Joxua 13
13
A tixaka ti avelwa a tiko.
1Makunu Joxua i wa khosahele, ni kuva ni malembe yo tala, Jehova a ku ngalo kakwe: Wena u wa kale, u na ni masiku ya kutala, kanilezi ka ha sele a tiko ga hombe, legi gi fanelako ku khoziswa.
2A tiko legi gi seleko hi legi: Hi wontihe matikwana ya maFilistia, ni wontihe ya ka Gexure, 1 Sam. 27:8
3kusukela Xihori, legi gi nga mahlweni ka Gipite, kala le mbhinganweni wa le Ekroni hi le Nwalungu, a tiko legi va nge ngalo ga maKanani; a tiko gi nga ni ntlhanu wa tihosi ta maFilistia, ya Gaza, ya Axdodi, ya Axkeloni, ya Gati, ya Ekroni, ni tiko ga maAvi;
4hi le Dzongeni, gontlhe tiko ga maKanani, ni Meara legi gi nga ga maSidoni, kala le Afeka, ni ku kala le mbhinganweni wa vaAmori;
5ni tiko gontlhe ga vaGebale, ni gontlhe ga Lebanoni hi le Mutsuwuka-gambo, kusukela le Baal-Gadi, hi le basi ka xitsunga xa Hermoni, ni ku kala le nyangweni ya Hamati;
6ni vontlhe vaaki va le zitsungeni kusukela le Lebanoni, kala le Misrefot-Maime; ni vontlhe vaSidoni nzi ta va hlongola mahlweni ka vanana va ka Israeli. Avela lawo matiko hi ku hlahluva, gi tava tshomba ya Israeli khwatsi hi lezi nzi ku leleteleko.
7Makunu lezi avela a tiko legi hi ku hlahluva, gi tava tshomba ya 9 wa tinyangwa, ni khihlanya ga nyangwa ya ka Manasa.
8Va ka Rubeni ni va ka Gadi, va lo amukela a tshomba yabye leyi Mosi, a nanza ga Jehova, a nga va nyika le tlhatuko wa Jordani, hi le Mutsuwuka-gambo, Mitse. 32:33; Deut. 3:12
9kusukela le Aroera legi gi nga mbhirini wa xicongwana xa Amoni, ni kusukela mutini lowu wu nga xikari ka nkova, ni lontlhe libala la Medeba kala le Diboni;
10ni miti yontlhe ya Sihoni, a hosi ya maAmori, leyi yi nga wa fumela Hexboni, kala le mbhinganweni wa vanana va ka Amoni,
11ni Gileade, ni tiko ga ka Gexure, ni va ka Makati, ni xontlhe xitsunga xa Hermoni, ni gontlhe Baxani, kala le Saleka;
12ni wontihe mufumo wa Ogi le tikweni ga Baxani, loyi a fumileko le Axtarote ni Edrei, a nga yena a seleko wa va ka Refaime, laha Mosi a nga va khozisa, a va hlongola.
13Kanilezi a vanana va ka Israeli a va khozisangi va ka Gexure ni va ka Makati. Hikwalaho Gexure na Makati va akile xikari ka vaIsraeli kala inyamutlha.
14Ntsena lezaku a lixaka la ka Levi a nga va nyikangi a tshomba; a tshomba yabye hi miphahlo leyi yi hiselwako Jehova Nungungulu wa ka Israeli, khwatsi hi lezi a va byelileko. Deut. 10:9; Ezek. 44:28
15Zinghaho Mosi i lo nyika ka lixaka la ka Rubeni a xiavelo xabye hi mingango yabye.
16A tiko gabye gi wa sukela le Aroera le mbhirini wa xicongwana xa Amoni, ni kusukela mutini lowu wu nga xikari ka nkova, ni libala lontlhe, kusuhani ni le Medeba,
17Hexboni ni yontlhe miti ya kona hi le libaleni; Diboni, Bamoti-Baali, Beti-Baali-Meoni,
18Jahaza, Kedemoti, Mefati,
19Kiriataima, Sibma, Zeret-Xahare, le xitsungeni xa nkova;
20Bet-Peori, ni minzhelelo ya le Pisga, ni Bet-Jeximote;
21ni yontlhe miti ya lomu mikoveni, ni tiko gontlhe ga Sihoni, a hosi ya maAmori, loyi a nga wa fumile le Hexboni, loyi Mosi a nga mu khozisa zinwe ni tihosi ta le Midiani, ni Evi, ni Rekama, na Zuri, na Hura, na Reba, a tihosi leti ti nga wa fumelwa hi Sihoni, ti nga wa akile lomo tikweni.
22Na Balami a nʼwana wa Beori loye a nga hi xitumbe, a vanana va ka Israeli va lo mu daya hi tlhari; zinwe ni vanwani lava va delweko.
23A mbhingano wa vanana va ka Rubeni wu waku kala le Jordani hi le mbhirini ya kona. Leyi hi yona tshomba ya vanana va ka Rubeni hi mingango yabye, hi miti ni zimitana zabye.
24Na Mosi i lo nyika ka lixaka la ka Gadi, a vanana va Gadi, a tshomba yabye hi mingango yabye.
25A tiko gabye ku wa Jezera, ni yontlhe miti ya le Gileade, ni khihlanya ga tiko ga vanana va ka Amoni, kala le Aroera legi gi cuwukeneko na Raba.
26Ni kusukela le Hexboni kala le Ramat-Mizpa, ni le Betonima, ni kusukela Mahanaime kala mbhinganweni wa Debira,
27ni le minzhelelweni, Bet-Harama, ni Bet-Nimra, ni Sukote, ni Zefoni, yi nga misalela ya tiko ga Sihoni a hosi ya Hexboni; ni Jordani wu wa hi mbhingano wa kona kala magumo ga Bimbi ga le Kinerota, hi le tlhatuko ka Jordani, hi le Mutsuwuka-gambo.
28Leyi hi yona tshomba ya vanana va Gadi, hi mingango yabye, ni miti ni zimitana za kona.
29Na Mosi i lo nyika ka khihlanya ga lixaka la ka Manasa, a vanana va Manasa a tshomba yabye hi mingango yabye;
30a tiko gabye hi legi: Kusukela le Mahanaime, gontlhe Baxani, ni tiko gontlhe ga Ogi, a hosi ya le Baxani; ni yontlhe miti ya Jaira leyi yi nga le Baxani; yontlhe yi wa hi 60 wa miti.
31Ni khihlanya ga Gileade, ni le Axtarote, ni le Edrei, a miti ya tiko ga Ogi le Baxani; yi nyikilwe ka vanana va Makira, a nʼwana wa Manasa, a khihlanya ga vanana va Makira, hi mingango yabye.
32Leti hi titshomba leti Mosi a nga avela le mikoveni ya Moabi, le tlhatuko wa Jordani, ngomama ni Jeriko, hi le Mutsuwuka-gambo.
33Kanilezi a lixaka la ka Levi, Mosi a nga Va nyikangi a tshomba. Jehova Nungungulu wa ka Israeli i tshomba yabye, kota lezi a wulileko kabye.
Currently Selected:
Joxua 13: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
