Jeremia 2
2
A kuhluwuka ka Israeli.
1A mhaka ya Jehova yi tile ka mina, yiku:
2Yana, kanyuluka tindleveni ta Jerusalema, uku: Jehova i ngalo:
Nza alakanya a wunene ga wuswa ga wena,
Ni liranzo la wena xikhatini xa kuwutiwa ka wena;
Laha u nga kari u nzi lanzela le xiwuleni,
A ka tiko legi gi nga kala gi nga byaliwangi.
3Israeli i wa basiselwe Jehova,
A mbhanzu wo ranga wa kutshovela kakwe;
Vontlhe lava va mu gako va tava ni nanzu,
Va ta humelwa hi khombo, ku wula Jehova. Jak. 1:18
4Ingisani a mhaka ya Jehova, O yindlu ya Jakobe,
Na nwina mingango yontlhe ya ka Israeli.
5Jehova i ngalo:
Xana kubiha muni a vararu va nwina va ku kumileko ka mina ke?
Lezi va tshamako va tsawukene na mina,
Va lanzela zifananiso zi nga vuniko,
Va hunzuka vava lava va nga nyawuliko? 2 Tih. 17:15; Rem. 1:21
6A va wulangi, vaku: I kwihi Jehova,
Loyi a hi humesileko le tikweni ga Gipite,
Loyi a hi rangeleko xiwuleni, lomu tikweni ga zigwangwa ni marinzi,
Hi tsemakanya a tiko gi omileko ni ga nzhuti wa kufa,
A tiko gi nga hi hava vahunzi ni vaaki?
7Nzi lo mu neha a tikweni ga pfuno.
Kasi mu taga mihanzu ya gona ni kunanziha ka gona.
Kanilezi loku mu enghenile ka gona, mu nyenyezisile a tiko ga mina,
Ni tshomba ya mina mu yi mahile manyala.
8A vapristi a va wutisangi, vaku:
I kwihi Jehova ke?
Ni vakhomi va nayo a va nzi tivangi,
A varangeli va lo nzi fularela,
Ni vaprofeti ve profetile ha Baali,
Va lanza lezi zi nga vuniko nchumu. 1 Sam. 2:12; 12:21
9Hikwalaho nza ha ta mu kecara, ku wula Jehova,
Ni kala ka vazukulu va nwina nzi ta va kecara.
10Hi nga pelani muya zihlaleni za Kitimu, mu ya wona;
Rumelani Kedari, mu hlotisisa khwatsi;
Mu wona loku a xilo xa kunghahi xi wa sina xi mahekile.
11Xana ku ngava kona a tiko gi hunzulusileko a vanungungulu va gona,
Hambu lezi va uga hiko vanungungulu ke?
Kanilezi a vanhu va mina va tsikile a wudumo gabye,
Va khozela a nungungulu a nga vuniko nchumu.
12Hlamalani ha zona, O matilo!
Chavani nguvu mu rurumela, ku wula Jehova. Deut. 32:1; Isa. 1:2
13Hakuva a vanhu va mina va mahile a kubiha kumbiri:
Va nzi tsikile, mina loyi nzi nga xibuka xa mati ma hanyako,
Va ti akela mathangi ma nga ni tifa,
Ma nga zi kotiko ku hlayisa mati. Tis. 36:9; Joh. 4:13
14Xana Israeli a ngava khumbi yi xabyilweko,
Kutani khumbi yi pswalilweko lomu ndlwini ke?
Hikuyini a phangiwako ke?
15A tinghalana ti wele hehla kakwe na ti tsewuza hi gezu ga tona,
Ti hanzulela a tiko gakwe, a miti yakwe yi hisilwe ku nga tshami munhu kona.
16Hambu ni vanana va Nofi ni va
Takapanesi va panza a tshavatshava ga wena.
17Xana a ku ti vangelangi ha wece a khombo,
Kota lezi u tsikileko Jehova a Nungungulu wa wena
Laha yena a nga ku rangela ndleleni ke?
18Ni makunu, u fambela yini hi ndlela ya Gipite,
A ku yanwa a mati ya Nilo ke?
U fambela yini hi ndlela ya Assiria,
A ku yanwa a mati ya congo ke?
19Hi kubiha ka wena ku ta nga ku tsayisa,
U biwa hi kukhunguvanyeka ka wena.
Hikwalaho, tiva lezaku zi bihile a ku tsika Jehova, Nungungulu wa wena,
Ni ku nga mu chavi ka vanga kubayiseka, ku wula Hosi, Jehova wa tiyimpi.
20Hakuva hi kale na u tshovile muyoko wa wena,
U phewulela a tingoti ta wena, uku: Nzi nga ha ta tira.
Hakuva u baramile zitsungeni zontlhe zo tlakuka.
Ni lomu hasi ka tontlhe tisinya to nyuka, u maha wubhayi.
21Nzi lo ku byala na u hi sinya yo saseka ya vina,
Ya lixaka li nene;
Hikuyini makunu u hunzukileko u maha sinya ya limbe lixaka ke? Mat. 21:33; Mar. 12:1; Lu. 20:9
22Hambu loku u nga hlamba hi nitro,
U tsutsa sabawu yo tala,
A kubiha ka wena ku ta sala mahlweni ka mina,
Ku wula Hosi Jehova.
23Xana u nga wutisa kuyini, uku:
A nzi nyenyeziswangi,
A nzi lanzelangi Baali?
Hi nga wona a ndlela ya wena le nzhelelweni,
Alakanya lezi u zi mahileko.
Wena u kameli ga mazambo, legi gi tsutsumelako lahaya ni lahaya.
24Wena u fanana ni nkati wa mangwa,
Leyi loku yi chikelelwa hi xikhati xo lava matsune
A ku bhangula ka yona a ya ha tlheliswi hi munhu;
A matsune loku a yi lava a nga ta karala,
I ta yi kuma hwetini ya yona.
25Chela kota lezaku a nkonzo wa wena wu nga lahlekelwi hi xilato,
Ni nkolo wa wena a kuva ni tora.
Kanilezi wena u ngalo: Wa ti karatela mahala,
Hakuva nzi ranza a vanungungulu va vamatiko,
Nza ha ta va lanzela.
26Ku khwatsi hi khamba loku gi kumilwe, gi na ni tingana.
Hilezo a yindlu ya Israeli yi ni tingana,
Zinwe ni tihosi ta yona ni tihosana ta yona,
A vapristi va yona ni vaprofeti va yona,
27Lava va wulako ka dzanza, vaku:
Wena u dadani wa mina,
Vaku ka ribye: Mina nzi pswalilwe hi wena.
Hakuva va nzi fularele, a va nzi cuwukeli;
Kanilezi a xikhatini xa khombo va taku ngalo:
Yima, u hi hlanguta!
28Makunu va kwihi a vanungungulu va wena lava u ti maheleko ke?
Hi nga va tsika va yima, hi wona loku va zi kota ku ku hanyisa xikhatini xa makhombo!
Hakuva a vanungungulu va wena va ringana ni tsengo wa miti ya wena, o Juda. Deut. 32:37; Vala. 10:14
29Mu holova na mina hikuyini ke?
Nwina nwentlhe mu hambunyetile mu vukela mina, ku wula Jehova.
30Nzi bile mahala a vanana va nwina,
A va vumelangi ku kawukiwa.
A supado ya nwina yi khadamule a vaprofeti va nwina,
Khwatsi i nghala yi hlakahlako. 1 Tih. 19:10; Mat. 23:34
31Nwina va xizukulwana lexi, ingisani a mhaka ya Jehova!
Xana nzi wa hi tiko ga xiwula a ka Israeli ke?
Kutani kuva tiko ga munyama?
Hikuyini a vanhu va mina vaku: Hi tlhatlhekile,
Hi nga ta engeta hita ka wena.
32Xana a nhwana a nga rivala a wubombi gakwe ke?
Kutani a muswika ku rivala a nchalachala wakwe?
Kasike a tiko ga mina gi nzi rivele hi kale.
33U tlharihile nguvu ndleleni ya wena ya ku ya hlota liranzo!
Hikwalaho u gonzisile ni vava sati vo biha a tindlela ta wena.
34Ni lomu minzhungweni ya nguwo ya wena ku kumiwa a nkhata
Wa zisiwana lezi zi nga hiko na nanzu,
Lava u nga va kumangiko na va bhoxa a yindlu ya wena,
Kanilezi u va dele, hakuva u ranza a zakunghahi. Ekso. 22:2
35Hambu zi hi tano, u ngalo: Kota lezi nzi nga hava nanzu,
A zanga yakwe yi sukile ka mina. Languta, nzi ta ku kecara,
Lezi u nge ngalo: A nzi onhangi!
36Hikuyini u hatlisako nguvu ku hunzula a ndlela ya wena ke?
Hi Gipite kambe u ta wisiwa tingana
Kotisa lezi u nga wisiwa tingana hi Assiria. 2 Kro. 28:20
37Na zona u ta huma kona na u tlhatekile a mandla ya wena hlokweni,
Hakuva Jehova i alile lava u va tsumbako,
U nga ta humelela ha vona. 2 Sam. 13:19
Currently Selected:
Jeremia 2: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
