Genesisi 34
34
A kukhohlisa ka Simeoni na Levi.
1Zonake Dina a nhanyana wa Lea, loyi a nga pswalele Jakobe, i lo huma ku ya wona a vanhanyana va lego tiko.
2Xekemi a nʼwana Hamori a muHivi, a hosi ya tiko, i lo mu wona a mu teka, a etlela naye, a mu xakela.
3A mbilu yakwe yi lo namarela ka Dina, a nhanyana wa Jakobe, i lo mu ranza loyi wa nhanyana, a xalalisa a mbilu yakwe.
4Xekemi i te ngalo ka Hamori a raru wakwe: Nzi tekele loyi nhanyana a maha sati wa mina.
5Jakobe i lozwa lezaku va xakele a nhanyana wakwe Dina; kanilezi i lo miyela a vafana vakwe va kala va wuya hi le tihonwini le mikoveni.
6Zonake ku lo suka Hamori, a raru wa Xekemi, aya ka Jakobe a ku ya wulawula naye.
7Laha a vafana va Jakobe va nga wuya hi le mikoveni na va zi zwile va lo zangara va xaniseka nguvu, hakuva Xekemi i wa mahile kubiha ka Israeli, hi ku etlela ni nhanyana wa Jakobe, lezi zi nga faneliko ku maheka.
8Hamori i te ngalo kabye: A mbilu ya nʼwana wa mina Xekemi yi namarela ka nhanyana wa nwina; hikwalaho nza mu kombela, mu nyikeni a maha sati wakwe.
9Tekanani na hina, mu hi nyika vanhanyana va nwina, nwinawu mu teka vanhanyana va hina.
10Mu ta tshama na hina, ni tiko gi ta lumba nwina; akani, mu xaviseiana, mu fuya ka gona.
11Xekemi i te ngalo ka raru wa Dina, ni ka vamakabye vakwe: Ngha mina nzi kuma thomo mahlweni ka nwina. Wulani, kani hi xihi mu ta nga nzi byela nzi ta mu nyika.
12Vitanani ka mina ni wihi a nzowolo ni xinyikiwo, nzi ta mu nyika kota lezi mu ta nga wula ka mina; ntsena nzi nyikeni a nhwana loyi a maha sati wa mina.
13A vana va Jakobe va lo hlamula Xekemi ni raru wakwe Hamori hi ku va khohlisa, hi kota ya lezi a nga xakela Dina a makabye wabye.
14Va te ngalo kabye: A hi na ku nyikela makabye wa hina ka khuna; hakuva lexo manyala ka hina.
15Kanilezi i chukwana hi vumelana ka tlhelo legi lezaku mu kota hina; va enghena wukwera vontlhe vavanuna xikari ka nwina.
16Zonake hi ta mu nyika a vanhanyana va hina, hinawu hi ta teka a vanhanyana va nwina, hi tshama na nwina, hi maha va tiko ginwe.
17Kanilezi loku mu nga vumeli ku mahiwa mikwera, zonake hi ta teka nʼwana wa hina hi famba.
18A timhaka tabye ti lo xalalisa Hamori, na Xekemi a nʼwana Hamori.
19A jaha lego a gi hlwelangi a ku maha lezo zilo, hakuva i wa mu ranza nguvu nwa Jakobe; na yena i wa hi wahombe lomu ndlwini yontlhe ya raru wakwe.
20Hamori na Xekemi, a nʼwana wakwe, ya loya hubyeni ya muti wabye, va ya wulawula ni vanhu va muti wabye, vaku:
21A vanhu lava va nga kona xikari ka hina mbanhu vo rula, a va ake lomu tikweni, va maha mabhinzu yabye; na mu wona lezaku a tiko legi gi nga mahlweni kabye ga hombe. A hi tekeni a vanhanyana vabye va maha vasati va hina, hinawu hi va nyika vanhanyana va hina.
22Ntsena lezaku lava vanhu va nga vumela ku tshama na hina, hi maha lixaka linwe, loku a vavanuna vontlhe va ka hina va maha mikwera; kota lezi vona va mahileko.
23Xana mitlhambi yabye, ni titshomba tabye, ni tontlhe tihomu tabye zi nga tava za hina ke? A hi vumeleni lezi va zi wulako basi, kasi va fela ku tshama na hina.
24Zonake vontlhe lava va humako hubyeni ya muti wa Hamori, va lo vumela timhaka ta Hamori na Xekemi a nʼwana wakwe; vontlhe vavanuna lava va nga wa akile mutini wakwe va lo mahiwa mikwera.
25Zonake hi siku ga wunharu, laha va nga wa hi le kubayisekeni, vafana vambiri va Jakobe, Simoni na Levi, a vamakabye va Dina, loyi ni loyi i lo teka supado yakwe, va lo ya enghena mutini na va nga tibyiwi, va lo daya vontlhe vavanuna.
26Va lo daya Hamori na Xekemi a nʼwana wakwe hi supado, va lo teka Dina lomu ndlwini ya Xekemi va famba naye.
27A vafana va Jakobe va lo wuya ka lava va va deleko va ta phanga muti, hi kota ya lezi va xakeleko a makabye wabye.
28Va lo phanga tiyivu tabye, ni timbongola tabye, ni zontlhe lezi zi nga wa hi lomu mutini ni za lahandle,
29Va lo phanga ni yontlhe tshomba yabye, ni vontlhe vanana vabye, ni vasati vabye ni zontlhe lezi zi nga hi lomu tindlwini.
30Jakobe i te ngalo ka Simoni na Levi: Mu nzi gisile mihumbo, mu nzi mahile xinyenyeko ka vanhu va tiko legi, ni ka maKanani, ni ka maPerezi, na ha hi vatsongwani; va ta so tsombana va nzi hlasela, nzi lova ni yindlu ya mina.
31Vona va te ngalo: Saseka ku mu maha kota xibhayi a makabye wa hina ke?
Currently Selected:
Genesisi 34: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
