Mika 6
6
Jehova i na ni mhaka na Israeli.
1Zwanani makunu lezi Jehova a nge ngalo: Yima, u wulawula mahlweni ka zitsunga, u zwata a gezu ga wena ka miganga!
2Nwina zitsunga, zwanani a keco ya Jehova, na nwina ziseketelo zi tiyileko za misava; hakuva Jehova i na ni mhaka ni vanhu vakwe, i ta ranisa Israeli.
3Tiko ganga, xini nzi ku maheleko? Xini nzi ku rerileko ha xona? Nzi byele!
4Hakuva nzi ku humesile tikweni ga Gipite, nzi ku tirula ndlwini ya wukhumbi, nzi ku rangela mahlweni hi va Mosi na Aroni na Miriamu.
5Tiko ganga, alakanya a makungo ya Balake a hosi ya le Moabi, ni lezi Balaami a nʼwana Beore a mu hlamuleko zona, ni lezi zi nga humelela kusukela Xittimu kala Gilgale, kasi ma fela ku tiva a mitiro yi lulamileko ya Jehova. Mitse. 22:1—23:1; Jox. 2:1
Lezi zi labyiwako hi Jehova
6Nzi taya na nzi hi ni yini mahlweni ka Jehova, nzi ya ti koramisa mahlweni ka Nungungulu a tlakukileko? Nzi ta tshinela kakwe na nzi hi ni minyikelo ya kuhiswa, ni marole ya lembe ginwe ke?
7Jehova i ta xalaliswa hi makume mazana ya tihamba, kutani hi mazanazana ya micongo ya mafura ke? Nzi ta nyikela a matewula ya mina hi zihambunyeto za mina, ni mbhanzu wa miri wa mina hi kota ya kuonha ka muhefemulo wa mina ke?
8Wena munhu, u tiyisilwe zinene; ni lezi Jehova a zi lavako ka wena, hi lezaku u maha leʼza kululama, u ranza wuxinji, ni ku famba hi kutikoramisa zinwe ni Nungungulu wa wena. Deut. 10:12
9A gezu ga Jehova gi huwelela mutini, loyi a tlharihileko i ta chava a vito ga wena! Zwanani hi nhonga ni loyi a yi leleteleko.
10Ta hi kona a titshomba to biha lomu ndlwini ya wakubiha, ni tipimo li hungulilweko leli li rukilweko ke?
11Nzi ngava loyi a lulamileko loku nzi vumela a xikalo xo kanganyisa, ni kwama wu nga ni ziringaniso zi khohlisako ke?
12Hakuva a vafumileko va muti va tele hi tihanyi, ni vaaki va wona va wulawula mawunwa, ni tirimi tabye mbakhohlisi milonwini yabye.
13Hi kota ya lezi nzi ta kuba a mbanga yi hlokisako, nzi ku hahlula hi kota ya zionho za wena.
14U taga, kanilezi u nga ta xura; yi ta ala yi zwala a ndlala nzeni ka wena. U ta rwala a tshomba, kanilezi yi nga ta pona; lezi u ta nga zi ponisa nzi ta zi nyikela supado.
15U ta byala, kanilezi u nga ta tshovele; u ta kamela maoliva, kanilezi u nga ta tola mafura ya kona; u ta kamela mauva, kanilezi u nga tanwa a vinya ga kona. Deut. 28:30, 38; Zef. 1:13; Hag. 1:6
16Hakuva u hlayisa a zilayelo za Omri, ni matirela wontlhe ya yindlu ya ka Ahabi, u famba hi tindlela tabye. Hikwalaho nzi ta ku hahlula, a vaaki va wena va hlekulwa; zonake u ta rwala a nzhukano ya vanhu va mina. 1 Tih. 16:25, 26, 30-33
Currently Selected:
Mika 6: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
