Genesisi 33
33
Esau na Jakobe va zwanana.
1Jakobe i lo tlakusa mahlo yakwe a wona Esau a kari ata ni 400 wa vavanuna. Yena i lo hambanyisa Lea na Rakeli ni malanza ya xisati ya mambiri ni vanana vabye.
2Zonake i lo rangisa mahlweni a malanza ya xisati ni vanana vabye. Lea ni vanana vakwe hi le nzhako, na Rakeli na Josefa hi le nzhako nguvu.
3Yena i lo ranga mahlweni kabye, a korama ntlhanu wa zikhati ni zimbiri, kala a tshinela kusuhani ka nakulobye.
4Esau i lo tsutsuma a mu khinga, a ya mu wukarela lomu nhanweni yakwe a mu pswopswa; va lo rila.
5Esau i lo tlakusa mahlo yakwe, a wona vavasati ni vanana, i te ngalo: Mbamani lava u nga navo ke? I lo hlamula aku: Hi vanana lava Nungungulu hi wuxinji gakwe a nyikileko a nanza ga wena.
6Ku lo tshinela malanza ya xisati ni vanana vabye, va lo ti koramisa.
7Ku lo tshinela Lea ni vanana vakwe va ta korama; hi le nzhako ku lo tshinela Josefa na Rakeli, vonawu kambe va lo ta ti koramisa.
8Esau i te ngalo: U wula yini hi mitlawa leyi nzi tlhangeneko nayo ke? Jakobe aku: Kasi nza kuma thomo mahlweni ka hosi ya mina.
9Esau i te ngalo: Nzi na ni zinyingi, nakulori wanga; lezo u nga nazo a zive za wena.
10Jakobe i lo hlamula aku: Ahihi, loku mina nzi kumile thomo mahlweni ka wena, amukela xinyikiwo xa mina; hakuva nzi wonile a nghohe ya wena kotisa loyi a wonileko a nghohe ya Nungungulu, u nzi amukela hi kurula.
11Maha wuxinji u amukela xinyikiwo xa mina lexi xi nehilweko ka wena, hakuva Nungungulu i nzi mahele wuxinji, ni lezaku nzi na ni zo tala. Yena i lo mu khongotela kala a amukela.
12Esau i te ngalo: A hi sukeni hi famba, nzi ta famba na wena.
13Jakobe i lo hlamula aku: A hosi ya mina ya zi tiva lezaku a vanana va tsongwani, ni lezaku ku tele tihomu ni tiyivu leti ti anwisako; ni loku va ti gula hi siku ginwe, a ntlhambi wontihe wu tafa.
14Ngha hosi ya mina yi ranga mahlweni ka nanza ga yona; mina nzi ta ti hlenga khwatsi, kota kufamba ka tihomu ni kota kufamba ka vanana, nzi kala nzi chikela ka hosi ya mina le Seire.
15Esau i te ngalo: Ngha mina nzi ku siya ni vanwani vanhu va mina. Yena aku ngalo: Hi kota ya yini xana? Zi enele loku nzi kuma thomo mahlweni ka hosi ya mina.
16Zinghaho hi lego siku Esau i lo tlhela a famba le Seire.
17Jakobe i lo suka a famba le Sukote, laho i lo ya aka yindlu yakwe, i lo aka ni maranga ya tihomu; hikwalaho a vito ga lego wutshamu gi lo chulwa ku ngalo hi Sukote.
18Jakobe i lota hi kurula a mutini wa Xekemi, lowu wu nga tikweni ga le Kanani, na hata hi le Padanaramu; i lo gwimba tenda gakwe mahlweni ka muti.
19I lo xava xipetso lexo a nga gwimba a tenda, gakwe ka xona, a humesa a 100 ga makesita ka vanana va ka Hamori, a raru wa Xekemi.
20Laho i lo aka a alati, i lo gi chula ku ngalo hi El-Elohe-Israeli.
Currently Selected:
Genesisi 33: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
