Valamuli 16

1Samsoni i loya le Gaza; leyo i lo ya wona a wasati wa xibhayi, a enghena ka yena:

2Ku lo zwala a nduma ka va le Gaza, yaku: Samsoni i tile lomu. Va lo mu ranzela va mu lavelela gontlhe wusiku laha nyangweni ya muti. Va lo miyela gontlhe wusiku, vaku: Ga ha taca, hi ta mu daya manziko,

3Kanilezi Samsoni i lo etlela kala xikari ka wusiku. Zonake i lo vuka a tlemerela a tivati ta nyangwa ya muti ni timhanze ta kona ta timbiri, a ti simula ni tivati ta kona, a zi rwala makatleni yakwe a zi yisa le hehla ka xitsunga lexi xi cuwukeneko ni Hebroni.

4Anzhako ka lezo i lo ranzana ni munwani wasati loyi a nga wa hi le minzhelelweni ya Soreka, a vito gakwe a nga hi Delila.

5Zonake a tihosi ta maFilistia ti lota kakwe ti taku: Mu xengetele, kasi u fela ku tiva laha wu tshamileko kona a ntamu wakwe wa hombe ni laha hi ta nga zi kota ku mu hlula ha kona, kasi hi fela ku mu boha hi mu tshekulela. Munwe ni munwani wa hina i ta ku nyika 1,100 wa maxekeli ya Siliva.

6Delila aku ka Samsoni: Hi nga nzi byela laha wu tshamileko a ntamu wa wena wa hombe, ni laha kaku loku u bohiwa ha kona u nga have na ntamu.

7Samsoni i te ngalo: Loku va nzi boha hi 7 wa tisinga to tsakama, nzi ta rereka nzi fanana ni vanwani vanhu.

8Zonake a tihosi ta maFilistia ti lo neha 7 wa tisinga ta ha tsakamako ka yena, a ta mu boha ha tona.

9Ku wa hi ni vavanuna va nga wa fihlele lomu ndlwini. Delila aku ka Samsoni; Ehe! Samsoni, hi lawa maFilistia. Samsoni i lo bhewula tisinga leto, khwatsi lihinza la xikwenga loku li khumbiwa hi nzilo. Zinghaho a ntamu wakwe a wu tibyiwangi laha wu nga hi kona.

10Delila i te ka Samsoni: U nzi khohlisile u nzi byela wunwa. Nzi byele laha u bohiwako ha kona.

11Yena aku kakwe: Loku nzi bohiwa nguvu hi magota ya maswa lawa ma nga tirangiko nchumu, nzi ta rereka nzi fanana ni vanwani vanhu.

12Delila i lo teka magota ya maswa a mu boha ha wona, aku kakwe: Samsoni, hi lawa maFilistia. A valaveleli va wa hi lomu ndlwini. I lo bhewula magota lawo ma nga bohile mawoko yakwe, khwatsi lihinza.

13Delila aku ka Samsoni: Wa ha nzi khohlisile u nzi byela wunwa. Nzi byele laha u nga bohiwako ha kona. Yena aku: Loku wa nga luka 7 wa miluko ya misisi ya hloko ya mina, u yi lukela ni tingoti leti va lukako ha tona!

14Delila i lo yi luka a yi tiyisa hi mhingu, aku kakwe: Ehe! Samsoni, hi lawa maFilistia! I lo vuka hi lomu wurongweni a hlomula a mhingu lomu ka misisi ni tingoti ta kona.

15Delila aku kakwe: Hi kuyini uku wa nzi ranza, a mbilu ya wena yi nga hi ka mina? Hi nga wona, u nzi khohlisile zikhati zinharu, u nga nzi byeli laha a ntamu wa wena wa hombe wu nga ha kona.

16Hi kota yo tshama a mu karata wontihe masiku hi timhaka takwe, a mu kurumeta, a mbilu yakwe yi lo karateka ga kufa.

17I lo mu byela zontlhe za mbilu yakwe, aku: Hi cima, a nzi se ringiwa a hloko ya mina hi likari, hakuva nzi muNazirita wa Nungungulu, kusukela rumbyini ga mamani wa mina. Hikwalaho loku nzi ringiwa, a ntamu wa mina wu ta mbhela, nzi rereka ku fanana ni vanwani vanhu. Mitse. 6:5

18Laha Delila a nga wona lezaku i mu byelile zontlhe za mbilu yakwe, i lo vitanisa a tihosi ta maFilistia, aku: Ngonani inyamutlha, hakuva i nzi byelile zontlhe zi nga mbilwini yakwe. Zonake a tihosi ta maFilistia ti lo kanziha tiya na ti welele mali mandleni yabye.

19Delila i lo mu etlelisa laha madzolweni yakwe, a vitana munhu a ta mu cinga a miluko ya ntlhanu ni mimbiri ya hloko yakwe, a sangula ku mu xanisa. A ntamu wakwe wu wa mbhelile.

20I te ngalo kakwe: Ehe! Samsoni, Hi lawa maFilistia! I lo vuka hi lomu Wurongweni gakwe, aku: Nzi ta ti ponisa khwatsi hi manwani masiku, nzi ti vikela mandleni yabye; na a nga zi tivi lezaku Jehova i humile ka yena.

21A maFilistia ma lo mu khoma, ma mu xokolela mahlo, ma relela naye le Gaza; va lo mu boha hi tisenga timbiri ta suku. I lo gaya lomu paxweni. Ekso. 11:5; 2 Tih. 25:7

22Kanilezi a misisi ya hloko yakwe yi lo sangula ku kula, khwatsi hi kusanguleni na nga se ku ringiwa.

23A tihosi ta maFilistia ti lo tsombana a ku ta maha a miphahlo ka nungungulu wabye Dagoni; va lo maha miphahlo ya hombe nguvu ni mibuzo, vaku: Nungungulu wa hina i hi nyikile Samsoni a nala wa hina mandleni ya hina.

24Laha a vanhu va nga mu wona, va lo dumisa nungungulu wabye, vaku: Nungungulu wa hina i nyikile a nala wa hina mandleni ya hina, loyi a nga wa xakela a tiko ga hina, loyi a hlaseleko a vanhu va ka hina.

25Laha a timbilu tabye ti nga wa tsaka, va te ngalo: A ku vitanwe Samsoni a ta hi hlekisela. Va lo ya teka Samsoni lomu paxweni a ta va hlekisela, na va mu yimisile laha xikari ka timhanze ta tempeli.

26Samsoni i te ngalo ka mufana loyi a nga wa mu khomile hi canja: Nzi yimise hi laha ka timhanze leti ti tiyisako yindlu nzi khometela tona nzi khegela ka tona.

27A yindlu leyo yi wa tele hi vavanuna ni vavasati. Tontlhe tihosi ta maFilistia ti wa hi konawu; le langweni ku wa tele hi vavanuna ni vavasati, kusuhani ka 3,000; lava va nga tela ku ta wona Samsoni na a va hlekisela.

28Zonake Samsoni i lo vitana ka Jehova, aku: Hosi Jehova, nzi alakanye! Nungungulu nzi nyike ntamu zalezi, nzi ti photela a mahlo ya mina ya mambiri ka maFilistia. Maheb. 11:32

29Samsoni i lo khoma timhanze timbiri leti ti tiyisako a yindlu, a khegela ka tona. A yinwe yi wa hi reveni gakwe ga xibhabha a yinwani na yi hi reveni gakwe ga xinene.

30Samsoni i te ngalo: A nzife ni maFilistia lawa! I lo korama hi ntamu wakwe wontihe, ni yindlu yi lo wela hehla ka tihosi ni vanhu vontlhe lava va nga wa hi lomo. Hikwalaho a kufeni kakwe i lo daya a vanhu vo tala ku hunza lava a nga daya kuhanyeni kakwe.

31Zonake a vamakabye vakwe ni vontlhe vanhu va yindlu ya raru wakwe va lo ta mu teka, va ya mu lahla xilahleni xa raru wakwe Manoa, xikari ka Zora ni Extaoli. I wa lamulile Israeli 20 wa malembe.

Currently Selected:

Valamuli 16: TSC72

Highlight

Copy

Compare