Mika 7
7
A zionho za ka Israeli.
1I khombo ka mina! hakuva nzi kotisa a simu legi a mihanzu ya gona yi phophilweko, ni xivina lexi a mauva ya xona ma kolelweko; a ka hi na xitata xa mauva lexi xi nga giwako, hambu ni mihanzu yo ranga ya kuwu leyi nzi yi ranzako. Mat. 21:19
2A vanhu va nene va nyamalele misaveni, ku hava loyi a lulamileko xikari ka vanhu. Vontlhe va xiyelela ku halata nkhata, a munwe ni munwani i hlota nakulobye hi tlhamu.
3A mandla yabye ma tlharihile ku maha zobiha. Hosana yi kombela, zinyikiwo, ni mulamuli i ranza ku xavelelwa; a wahombe i wulawula a, kumbilukela ka mbilu yakwe, lezo va hlengela ku tlavinyela timhaka.
4A wa nene wa kona ka yontlhe i fanana ni xigetlwani, ni leyi a hunzeleleko kululama i fanana ni khuhu ga mizwa, Gi tshinele a siku ga tsayiselelo wa wena, legi gi wulilweko hi varinzeli va wena, makunu ku tava ni vilinganya.
5Mu nga tsumbeni vanghana, mu nga veki kutsumba ka nwina ka maxaka. Valele loyi a etleleko xifuveni xa wena a tinyangwa ta nomu wa wena.
6Hakuva a mufana wa kanyisa a raru wakwe, a nhanyana a vukela a nyine wakwe, ni katamwane i vukela a nwingi wakwe; a valala va munhu hi va yindlu ya ka kabye. Mat. 10:35; Lu. 12:53
Nungungulu a tlhatlhisa Israeli.
7Kanilezi mina nzi ta cuwuka ka Jehova, nzi langutela a Nungungulu wa kuhanyiswa ka mina; a Nungungulu wa mina i ta nzizwa.
8Nala wanga, u nga tsakeli a khombo ga mina! Hambu loku nziwa, nzi ta tlhela nzi vuka; loku nzi tshamile munyameni, Jehova i tava kuwonekela ka mina.
9Nzi ta rwala a zanga ya Jehova, hakuva nzi mu onhele, a kala a yimela a mhaka ya mina a nzi lamula. I ta nzi humesela kuwonekeleni, nzi wona a kululama kakwe.
10A valala va mina va ta zi wona, vawa tingana, lava va nge ngalo: I kwihi Jehova a Nungungulu wa wena? A mahlo ya mina ma ta tsaka a kuwoneni kabye, hakuva va ta kanzihelelwa khwatsi i nzhope ya lomu tindleleni.
11Hi siku ga kuaketwa ka makhurisi ya wena a mimbhingano ya wena yi ta tshinetwa kule.
12Hi siku lego va tata ka wena a va le Assiria, ni va le mitini ya le Gipite, ni kusukela Gipite kala Congweni, kusukela bimbini kuya ka ginwani bimbi, ni kusukela xitsungeni kuya ka xinwani xitsunga.
13Kanilezi a tiko gi ta hahlulwa hi kota ya vaaki va gona, ni mihanzu ya zimaho zabye.
Nungungulu a tsetselela Israeli.
14Hisa a vanhu va wena hi nhonga ya wena, va nga tiyivu ta tshomba ya wena ti tshamileko toce khwatini ga le Karmeli. A ti gele Baxani ni Gileade khwatsi hi masikwini ya kale. Mitse. 23:9; Deut. 33:28
15Nzi ta ya kombisa a zilo zi hlamalisako khwatsi hi masikwini ya kuhuma ka wena hi le Gipite.
16A vamatiko va ta zi wona, vawa tingana hi kota ya ntamu wabye wontlhe; va ta ti khoma milomu, vata tindleve.
17Va ta laza a tshuri kukotisa a nyoka; vata huma makhokholeni yabye kota zikokakoka za misava na va rurumela; va tata ka Jehova Nungungulu wa hina hi kudzevetana, va ta ku chava.
18Hi wihi a Nungungulu loyi a fananako na wena, loyi a tsetselelako kubiha, a rivalelako a zihambunyeto za misalela ya tshomba yakwe ke? Wena a ku zangari kala kupinzuka, hakuva wa tsaka ku zwela wuxinji. Ekso. 15:11; Jer. 10:6; Miti. 10:43
19U ta tlhela u hi zwela wusiwana, u kanzihela a zigoho za hina; u ta hoxa zontlhe zionho za hina bimbini.
20U ta tsumbeka ka Jakobe, Abrahama u mu mahela Wuxinji legi u nga gi hlambanyela a vadadani va hina kaleloko.
Currently Selected:
Mika 7: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
