Mikosi 4
4
A zanga ya Jehova hehla ka Jerusalema.
1Yi hunzulukisile kuyini a nzalama yi nga hatimako?
A nzalama leyi yi ringilweko yi hunzulukisile kuyini?
A maribye ya wutshamu ga kubasa ma hangalasilwe mahanzakanyeni wontlhe ya maruwa.
2A vana va zikududu va le Zioni va fananako ni nzalama yi hlutilweko,
Hikuyini va hlayiwako kota maguwana ya wumba, wu nga ntiro wa mandla ya muwumbi?
3Hambu ni mahlolwa ma humesa mavele, ma anwisa a vanana va wona;
Kanilezi a nhanyana wa tiko ga mina i na ni lunya khwatsi timbuwu ta lomu xiwuleni.
4A lirimi la xihlangana li namarele malakalakeni hi kota ya tora;
A zisumbi zi kombela zakuga, kanilezi a nga kona ni munwe a zi phamelako.
5Lava va nga hanya hi malongo, vafa lomu maruweni,
Lava va nga wundliwa hi tinguwo ta lisima, va ti khumbareta lomu mataleni.
6Hakuva a xionho xa nhanyana wa tiko ga mina xa hombe ku hunza xionho xa Sodoma,
Loyi a nga lobyiswa hi xitshuketi, na a nga tlhatekiwangi mandla ya munhu.
7A vahombe vakwe va wa basile ku hunza gapongo, va hi vo basa ku hunza masi,
A mimiri yabye yi wa pswhukile ku hunza makoral, a hlonge yabye yi wa ku khwatsi i safira.
8Makunu a tinghohe tabye ta ntima ku hunza khala, a va tibyiwi lomu maphangweni;
A hlonge yabye yi namarele marambyini yabye, yi womile yi woma ku fanana ni lihunyi.
9Lava va nga dawa hi supado i chukwana ku hunza lava va fako hi ndlala.
Hakuva va jomoloka hi ku vumala zakuga za lomu masinwini.
10Hambu ni vavasati va wuxinji va bhikile a vavana va vona venyi,
Kasi va maha zakuga zebye xikhatini xa kulobyiswa ka nhanyana wa tiko ga mina. Levi 26:29; Deut. 28:53; 2 Tih. 8:29
11Jehova i mbhetisile a khulo gakwe, i chulule a zanga yakwe yo tshisa;
I dzivele a nzilo le Zioni, lowu wu hisileko a ziseketelo za gona.
12A tihosi ni vaaki vontlhe va mi sava a va kholwangi
Lezaku a valala ni vavengi va ta zi kota ku enghena tinyangweni ta Jerusalema.
13Zi mahekile hi kota ya zionho za vaprofeti ni zigoho za vapristi,
Lava va nga halata a nkhata wa valulamileko xikari ka gona. Mat. 23:35
14Va pepetseka lomu maruweni khwatsi zikhumu, va nyenyezisile hi nkhata,
Laha kaku a vanhu a va zi koti ku khumba a tinguwo tabye.
15Sukani! ku wa wuliwa kabye. A mu hlazekangi! Sukani, sukani, mu nga va khumbi!
Ina, va tsutsumile, va pepetseka;
A vamatiko vaku ha vona: Ngha va nga kumi wuakelo! Levi 13:45
16A nghohe ya Jehova yi va hangalasile, a nga ha va khataleli;
Va wa nga hi na xichavo ka vapristi, a va zwelangi wuxinji a zikhosana.
17A mahlo ya hina ma rerekela mahala hi ku cuwukela ku kutani hi ta kuma kuvuniwa,
Kurinzeleni ka hina hi rinzele a tiko legi gi nga zi kotiko ku hi hanyisa.
18Va xiya kufamba ka hina, lezaku hi nga dzuki hi fambafamba maruweni ya hina.
A kugumelwa ka hin, ku tshinele, a masiku ya hina ma mbhelile, hakuva a kugumelwa ka hina ku chikele.
19A vahlongolisi va hina va wa hatlisa ku hunza magama ya le tilweni.
Va wa hi hlongolisa zitsungeni, va hi juma lomu xiwuleni.
20Loyi a totilweko hi Jehova, loyi a nga hi kuhefemula ka hina, i phasilwe marinzini yabye;
Loyi hi nga wula ha yena hiku: Hi ta hanyela nzhutini wakwe xikari ka matiko. 2 Tih. 25:5
21Tsaka u nengela, wena nhwana wa Edome, loyi u akileko tikweni ga Uzi;
Wenawu u ta hiwa a gombe, u ta popiwa, u tirunzuwulela tinguwo u sala ximbyiri.
22A tsayiso wa zigoho za wena wu hetekile, wena nhwana wa Zioni;
A nga ta ha ku yisa wukhumbini.
Wena nhwana wa Edome, a kugoha ka wena ku ta tsayisiwa;
Jehova i ta vumbulula a zionho za wena.
Currently Selected:
Mikosi 4: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
