Ezekieli 10
10
1Zonake nzi lo wona a pfhukeni lowu wu nga hi hehla ka tihloko ta makerubima, nzi wona a xilo xo khwatsi i ribye ga safira, na gi woneka kota a xitshamu xa wuhosi.
2Yena aku ka loyi a ambeleko tinguwo ta wukene: Enghena xikari ka maranzani lahasi ka kerubima, u tata mandla ya wena hi makhala ya nzilo lawa ma nga laha xikari ka makerubima, u ma hangalasa hehla ka muti. Nzi lo mu wona na kari a enghena.
3A makerubima ma wa yimile hi tlhelo ga xinene ga yindlu, laha a munhu loyi a nga enghena; ni refu gi lo tata a hubye ya lomu xikari. 1 Tih. 8:10; Isa. 6:4
4Zonake a kungangamela ka Jehova ku lo suka hehla ka makerubima gi ya yima hehla ka nyangwa ya yindlu; ni yindlu yi lo tala hi refu, ni hubye yi wa tele hi kuhatima ka kungangamela ka Jehova.
5A guwa ga tipapa ta makerubima gi lo zwala ni lomu hubyeni ya le handle, giku khwatsi i gezu ga Nungungulu ga Nyamintamu loku a wulawula.
6Laha a nga ruma a munhu loyi a nga ambele tinguwo ta wukene, aku: Oka nzilo lowu wu nga xikari ka maranzani lawa ma ranzelekeleko, xikari ka makerubima. I lo enghena a yima kusuhani ni ranzani.
7A kerubima gi lo nawuluta a woko ga gona laha xikari ka makerubima, giya ka nzilo lowu wu nga hi xikari ka makerubima, gi okela a nzilo a wu chela mandleni ya loyi a nga ambele a tinguwo ta wukene, yena a wu teka a huma.
8Laha ka makerubima ku lo woneka xo khwatsi i woko ga munhu lahasi ka tipapa ta wona.
9Nzi lo wona a mune wa maranzani kusuhani ni makerubima, a ranzani ginwe gi wa hi laha reveni ga kerubima ginwe ni ginwani. A maranzani lawo ma wa hi ya muvala wo fanana ni wa ribye ga krisolite.
10Hi wumune ga wona ma wa fanana, maku khwatsi a ranzani ginwe gi wa hi xikari ka ginwani.
11Loku ma famba, ma wa famba hi matlhelo ya wona ya mune; ma wa nga hunzuluki kufambeni ka wona. Ni kwihi laha a hloko yi nga cuwuka kona, hi laha ma nga famba kona; ma wa nga hunzuluki kufambeni ka wona.
12A mimiri ya makerubima, ni mihlana ya wona, ni mawoko ya wona, ni tipapa ta wona, ni maranzani ya kona, ma wa pomelwe hi mahlo matlhelo wontihe.
13A maranzani lawa nzi lozwa lezaku ma wa vitanwa aku maranzani ma renzelekako.
14A kerubima ginwani ni ginwani gi wa hi ni mune wa tinghohe. A nghohe yo sangula yi wa hi ya kerubima; a ya wumbiri yi wa hi nghohe ya munhu; a ya wunharu yi wa hi nghohe ya nghala; a ya wumune yi wa hi nghohe ya gama.
15A makerubima ma lo tlakuka; nzi wona lezaku ma wa hi zivangwa zi hanyako lezi nzi nga zi wona le congweni wa Kebare.
16Laha a makerubima ma nga famba, a maranzani na wonawu ma wa famba mareveni ya wona. Laha a makerubima ma nga tlakusa a tipapa ta wona ma purumela hehla ka misava, a maranzani ma wa nga suki mareveni ya wona.
17Loku ma yima, a maranzani ma lo yima; ni loku ma tlakukela hehla, na wonawu ma lo tlakukela nawo hehla; hakuva a moya wa zivangwa zi hanyako wu wa hi ka wona.
18A kungangamela ka Jehova ku lo Suka laha nyangweni ya yindlu, ku ya yima hehla ka makerubima.
19Nzi lo wona a makerubima na ma tshambuluta a tipapa ta wona, ma tlakukela hehla ka misava a xikhati ma nga suka, a maranzani na ma hi mareveni ya wona. Ma lo ya yima laha nyangweni ya le Mutsuwuka-gambo ya yindlu ya Jehova; ni kungangamela ka Nungungulu wa Israeli ku wa hi hehla ka wona.
20Hi zona a zivangwa lezi nzi nga zi wona lahasi ka Nungungulu wa Israeli laha congweni wa Kebare; zonake nzi lo zi tiva lezaku makerubima.
21A ginwe ni ginwani gi wa hi ni mune wa tinghohe ni mune wa tipapa, ni zilo zo khwatsi mawoko ya munhu zi wa hi lahasi ka tipapa ta wona.
22A tinghohe ta wona ti wa fanana ni leti nzi nga ti wona le congweni wa Kebare, a tinghohe ta wona hi twaleti, ma wa hi yalawa. A ginwe ni ginwani gi wa famba gi komama mahlweni.
Currently Selected:
Ezekieli 10: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
