontlhe matiko, u kanyiswa nguvu.
3A matshanza ya mbilu ya wena ma ku khohlisile, wena loyi u akileko mikovotlweni ya maribye, loyi a wuakelo ga wena gi nga tlakukile; loyi unge mbilwini ya wena: Himani a ta nga nzi wisa lahasi?
4Hambu loku u nga aka xisaka xa wena le hehla ku fanana ni gama, hambu loku u xi veka xikari ka tinyeleti, kwaleyo nzi ta ku susa nzi ku wisa lahasi, ku wula Jehova.
5Loku a makhamba mata ka wena, loku vaphangi vata ni wusiku, o a kuphangiwa ka wena! Va nga ta yiva va kala va kolwa ke? Loku a vakhayi va mauva vata ka wena, va nga ta siya a zicacana lomu mivineni ke?
6Zi ta hlotisiswa kuyini a zilo za Esau! Ma hlotisiswa kuyini a mabako yakwe ma fihlilweko ke?
7Wontlhe matiko lawa u mahileko nawo xivumelwano, ma ku tlhelisele mbhinganweni wa wena; a vanghana va wena va ku khohlisile, va ku hlula. Lava va gako zakuga za wena va ta ku dembela ziyo laho u to kala u nga gi woni.
8Hi siku lego, ku wula Jehova, nzi ta lovisa a titlhari ta tiko ga Edome, ni kupimisisa le xitsungeni xa Esau.
9Temani, a tinhenha ta wena ti ta rurumela, ku ta mbhetiswa vanhu vontlhe le xitsungeni xa Esau hi ku dawa.
10U ta fenengetwa hi tingana hi kota ya kubiha loku u ku maheleko nakuloni Jakobe, u ta lobyiswa kala kupinzuka.
11A siku legi u nga ti pendla laha a valala va nga phanga a nhunzu yakwe, ni vamatiko va enghena hi tinyangwa takwe va ta hlahluva tihlolo hi Jerusalema, wenawu u wa hi munwe wabye.
12Kanilezi wena u nga cuwuki a siku ga nakuloni, gi nga siku ga khombo gakwe, u nga tsakeli a siku ga kulobyiswa ka vanana va ka Juda, kambe u nga wulawuli hi ku ti kukumukisa a sikwini ga kuxaniseka.
13U nga engheni hi nyangwa ya vanhu va mina hi siku ga kuxaniseka kabye; u nga tsakiswi hi hlokiselelo wabye hi siku ga kuxaniseka kabye, ge hambu ku henya a nhunzu yabye a sikwini ga kuxaniseka kabye.
14U nga yimi mahanzakanyeni ya tindlela kasi ku daya a vanhu vakwe lava va tsutsumako, ni kambe u nga nyikeli a misalela yakwe hi siku ga hlomulo.
A siku ga Jehova.
15Hakuva a siku ga Jehova gi tshinele ka wontlhe matiko. Lezi u zi mahileko zi ta mahiwa ka wena; a zimaho za wena zi ta wuyela hlokweni ya wena nwinyi.
16Khwatsi hilezi mu nwileko xitsungeni xa mina xi basileko, wontlhe matiko ma ta simamisa ma nwisa zalezo; ma tanwa ma pswonga, ma ku khwatsi hi loku ma wa nga hi kona. Jer. 25:15; 49:12
17Kanilezi lava va ponileko va tava le xitsuhgeni xa Zioni, xi tava wutshamu gi basileko; zonake a yindlu ya ka Jakobe yi ta fumela a tshomba yabye.
18A yindlu ya ka Jakobe yi tava nzilo, a yindlu ya ka Josefa yiva langavi, kanilezi a yindlu ya Esau yi tava byanyi go woma; va ta yi hisa va yi mbheta, ku nga ta pona ni munwe ka yindlu ya Esau, hakuva Jehova i wulile lezo.
19A va le Dzongeni va ta fumela a xitsunga xa Esau; lava va le mikoveni va ta fumela a maFilistia. Va ta fumela a tiko ga Efraime ni tiko ga Samaria; na Benjamini i ta fumela a tiko ga Gileade.
20A vakhonwi va yimpi ya ka Israeli, lava va nga le wukhumbini, va ta fumela a tiko ga Kanani kala le Zarefate; ni vakhonwi va le Jerusalema lava va nga le Sefarade va ta ti tekela a miti ya tlhelo ga Dzonga.
21A vahanyisi va ta kanziha a xitsunga xa Zioni, kasi ku ta lamula xitsunga xa Esau; zonake a mufumo wu tava wa Jehova. Mik. 4:7; Lu. 1:33, 71
Currently Selected:
Obadia 1: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
