Valamuli 15
15
1Kanilezi anzhako ka xikhati, na va kari va hula mavele, Samsoni i lo enzela sati wakwe na hi ni ximhutana; i te: Nza haya ka sati wa mina lomu ndlwini. Kanilezi a raru wakwe a nga mu vumelangi ku enghena.
2A raru wakwe aku kakwe: Hizinene mina nzi wa alakanya lezaku u mu alile. Hikwalaho nzi mu nyikele ka mupangalati wa wena. A nzisana yakwe a yi sasekangi ku hunza yena ke? Teka yena wutshanwini gakwe.
3Samsoni aku ka vona: Legi khati nzi nga tava ni nanzu ni maFilistia loku nzi va mahela xapi.
4Samsoni i lo famba a ya khomela 300 wa tihlati, a teka minwenge ku ku loku a tlhanganyisile minkila ha mimbiri-mimbiri, a bohelela a nwenge laha matlhanganweni ya minkila.
5Laha na a lumekele minwenge leyo, i lo tsika tihlati ti famba lomu masinwini ya maFilistia ti hisa mimulu ni mavele ma ha yimileko, ni zivina ni masimu ya maoliva.
6A maFilistia ma lo wutisana, maku: Himani a nga maha lezi ke? Vaku: Hi Samsoni a mwane wa va le Timna, hi kota ya ku mu tekela sati wakwe va nyika mupangalati wakwe. Zinghaho a maFilistia ma lo kanziha ma ta hisa nyamayi loye ni raru wakwe.
7Samsoni aku kabye: Lezi mu mahileko lezi, cima nzi nga ta famba nzi nga se phota ka nwina.
8I lo va lamata nenge ni nyonga hi kuhlasela ka hombe. I lo suka laho a ya tshama ka hlohlolo ya ribye ga Etame.
9Zonake a maFilistia ma lo kanziha ma ya gova tikweni ga ka Juda, va tlhatlhasa lomu Lehi.
10A vanhu va ka Juda va lota va taku ngalo: Hikuyini mu hi hlomela matlhari ke? Vona vaku: Hi tela ku ta boha Samsoni, hi mu maha lezi a mahileko ka hina.
11Zonake 3,000 wa va ka Juda va lo relela vaya hlohlorini ya ribye ga le Etame, va yaku ka Samsoni: Kasi wena a ku zi tivi lezaku a maFilistia, mbafumeli va hina ke? Hikuyini u hi mahela za ku nghahi? Yena aku kabye: Nzi mahile ka vona khwatsi hi lezi va mahileko ka mina.
12Vona vaku kakwe: Hi tele ku ta ku boha hi ku nyikela ka maFilistia. Samsoni aku kabye: Hlambanyani lezaku nwina wutsumbu mu nga ta nzi daya.
13Vona va ku ngalo kakwe: Ahihi; hina hi ta ku boha ntsena, hi ku nyikela kabye; cima hi nga ta ku daya. Va lo mu boha hi magota mambiri ya maswa, va huma naye lomu ribyeni.
14Laha a nga chikela le Lehi, a maFilistia ma lo mu hlalela na va mu khinga. A Moya wa Jehova wu lota hi ntamu ka yena, a magota lawa ma nga wa mu bohile mawoko ma lo khwatsi tihinza la wuluva li hiswako hi nzilo, ni ziboho za mawoko yakwe zi lowa.
15I lo kuma a rambu giswa ga hlaya wa mbongola, a gi rola, a hihirita 1,000 wa vanhu ha wona.
16Zonake Samsoni aku:
Hi hlaya wa mbongola nzi mahile a nhulu ni tinhulu;
Hi hlaya wa mbongola nzi dele 1,000 wa vanhu.
17Laha a nga gumesile ku wulawula, i lo hoxa a hlaya lowo. A wutshamu lego i lo gi chula vito ga Ramati-Lehi.
18Zonake i lo woma nguvu hi tora, a rila ka Jehova, aku: U vunile a nanza ga wena ka za ku nghahi, makunu nzi tafa hi tora nzi wela mandleni ya makhuna ke?
19Hikwalaho Nungungulu i lo panza a ribye ga Lehi gi maha nkele, ku huma mati ka gona; i lonwa, a moya wakwe wu wuya, a si kalamuka. Hikwalaho a wutshamu lego gi lo chuliwa a bito gaku i Hlowo ya loyi a rilako; kala ni lezi ya ha hi kona.
20I lo maha mulamuli wa va ka Israeli xikhatini xa maFilistia 20 wa malembe.
Currently Selected:
Valamuli 15: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
