Valamuli 10
10
Tola na Jaira.
1A nzhako ka Abimeleki ku lo huma Tola nʼwana Pua wa Dodo, a munhu wa ka Isakari, a hlanguta va ka Israeli. I wa akile le Xamira xitsungeni xa ka Efraime.
2I lo maha mulamuli wa va ka Israeli 23 wa malembe; zonake i lofa a lahliwa le Xamira.
3Anzhako kakwe ku lo huma Jaira, a muGileade. I lo maha mulamuli wa va ka Israeli 22 wa malembe.
4I wa hi ni 30 wa vanana va nga wa khilela 30 wa timbongola, na va hi ni 30 wa miti le tikweni ga le Gileade, yi vitanwa ku Havote-jaira ni lezi. Mitse. 32:41; Deut. 3:14
5Jaira i lofa a lahliwa le Kamoni.
6A vanana va ka Israeli va lo engeta kambe va maha kubiha mahlweni ka Jehova, va khozela maBaali ni maAxtarote, ni vanungungulu va vaSiria, ni vanungungulu va vaSidoni, ni vanungungulu va vaMoabi, ni vanungungulu va vanana va ka Amoni, ni vanungungulu va maFilistia; va fularela Jehova va nga mu khozeli.
7A zanga ya Jehova yi lo vindlukela va ka Israeli, a va nyikela mandleni ya vaFilistia ni ya vanana va ka Amoni.
8Gwalego lembe va lo xanisa a vanana va ka Israeli va va tsimbeketa, 18 wa malembe na va xanisa vontlhe va ka Israeli lava va nga le tlhatukweni wa Jordani, lomu tikweni ga vaAmori, legi gi nga le Gileade.
9A vanana va ka Amoni va lo tlhatuka Jordani va talwa ni va ka Juda ni va ka Benjamini, ni yindlu ya ka Efraime. A vanana va ka Israeli va wa hi hlomulweni wa hombe.
10Zonake a vanana va ka Israeli va lo rila ka Jehova, vaku: Hi ku onhele; hakuva hi lo fularela Nungungulu wa hina, hi khozela maBaali.
11Jehova i te ngalo ka vanana va ka Israeli: Kasi a hi mina nzi nga mu hlanguta mandleni ya vaGipite, ni vaAmori, ni vanana va ka Amoni, ni maFilistia ke?
12A vaSidoni, ni vaAmeleki, ni vaMaoni va lo mu xanisawu; mu lo rila ka mina, nzi mu tlhatlhisa mandleni yabye.
13Kanilezi nwina mu lo nzi fularela, mu nzi tsika, mu ya khozela vanwani vanungungulu. Hikwalaho nzi nga ta ha mu tlhatlhisa kambe. Deut. 32:15
14Fambani mu ya rila ka vanungungulu lavo mu va hlawulileko; a va mu hlangute xikhatini xa zikarato za nwina.
15A vanana Va ka Israeli vaku ka Jehova: Hi onhile; maha ka hina zontlhe u zi wonako na zi ku sasekele. Ntsena lezaku hi hlangute nyamutlha.
16Va lo susa xikari kabye vanungungulu va vamatiko, va khozela Jehova. Jehova a tsetselela va ka Israeli hi kota ya ku wona zikarato zabye.
17Zonake a va ka Amoni va lo tsombana va ya gova le Gileade; a vanana va ka Israeli va tsombana va ya gova le Mizpa.
18A vanhu va le Gileade ni tihosana ta kona, va lo wutisana, vaku: Himani a ta nga sangula ku yalwa ni vanana va ka Amoni? Loye a ta nga sangula, i tava hosi ya vontlhe vanhu va Gileade.
Currently Selected:
Valamuli 10: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
