Joxua 1
1
Jehova a wulawula ka Joxua.
1Makunu laha Mosi a nanza ga Jehova a nga file, Jehova i lo wulawula ka Joxua nʼwana Nuni, a nanza ga Mosi, aku: Ekso. 24:13; 33:11
2A nanza ga mina Mosi i file; hikwalaho suka wena u ya tlhatuka loyi Jordani, wena ni vontlhe lava vanhu, mu ya enghena a tikweni legi nzi nyikileko a vanana va ka Israeli.
3Gontlhe wutshamu lego gi ta kanzihelwa hi mikonzo ya nwina, nzi mu nyikile gona, khwatsi hi lezi nzi byelileko Mosi.
4Kusukela le xiwuleni ni legi Lebanoni, kala congweni wa hombe, a congo wa Eufrate, gontlhe tiko ga maHiti, kala le ka Bimbi ga Hombe, hi le Mupela-gambo, gi tava tiko ga nwina. Ekso. 23:31; Mitse. 34:2
5A ku kona munhu loyi a ta nga tiya a yima mahlweni ka wena ka wontihe masiku ya wutomi ga wena; khwatsi hi lezi nzi nga hi na Mosi, nzi tava na wena, cima nzi nga ta ku tsika, hambu ni ku ku siya.
6Tiyisa mbilu, uva ni ntamu, hakuva hi wena u ta nga avela lava vanhu a tiko legi nzi hlambanyileko ka vararu vabye a ku va nyika gona.
7Ntsena tiyisa mbilu, uva ni ntamu, u chivirika ku lanzela milayo yontlhe leyi Mosi a nanza ga mina a ku leleteleko; u nga hambuki ka yona uya xineneni, hambu xibhabheni, kasi wa fela ku humelela ka zontlhe lezi u ta nga zi maha.
8A bhuku legi ga nayo gi nga dzuki gi hi kule ni nomu wa wena, kanilezi u ta gi alakanya mumu ni wusiku, u ti karata ku maha zontlhe lezi zi tsalilweko ka gona, kasi wa fela ku humelela ba tontlhe tindlela ta wena, u tshameka.
9Xana a nzi ku leletelangi, nziku: Tiyisa a mbilu, uva ni ntamu: u nga chavi, u nga tsemeki hlana; hakuva Jehova Nungungulu wa Wena i zinwe na wena kontlhe lomo u ta ngava kona.
10Zonake Joxua i lo leletela a tinduna ta vanhu, aku:
11Fambani lomu magovelweni mu leletela vanhu, muku: Longisani timbuva, hakuva anzhako ka masiku manharu mu ta tlhatuka Jordani mu ya khozisa a tiko legi Jehova Nungungulu wa nwina a mu nyikileko gona a ku gi fumela. Joxua a wulawula ka tlawana wa va ka Israeli.
12Na Joxua i lo wulawula ka va ka Rubeni ni va ka Gadi, ni ka khihlanya ga nyangwa ya ka Manasa, aku:
13Alakanyani lezi Mosi, a nanza ga Jehova, a mu leleteleko tona, zo ngalo: Jehova Nungungulu wa nwina i mu nyikile kuhumula, i mu nyikile legi tiko;
14vasati va nwina ni vanana va nwina, ni zifuyo za nwina, zi ta sala lomu tikweni legi Mosi a mu nyikileko gona seno tlhatuko wa Jordani, kanilezi nwina mu ta hloma mu famba mahlweni zinwe ni vanakuloni, nwentlhe vavanuna va tinhenha ta kulwa, mu va vuna,
15kala Jehova a nyika vanakuloni a kuhumula kota nwina; va enghenawu a tikweni legi Jehova Nungungulu wa nwina a va nyikileko gona; zonake mu ta wuya tikweni ga nwina mu ta gi fumela, gona tiko legi Mosi, a nanza ga Jehova, a mu nyikileko gona seno tlhatuko wa Jordani, hi le Mutsuwuka-gambo.
16Na vona va lo hlamula Joxua, vaku: Hina hi ta maha zontlhe lezi U hi leletelako zona, hi taya ni kwihi laha u ta nga hi ruma kona.
17Kota lezi hi ingisileko Mosi ka zilo zontlhe, zinghaho hi ta ku ingisawu. Ntsena lezaku Jehova Nungungulu wa wena ave zinwe na wena, kota lezi a nga wa hi zinwe na Mosi.
18Kani hi wihi a ta nga ala ku maha zileletelo za wena, a nga ingisi timhaka ta wena leti u ta nga hi leletela ka zilo zontlhe, loye munhu i ta dawa. Ntsena lezaku wena u tiya hlana u nga mbheli ntamu.
Currently Selected:
Joxua 1: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
