Jeremia 4
4
1Loku u hunzuluka, O Israeli, wuya ka mina, ku wula Jehova;
Loku u susa manyala ya wena mahlweni ka mina,
Zonake u nga ta ha nzulanzula kambe.
2Loku u hlambanya hi zinene, ni nongameto, ni kululama.
Uku: Jehova wa hanya Hizinene,
Zonake a matiko ma ta ti katekisa ha yena,
Ma ti kulisa ha yena. Gen. 22:18; Deut. 8:13; 2 Kor. 10:17
3Hakuva Jehova i ngalo ka vavanuna va ka Juda ni ka Jerusalema:
Rimani a mafusi ya nwina, mu nga byali xikari ka mizwa,
4Mahani zitshiva ka Jehova,
Mu susa a dewu ga timbilu ta nwina,
Nwina vavanuna va ka Juda ni vaaki va Jerusalema,
Kasi a zanga ya mina yi nga ta vutsuka kota nzilo,
Wu vura lezaku wu nga timiwi,
Hi kota ya kubiha ka mitiro ya nwina. Deut. 10:16; Rom. 2:28; Kol. 2:11
A nala wa le Nwalungu.
5Byelani Juda, muba hungu le Jerusalema, muku:
Banani mipunzu lomu tikweni, mu kanyuluka muku:
Tsombanani, mu tsutsumela a mitini ya makhokhola.
6Gwimbani nghapa tlhelweni ga Zioni,
Tsutsumani ni tihunzu ta nwina, mu nga yimi;.
Hakuva nza mu nehela a khombo na gita hi le Nwalungu,
Ni lobyiselelo wa hombe.
7A nghala yi humele xihlahleni xa yona, ni muhahluli wa matiko
I sukile wutshanwini gakwe kasi ku hangalasa a tiko ga wena,
A hahlula miti ya wena, lezaku ku nga ha ala munhu ka yona.
8Hikwalaho ti boheni a tinguwo ta tisakwa,
Mu rila ni ku tsikwila;
Hakuva a a zanga yo tshisa ya Jehova a yi sukangi ka hina.
9Ku ta maheka ka lexo xikhati, ku wula Jehova, lezaku a hosi ni tihosana ti ta tsemeka mihlana, ni masingalakati ma ta rewukiswa, a vaprofeti va hlamala.
10Zonake nzi lo wula mina, nziku: Ha, Hosi Jehova, hakunene u khohlisile nguvu a vanhu lava ni Jerusalema, uku: Nwina mu tava ni kurula. Kasike a supado ya va tlhava, va kusuhi ni kufa. 2 Tih. 22:18; Jer. 14:13
11A ka lexo xikhati ku ta byeliwa ka lava vanhu ni ka Jerusalema, ku ngalo: A mheho yo hisa ya le migangeni ya xiwula yite tshonono ni nhanyana wa vanhu va mina, na ku nga hi ku hehera ni ku checheta.
12A xingulu xi tata hi kulaya ka mina. Makunu nzi ta va lamula.
13A nala i tata kota refu,
Ni tikareta takwe ti kota xipupuri;
A mahaxi yakwe ma hatlisa ku hunza magama.
I khombo ka hina, hakuva hi Iovile! Isa. 5:28; Hab. 1:8
14Jerusalema, basisa a mbilu ya wena kubiheni,
Kasi wa fela ku hanyiswa.
A maalakanyo ya wena ya kubiha ma ta tshama na wena kala rini ke?
15Hakuva a gezu ga zwala hi le Dani,
Gi zwata a khombo ni le zitsungeni za Efraime.
16Byelani matiko, mu tivisa Jerusalema,
Lezaku a vavimbezeli vata hi le tikweni ga le kule,
Va huwelela hi magezu yabye a ku vukela a miti ya ka Juda.
17Va mu renzelekele xikari kota a varinzeli va simu,
Hakuva i nzi hluwukile, ku wula Jehova. Lu. 19:43
18A mahanyela ya wena ni mitiro ya wena zi ku vuxele lezi zilo,
Hi wona mbhanzu wa kubiha ka wena,
Kunene wa bava, ka bayisa ni lomu mbilwini.
19Marambu ya mina, marumbu ya mina!
Nzi ni kubayiseka mbilwini ya mina!
A mbilu ya mina ya radlama-ra-dlama,
A nzi zi koti ku miyela;
Hakuva a muhefemulo wa mina wu zwile a xiwuta xa mpunzu,
Ni tihuwa ta tiyimpi.
20Ka biwa hungu hi lobyiselelo hehla ka lobyiselelo,
Hakuva tiko gontlhe gi hahlulwe.
A matenda ya mina ma khungumulwa hi xitshuketi,
Ni mixaxa ya mina hi xikhatanyana.
21Nzi ta wona a nghapa kala rini,
Ni kuzwa a gezu ga mpunzu ke?
22Ihakuva a vanhu va mina va hungukile, a va nzi tivi;
Mbana va zipumbu, na va nga hi na kupima.
Vona va tlharihile a ku maha kubiha,
Kanilezi a va zi tivi ku maha zinene. Rom. 16:19
23Nzi wonile a misava,
Yi wa nga hi na xiwumbeko, yi nga hi na nchumu;
Nzi cuwuka matilo, ma wa nga hi na kuwonekela.
24Nzi lo cuwuka zitsunga, languta, zi wa kari zi rurumela;
Ni miganga yontlhe na yi kari yi ndlengandlenga.
25Nzi lo lunguza, languta ku wa nga hi kona ni munwe munhu;
Ni tontlhe a tinyanyani ta tilo ti wa purumile. Zef. 1:2
26Nzi lo lunguza, languta, a tiko go nona gi wa hunzukile xiwula;
Ni yontlhe a miti ya gona yi wa hahlulwe
Mahlweni ka Jehova, ni mahlweni ka kuhisa ka zanga yakwe.
27Hakuva Jehova i ngalo:
A tiko gontlhe gi ta hahlulwa,
Kanilezi nzi nga ta gi mbhetisela magumo.
28Hi kota ya lezo a misava yi tava ni nkosi,
Ni matilo ya le hehla ma ta boha xilenda;
Hakuva mina nzi zi wulile, nzi sina nzi xuvile lezo;
Nzi nga ta hunzuluka, hambu ku tlhelela nzhako.
29A muti wontihe wu tsutsuma wu chava
Hi kota ya guwa ga vakhileli va mahaxi ni vamawura;
Va fihlala lomu ka tikwara, na va kanziha hehla ka maribye.
Yontlhe miti ya siyiwa, a ku na munhu kona.
30U ta maha yini lezi xana, wena loyi u hahlulweko?
Hambu loku u ambala xiwunguwungu,
U ti bombisa hi wuhati-hati ga nzalama,
Ni loku u sasisa a mahlo ya wena hi antimonio,
Wo ti bombisela mahala.
A zigango za wena za ku nyenya, zi lava ku ku daya.
31Hakuva nzazwa a gezu go fanana ni ga wasati a lunwako,
Na gi tsikwila kota wasati loyi a ha sangulako ku tewula.
I gezu ga nhwana wa Zioni a hefemutekako ni ku nawuluta mandla yakwe,
Aku: Yowe, Nzi file, a vadayi vata!
Currently Selected:
Jeremia 4: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
