Jona 1
1
Jona a vitanwa, a tsutsuma.
1A mhaka ya Jehova yi lota ka Jona nʼwana Amittai, yiku:
2Suka, uya Niniva, a mutini lowu wa hombe, u ya wu kanelela, hakuva a kubiha ka wona ku chikele mahlweni ka mina. Gen. 10:11; 18:20
3Kanilezi Jona i lo suka a tsutsuma aya Tarxixi, kule ni nghohe ya Jehova. I lo relela le Joppa, a ya kuma a taru gi nga lava kuya Tarxixi; i lo rihela a pfhumba gakwe, a enghena tarwini, kasi kuya zinwe navo le Tarxixi, a suka mahlweni ka Jehova.
4Kanilezi Jehova i lo vuxa a mheho ya hombe lomu bimbini, ku vuka a bhubhutsa ga hombe lomu bimbini, a taru gi ku khwatsi go lava ku panzeka.
5Zonake a vamarinyero va lo chava, a munwe ni munwani a rila ka nungungulu wakwe; va lo hoxetela a zibya lezi zi nga hi lomu tarwini kasi ku gi hehukisa. Kanilezi Jona i lo relela lomo tarwini, a ya baramela kona, a etlela wurongo ga ntamu. Miti. 27:18
6Lezo a nwinyi wa taru i loya kakwe, aku kakwe: Hikuyini u etlelako wena? Vuka u khongela ka Nungungulu wa wena, kutani i ta hi alakanya kasi hi nga lovi.
7Va lo rambana xikari kabye, vaku: A hi hlahluveni, kasi ha tiva loyi a hi vangelako a khombo legi! Va lo hlahluva, a tihlolo ti si khoma Jona.
8Zonake vaku kakwe: Hi nga hi byela, himani a hi vangelako a khombo legi? A ntiro wa wena i ntiro muni? U humela kwihi? A tiko ga nwina hi gihi? U lixaka muni?
9Yena aku kabye: Nzi muHeberu; nzi chava Jehova, a Nungungulu wa matilo, loyi a mahileko a bimbi ni misava.
10A vavanuna lavo va lo khomiwa hi hlenekera, vaku kakwe: Za kuyini u zi mahileko? Hakuva a vavanuna lavo va lo zi tiva lezaku i lo tsutsuma mahlweni ka Jehova, hi lezi i wa va byelile.
11Zonake vaku kakwe: Hi ta ku mahela yini kasi ha fela kuva ni malenga? Hakuva a bimbi gi wa engetelana ku vindluka hi ntamu.
12Yena aku kabye: Nzi tlakuleni, mu nzi hoxa lomu bimbini, kasi ma fela kuva ni malenga; hakuva nza zi tiva lezaku mu vukelwa hi bhubhutsa legi ga hombe hi kota ya mina.
13Kanilezi a vavanuna va lo bonza makasiya hi ntamu va tlhelela muhanzeni, kanilezi a va zi kotangi, hakuva a bimbi gi engetelana ku va vindlukela.
14Hikwalaho va lo rila ka Jehova, vaku: Jehova ha ku kombela lezaku u nga hi lovisi hi kota ya wutomi ga wanuna loyi, u nga hi rwexi a nkhata wu nga hiko na nanzu: hakuva wena Jehova u mahile a kuranza ka wena.
15Zonake va lo tlakula Jona, va mu hoxa bimbini, ni bimbi gi lo rula,
16A vavanuna lavo va lo mu chava nguvu Jehova, va mu mahela miphahlo ni zifungo.
Currently Selected:
Jona 1: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
