Va le Efesusi 2
2
Ku huma kufeni ni ku enghena wutomini.
1Yena i lo mu vuxa, nwina lava mu nga wa file hi zihambuko ni zionho za nwina, Joh. 5:24
2lezi mu nga famba ha zona kale, kukotisa a mahanyela ya misava leyi, mu lanzela a hosana ya mintamu ya lomu ndengelengeni, wu nga moya lowu wu tirako makunu ka lava va nga ingisiko. Kol. 3:6; 1 Joh. 5:19
3Hina hontlhe hi wa kari hi famba zinwe navo a kunaveleni ka nyama ya hina, hi maha a kuranza ka nyama ni ka maalakanyo; hi mahanyela ya hina hi wa hi vanana va khulo khwatsi hi vanwani. Tis. 51:5; Gal. 5:16; Tit. 3:3
4Kanilezi Nungungulu loyi a teleko wuxinji, hi kota ya liranzo lakwe la hombe leli a hi ranzileko ha lona, Rom. 10:12
5i lo hi hanyisa zinwe na Kristu laha hi nga file hi kota ya zihambuko za hina (mu hanyisilwe hi tipswalo). Rom. 5:6; 6:4
6I lo hi vuxa zinwe naye, ni ku hi tshamisa zinwe naye le tilweni ka Kristu Jesu,
7lezaku a zikhatini lezi za ha tako a fela ku kombisa a wukulu ga hombe ga tipswalo takwe, hi wunene gakwe legi a hi maheleko gona nzeni ka Kristu Jesu.
8Hakuva hi kota ya tipswalo mu hanyisilwe hi kukholwa; na ku nga hi kumaha ka nwina, xinyikiwo xa Nungungulu. Rom. 4:16; Fil. 1:29
9A zi kumeki hi mitiro, lezaku munhu a nga ti kulisi. Rom. 3:20
10Hakuva hina hi ntiro wakwe, a ka Kristu Jesu hi vangelwe mitiro yo saseka, leyi Nungungulu a yi longiseleko kale lezaku hi ta famba ha yona. Xip. 1:4
11Hikwalaho alakanyani lezaku a kale mu wa hi vamatiko hi ka nyama. Mu wa vitanwa Makhuna hi vona lava va vitanwako Zitshiva, gi nga wukwera ga nyama gi mahiwako hi mandla. Rom. 2:28
12Alakanyani lezaku hi ka xikhati lexo mu wa hi kule na Kristu, mu wa hi handle ka wusumbulwa ga vaIsraeli, mu wa nga hi na xiavelo ka xivumelwano za xitsumbiso, na mu nga hi na kutsumba, mu nga hi na Nungungulu misaveni. Joh. 10:16; Rom. 9:4, 8; Kol. 1:21; 1 Tes. 4:13
13Kanilezi makunu ha Kristu Jesu, nwina lava mu nga hi kule, mu tshinetilwe hi nkhata wa Kristu. Gal. 3:28
14Hakuva hi yena kurula ka hina yena loyi a nga maha hina vambiri hiva munwe, a khungumula a xipetso xa laha xikari lexi xi nga hi hambanyisile. Mika 5:5
15I fuvisile a nyameni yakwe lezi zi nga vanga wulala, wona nayo wa zileletelo ni mikhuwo, lezaku a vanga hi lava vambiri a munhu munwe muswa ka yena, kuva kona kurula. 2 Kor. 5:17; Kol. 1:22
16I lo hi tlhanganyisa ka Nungungulu hi va miri munwe hi xihambano, na a dele wulala ha xona. Rom. 6:6
17I lo ta kanela kurula ka nwina lava mu nga hi kule, ni kurula ka lava va nga hi kusuhani. Isa. 57:19; Zak. 9:10
18Hakuva ha yena ha zi kota ku enghena hi wumbiri ga hina hi Moya munwe ka Dadani.
19Hikwalaho a ma ha hi vapfhumba ni valuveli, kanilezi mu zisumbulwa zinwe ni vobasa, mu va le ngangweni wa Nungungulu.
20Mu akilwe xiseketelweni xa vapostoli ni xa vaprofeti, Jesu Kristu wutsumbu hi ribye ga magumo. Tis. 118:20; Mat. 16:18; 1 Kor. 12:28; Kuv. 21:14
21A kuaka kontlhe ku ringanyetwa ka yena, ku kula ku maha tempeli yo basa Hosini;
22loyi mu akilweko khatiginwe ka yena, mu maha a yindlu ya Nungungulu le Moyeni. Joh. 17:23; 1 Ped. 2:5
Currently Selected:
Va le Efesusi 2: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
