Valamuli 11
11
Jefta.
1Makunu Jefta a muGileade i wa hi nhenha; i wa hi nʼwana wa xibhayi, na a pswalwa hi Gileade.
2A sati wa Gileade i lo mu belekela vana. Laha a vana va sati; wakwe va nga wa kulile, va lo hlongola Jefta, vaku kakwe: U nga taga a tshomba ya yindlu ya raru wa hina, hakuva u nʼwana wa munwani wasati.
3Zonake Jefta i lo tsutsuma a chava vanakulobye, a ya aka le Toba. Ku lo huma a vavanuna va zihunza-milayo, va tsombana ka Jefta va hloma zinwe naye.
4Makunu hi nzhako ka xikhatanyana, a vanana va kaAmoni va lo hlomisa yimpi a ku yalwa ni va ka Israeli.
5Laha a vanana va ka Amoni va nga halwa ni va ka Israeli, a masingalakati ya le Gileade ma lo yela Jefta le tikweni ga le Toba,
6va yaku ka Jefta: Wuya u ta maha murangeli wa hina, kasi hi fela kulwa ni vanana va ka Amoni.
7Jefta i te ngalo ka masingalakati ya le Gileade: Kasi a hi nwina mu nga nzi venga, mu nzi hlongola ni le ndlwini ya dadani ke? Makunu mu tela yini ka mina, lezi mu nga lomu zikaratweni?
8A masingalakati ya le Gileade maku ka Jefta: Hi tlhelela ka wena makunu, lezaku u famba na hina u yalwa ni vanana va ka Amoni. U ta maha hosi ya hina hontlhe vanhu va le Gileade.
9Jefta i te ngalo ka masingalakati ya le Gileade: Lezi mu nzi telako ku yalwa ni vanana va ka Amoni, loku Jehova a va nyikela mandleni ya mina, nzi ta maha hosi ya nwina ke?
10A masingalakati ya le Gileade maku ka Jefta: Jehova a mahe kustumunyu xikari ka hina, loku hi nga mahi kota lezi u wulileko.
11Zonake Jefta i lo famba zinwe ni masingalakati ya le Gileade; a vanhu va lo mu yimisa ku maha hosi ni murangeli wabye. Jefta i lo wulawula tontlhe timhaka takwe mahlweni ka Jehova le Mizpa.
12Jefta i lo rumela mitsumi ka hosi ya vanana va ka Amoni, aku: Nzi lo ku gohela yini, lezi u tako ku talwa na mina lomu tikweni ga mina ke?
13A hosi ya va ka Amoni yi te ngalo ka mitsumi ya Jefta: Hi kota ya lezi, Israeli, a xikhati a nga huma hi le Gipite, i tekile a tiko ga mina kusukela le Amoni kala le Jaboke ni le Jordani. Hikwalaho nzi tlheliseleni hi kurula lawo matiko. Mitse. 21:24
14Jefta i lo engeta a rumela kambe a mitsumi ka hosi ya va ka Amoni;
15yi yaku kakwe: Jefta i ngalo: A va ka Israeli a va tekangi a tiko ga Moabi, ge hambu a tiko ga va ka Amoni. Deut. 2:9, 18
16Hakuva xikhati lexo a va ka Israeli va nga huma hi le Gipite, va lo famba lomu xiwuleni kala va ya chikela Bimbini go Pswhuka, vaya le Kedexe.
17Zonake a va ka Israeli va lo rumela mitsumi ka hosi ya Edome, vaku: Hi vumele hi hunza hi lomu ka tiko ga wena. Kanilezi a hosi ya ka Edome yi lo ala. Va lo engeta kambe va ruma mitsumi ka hosi ya le Moabi; yonawu yi lo ala. Hikwalaho a va ka Israeli va lo tshama le Kadexe. Mitse. 20:14
18Zonake va lo famba lomu xiwuleni, va renzeleka a tiko ga Moabi, ni tiko ga Edome, vata hi tlhelo Mutsuwuka-gambo wa tiko ga Moabi, vaya gova hi le tlhatuko wa congo wa Amoni; a va tluiangi mbhingano wa Moabi, hakuva Amoni hi wona a mbhingano wa Moabi.
19A va ka Israeli va lo rumela mitsumi ka Sihoni a hosi ya vaAmori, yi nga hosi ya le Hexboni, vaku kakwe: Hi vumele hi tsemakanya a tiko ga wena, kala hi chikela ka hina. Mitse. 21:21; Deut. 2:26
20Kanilezi Sihoni a nga vumelangi va ka Israeli ku tlula mbhingano wakwe. I lo tsombanyisa vontlhe vanhu vakwe va ya gova le Jahaza, valwa ni va ka Israeli.
21Kanilezi Jehova Nungungulu wa ka Israeli, i lo nyikela Sihoni ni vanhu vakwe vontlhe mandleni ya va ka Israeli, va va hlasela, va teka a tiko gontlhe legi a vaAmori va nga wa akile ka gona.
22Va lo teka tiko gontlhe ga vaAmori, kusukela le Amoni kala le Jaboke, ni kusukela le xiwuleni kala le Jordani.
23Makunu loku Jehova Nungungulu wa ka Israeli a hlongole vaAmori mahlweni ka vanhu vakwe va ka Israeli, xana a tiko lego gi ngava ga wena hi xigelo muni?
24Kasi u nga ta fumela lezi Kemexi a ku fumisileko ka zona ke? Zinghaho, hinawu hi teka a tiko ga vontlhe lava Jehova Nungungulu wa hina a va hlongoleko mahlweni ka hina.
25Makunu wena hi wena u nga wa nchumu ku hunza Balaki nʼwana Zipora a hosi ya vaMoabi ke? I wa na nga phikizana ni va ka Israeli ke? I wa na ngalwa navo ke? Mitse. 22:2
26Kale na va ka Israeli va akile le Hexboni ni lomu mitini ya kona, ni le Aroera ni lomu mitini ya kona, ni lomu mitini yontlhe leyi yi nga lomu mbhirini ya Amoni, makunu ku hunzile 300 wa malembe; hi kuyini mu nga kala ku gi teka xontlhe lexo xikhati ke?
27Mina a nzi ku onhelangi nchumu; hi wena u nzi vukako hi ku nzi hlomela matlhari u lava kulwa na mina. Jehova a mahe mulamuli nyamutlha, a lamula xikari ka vanana va ka Israeli ni vanana va ka Amoni!
28Kanilezi a hosi ya va ka Amoni a yi ingisangi a timhaka leto ti nga rumelwa hi Jefta.
29Zonake a Moya wa Jehova wu lota hehla ka Jefta. I lo tsemakanya a tiko ga Gileade, ni ga Manasa, a hunza a tsemakanya Mizpa wa Gileade, aya ka vanana va ka Amoni.
30I lo hlambanya ka Jehova, aku: Loku wena u nyikela va ka Amoni mandleni ya mina,
31lexi xi ta nga huma hi laha nyangweni ya yindlu ya mina xi nzi khinga, a siku lego nzi ta nga tlhela hi kurula loku nzi hlulile a va ka Amoni, xwalexo nzi ta maha ha xona a munyikelo wa kuhiswa ka Jehova.
32Zinghaho Jefta i lo hunza a ya ka va ka Amoni a yalwa navo; na Jehova i lo va nyikela mandleni yakwe.
33I lo va hlasela kusukela le Aroera kala le Minnite, a hahlula ni miti ya kona ya 20 kala le Abela-Keramime. Zinghaho a va ka Amoni va lo khoziswa hi va ka Israeli.
34Laha Jefta a nga tlhelela Mizpa le ndlwini yakwe, a nʼwana wakwe wa nhanyana i lota a mu khinga hi tingomana, na a kari a kina, na a ngha a hi yena yece a nwanana wa Jefta; i wa nga hi na nwanana wa mufana, saseka yaloyi wa nhanyana basi. Ekso. 15:20; 1 Sam. 18:6
35Laha Jefta a nga mu wona, i lo hanzula tinguwo takwe aku: Ha, u nzi hlomule nguvu; u munwe wa lava va nzi xanisako. Nzi ahlamile a nomu wa mina ka Jehova, nza tsanzeka ku tlhelisa.
36A nʼwana wakwe aku kakwe: Dada, loku u ahlamile nomu wa wena ka Jehova, nzi mahe kota lezi u wulileko, khwatsi hi lezi Jehova a nga ku photela ka valala va wena, a vanana va ka Amoni.
37A engeta aku ka raru wakwe: Nzi mahele xilo xinwe. Nzi tsike tihweti timbiri nzi fambafamba lomu zitsungeni nzi ya rilela wunhwana ga mina zinwe ni titanga-kulori.
38Yena aku: Famba. I lo mu tsika tihweti timbiri a famba ni vanghana vakwe va ya rilela wunhwana gakwe le zitsungeni.
39Laha tihweti timbiri ti nga wa mbhelile, i lo tlhelela ka raru wakwe. A raru a maha ka yena khwatsi hi lezi a nga wa hlambanyile; i wa nga tivangi wanuna.
40Zonake wu lo maha mukhuwo wa va ka Israeli lezaku lembe ni lembe a vanhwana va ka Israeli va ya tshama mune wa masiku va hlaluka nʼwana Jefta, muGileade.
Currently Selected:
Valamuli 11: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
