Ezekieli 11
11
A masungukati yo biha.
1A moya wu lo nzi tlakusa wu nzi yisa nyangweni ya tlhelo ga Mutsuwuka-gambo ya yindlu ya Jehova, leyi yi cuwukako Mutsuwuka-gambo. Nzi lo wona 25 wa vavanuna na va yimile laha nyangweni; xikari kabye nzi lo wona Jaazania nʼwana Azzura, na Pelatia nʼwana Benaia, va nga tihosana ta tiko.
2Jehova aku ka mina: Nʼwana wa munhu, hi vona vatsemi va xikungo xo biha, lava va nyikako wusungukati ga hava mutini lowu,
3vaku: Makunu a hi xikhati xo aka tiyindlu. Lowu muti i mbita, hina hi nyama.
4Hikwalaho profeta ha vona! Nʼwana wa munhu, profeta!
5Zonake a Moya wa Jehova wu lo wela hehla ka mina, wuku: Wula, uku: Jehova i ngalo: Mu wula lezo, nwina va yindlu ya ka Israeli; mina nza ma tiva a maalakanyo ya timbilu ta nwina.
6Nwina mu anzisile lava va delweko mutini lowu, mu tatile a maphango ya wona hi zirumbi.
7Hikwalaho Hosi Jehova i ngalo: Lava mu nga va daya xikari ka wona, hi yona nyama, a muti hi mbita ya kona; kanilezi nwina nzi ta mu humesa xikari ka wona.
8Mu chava a supado, nzi ta neha supado hehla ka nwina, ku wula Hosi Jehova.
9Nzi ta mu humesa xikari ka muti, nzi mu nyikela mandleni ya vamatiko, nzi wuya nzi mu lamula.
10Mu ta dawa hi supado; nzi ta mu lamula mbhinganweni wa tiko ga Israeli; mu ta zi tiva lezaku nzi mina Jehova.
11A muti lowu wu nga ta kuva a mbita ka nwina, ge hambu nwina a kuva nyama xikari ka wona. Nzi ta mu lamula mbhinganweni wa tiko ga ka Israeli.
12Zonake mu ta zi tiva lezaku nzi mina Jehova, nwina lava mu nga hlayisangiko a zilayelo za mina ni milayo ya mina, kanilezi mu lanzele a milayo ya matiko lawa ma mu ranzeleko.
A zitsumhiso xa kutlheliselwa.
13Laha nzi nga wa profeta, Pelatia nʼwana Benaia i lofa. Zonake nzi lowa hi nghohe nziba huwa hi gezu ga hombe, nziku: Hosi Jehova! u ta lovisa bhi a misalela ya ka Israeli ke? Isa. 10:20; Ezek. 9:8
14A gezu ga Jehova gi lota ka mina, giku:
15Nʼwana wa munhu, a vanakuloni, ina vanakuloni, a maxaka ya wena ni vontlhe va yindlu ya ka Israeli, vontlhe lava a vaaki va Jerusalema va teku kabye: Tshamani kule na Jehova, hi nyikilwe a tiko legi a ku gi fumela.
16Hikwalaho wula uku: Hosi Jehova i ngalo: Hambu lezi nzi va hangalasileko xikari ka vamatiko, nzi va yisa ka matiko manwani, nzi tava wuchavelo gabye a xikhatanyana lomu ka matiko lawa va yileko ka wona.
17Hikwalaho u taku: Hosi Jehova i ngalo: Nzi ta mu hlengeletela hi ka matiko lawa mu nga hangalaswa ka wona, nzi ta mu nyika a tiko ga ka Israeli.
18Va ta wuya ka gona, va susa zontlhe a zilo zi nyenyezileko ni wontihe a manyalataniso ya gona.
19Nzi ta va nyika a mbilu yinwe, nzi chela a moya muswa nzeni ka vona; nzi ta susa a mbilu ya ribye mirini wabye, nzi va nyika a mbilu ya nyama, Jer. 32:39; Zef. 3:9; Miti. 4:32
20kasi va fela ku hlayisa a zilayelo za mina, va gonga a zileletelo za mina, va zi maha. Va ta kuva vanhu va mina, mina nziva Nungungulu wabye. Ekso. 6:7; Deut. 30:9; Jer. 7:23
21Kanilezi lava a timbilu tabye ti Tanzako a zilo zabye zo nyenyeza ni manyalataniso yabye, nzi ta va tlhelisela a mitiro yabye tihlokweni tabye, ku wula Hosi Jehova.
22Zonake a makerubima ma lo tlakusa a tipapa ta wona, a maranzani na ma lanzela mareveni ya wona, ni kungangamela ka Nungungulu wa ka Israeli ku hi hehla ka wona.
23Ni kungangamela ka Jehova ku lo suka xikari ka muti, ku ya yima hehla ka xitsunga lexi xi nga tlhelo ga Mutsuwuka-gambo wa muti.
24A moya wu lo nzi tlakula wu nzi yisa Kaldea hi muwoniso wa Moya wa Nungungulu, a ka lava va nga hi wukhumbini. Zonake a muwoniso lowu nzi nga wu wona wu lo suka mahlweni ka mina.
25Zonake nzi lo hlawutela ka lava va nga hi wukhumbini zontlhe lezi Jehova a nga nzi kombile.
Currently Selected:
Ezekieli 11: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
