Jeremia 3
3
1Ve ngalo: Loku a wanuna a hlongola sati wakwe, loye wasati a ti fambela, a ya tekiwa hi munwani wanuna, xana loyi wanuna a nga zi kota ku mu tlhelela kambe ke? A tiko lego gi nga ta swariswa hi ku maha lezo ke? Kanilezi wena loyi u gengileko hi wubhayi ni zigango zo tala, xana u ta tlhelela ka mina, ku wula Jehova. Deut. 24:4
2Tlakusa mahlo ya wena migangeni
Hi kwihi laha wena u nga etleliwiko kona ke?
U tshamele vona le tindleleni, a ku fanana ni muArabia le xiwuleni,
U nyenyezisile tiko hi wubhayi ga wena ni kubiha ka wena. Gen. 38:14
3Hikwalaho a tivula ti beletelwe,
Zonake a vula yo ranga a yi nangi;
Kanilezi a ximombo xa wena xi wa hi xa xibhayi,
Lezaku u nga vumeli kuzwa tingana. Deut. 11:16; Ezek. 3:7
4Ni lezi wa ha rila ka mina, uku: Dada!
U wa hi munghana wa wuswa ga mina.
5Xana i tava ni khulo gakwe kala kupinzuka ke?
I ta simamisa nago kala magumo ke?
Wena u wulile a zakunghahi,
Kanilezi u maha zilo zi bihileko u kala u zi mbhetisa.
6Jehova i lo wula ka mina masikwini ya hosi Josia, aku: Xana u wonile lezi Israeli a wasati loyi a hambukileko a nga zi maha ke? Yena i kanzihile a zitsunga zontlhe zi tlakukileko, ni hasi ka tontlhe tisinya to nyuka, kwalomo i na si hutsetse wubhayini. 2 Tih. 17:10
7Mina nzi wa alakanya nziku: Anzhako na mahile zontlhe lezi i ta wuya ka mina. Kanilezi a nga wuyangi. Makunu Juda, a makabye a nga tsumbekangiko, i lo zi wona.
8Nzi lo wona lezaku hambu lezi nzi nga hlongole Israeli, nzi mu nyika a papilo ga kuhambana hi kota ya wubhayi gakwe, Juda a makabye wakwe loyi a nga tsumbekangiko, a nga chavangi, kanilezi yenawu i lo famba a ya maha gona wubhayi. Deut. 24:1; 2 Tih. 17:18
9Yena i lo nyenyezisa a tiko hi wubhayi gakwe go tshisa, hakuva i lo rembana ni maribye ni zibho.
10Hambu ka zontlhe lezo, Juda, a makabye wakwe loyi a nga tsumbekangiko, a nga wuyangi ka mina hi mbilu yakwe yontlhe, kanilezi hi wukhohlisi, ku wula Jehova.
11Jehova i te ngalo ka mina: Israeli loyi a hambukileko i kombisile kululama ku hunza Juda loyi a nga tsumbekangiko.
12Yana, u ya kanela mahungu laya le Nwalungu, uku: Wuya Israeli, wena loyi u hambukileko, ku wula Jehova. Nzi nga ta ha mu zangarela, hakuva mina nzi na ni tipswalo, ku wula Jehova, nzi nga ta simamisa nzi zangara kala kupinzuka.
13Ntsena u fanele ku vumela a kubiha ka wena, lezaku u tsikile Jehova, a Nungungulu wa wena, na u tsutsumela matlhelo wontihe uya ka vanungungulu va vamatiko a hasi ka tisinya tontlhe to nyuka; a mu ingisangi a gezu ga mina, ku wula Jehova.
14Wuyani, nwina vanana va hluwukileko, ku wula Jehova, hakuva nzi nwinyi wa nwina. Nzi ta mu tekela a munwe ka muti ni muti, ni vambiri ka lixaka ni lixaka; nzi ta mu yisa le Zioni.
15Nzi ta mu nyika varisi va tsakisako mbilu ya mina, lava va ta nga mu gisa hi wutivi ni kupima.
16Laha nwina na mu enzeleka mu tala tikweni ka lawo masiku, ku wula Jehova, cima ku nga ta ha wuliwa kambe hi arke ga xivumelwano xa Jehova; va nga ta ha gi alakanya hambu kuzwa kuhulukela, kambe va nga ta maha ginwani.
17A ka xikhati lexo va ta vitana Jerusalema aku xitshamu xa wuhosi xa Jehova; a matiko wontihe ma ta tsombana le Jerusalema a vitweni ga Jehova; cima va nga ta ba famba hi kunonoha ka timbilu tabye.
18A ka lawo masiku a yindlu ya ka Juda yi ta longoloka zinwe ni yindlu ya ka Israeli; va tata hi wumbiri gabye hi le tikweni ga Nwalungu, vata ka tiko legi nzi nyikileko vararu va nwina a kuva tshomba yabye.
19Nzi waku: Nzi ta ku veka xikari ka vanana va mina,
Nzi ta ku nyika a tiko gi xuvekako,
A tshomba yo saseka nguvu xikari ka matiko.
Nziku: Mu ta nzi vitana, muku: Dadani;
Mu nga ta ha hambuka mu nzi siya.
20Hizinene kota lezi a wasati a mahako wubhemba ngangweni wakwe,
Hizalezo, yindlu ya ka Israeli, mu wa nga tsumbeki ka mina, ku wula Jehova.
21Lomu migangeni ku zwakala a gezu ga zirilo ni kutsikwila ka vana va ka Israeli;
Hakuva vona va bihisile tindlela tabye,
Va rivele Jehova, a Nungungulu wabye.
22Wuyani, nwina vanana va hluwukileko,
Mina nzi ta chuma a kuhambuka ka nwina.
Hi hina valava, hi tile ka wena;
Hakuva wena u Jehova a Nungungulu wa hina.
23Hizinene hi tsumbile mahala a kuhanyiswa loku ku tako hi lomu migangeni,
Ni ngholovanya ya lomu zitsungeni a yi vuni nchumu.
Hizinene a kuhanyiswa ka Israeli kuta hi ka Jehova a Nungungulu wa hina.
24A nungungulu wa tingana i gile ntiro wa vadadani va hina
A ku sukela wusweni ga hina;
A tiyivu tabye ni tihomu ta bye,
A varisanyana vabye ni vanhanyana vabye. Jer. 11:13
25A hi weni hasi tinganeni ta hi na,
Hi fenengela tona;
Hakuva hi onhele Jehova a Nungungulu wa hina,
Hina zinwe ni vadadani va hina kusukela wusweni kala nyamutlha;
A hi ingisangi a gezu ga Jehova a Nungungulu wa hina.
Currently Selected:
Jeremia 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
