Deuteronome 19
19
1Laha Jehova Nungungulu wa wena a ta nga lovisa a matiko lawo Jehova Nungungulu wa wena a ku nyikileko tiko ga wona ku gi fumela, laha u ta nga va hlasela u va wutlela zabye, ni loku u akile lomu mitini yabye ni lomu tindlwini tabye, Ekso. 21:15; Jox. 20:2
2wena u ta ti pambulela miti minharu u yi yimisa xikari ka tiko ga wena legi Jehova Nungungulu wa nwina a ku nyikileko ku gi fumela.
3U ta basisa a tindlela ta kona, ni ku panza mbhingano ku maha zipanze zinharu lomu ka tiko legi Jehova Nungungulu wa wena a ku nyikileko lezaku giva tshomba ya wena; kasi ni wihi mudayi a fela ku chavela kona.
4A mhaka ya mudayi loyi a ta nga chavela leyo kasi a fela ku hanya hi leyi: Loye a dayako wakelane wakwe hi mhango, na a nga mu vengangi ka masiku ma hunzileko;
5khwatsi hi loku a munhu a famba khwatini ni wakelane wakwe, a ku ya tsema tihunyi, ni canja gakwe gi tlakusa xihloka ku tsema sinya, ni xihloka xi kunuka lomu ka mbhinyi xiya tsema wakelane wakwe, afa. A munhu loye i ta tsutsumela ka munwe wa leyi miti, a hanya.
6Ku nga taku a muphoteli wa nkhata a mu lanza zangeni yakwe, a mu kuma laha ndleleni loku a pfhuka wu lehile, a mu daya, na kasi lezo i wa nga fanelangi ku dawa, hilezi i wa nga mu vengi wakelane wakwe ka masiku ma hunzileko.
7Hikwalaho nza ku laya lezaku u ti pambulela miti minharu.
8Ni laha Jehova Nungungulu wa wena a ta nga enzelekisa a tiko ga wena, khwatsi hi lezi a hlambanyileko ka vararu va wena, ni ku ku nyika gontlhe tiko a nga wula ku ngalo i ta gi nyika vararu va wena;
9hakuva loku hakunene u hlayisa yontlhe milayo leyi nzi ku leletelako inyamutlha, na u kari u ranza Jehova Nungungulu wa wena, u famba hi tindlela takwe wontihe masiku, zonake u ta engetela yinwani miti minharu ka leyi ya minharu;
10kasi ku nga halatwi a nkhata wu nga hava nanzu a tikweni legi Jehova Nungungulu wa wena a ku nyikileko a kuva a tshomba ya wena, ni lezaku u nga dzuki uva ni nanzu wa nkhata.
11Kasike loku munhu ku hi ku venga wakelane wakwe, a mu xiyelela, a mu vukela a mu daya, zonake a tsutsumela ka munwe wa miti leyi,
12a masingalakati ya lowo muti ma ta rumela vanhu kuya teka loye munhu, va ta mu nyikela mandleni ya muphoteli wa nkhata kasi a fela kufawu. Gen. 9:6; Ekso. 21:12, 14
13U nga mu nyenyeleteli, kanilezi u ta susa a kuhalatwa ka nkhata wu nga hiko na nanzu lomu ka Israeli, kasi wa fela ku tshameka.
14U nga rurisi a mbhingano wa wakelane wa wena, lowu vahombe va nwina va nga wu panza lomu ka tshomba leyi u ta ngaya yi kuma le tikweni legi Jehova Nungungulu wa wena a ku nyikileko kuya gi fumela.
15A munhu munwe a nga ringani ku maha kustumunyu wa kuonha ka munhu, hambu loku a lo maha xionho xa lihi lixaka; a timhaka ti ta tiyiswa hi vakustumunyu vambiri kutani vanharu. Mat. 18:16; 2 Kor. 13:1; Maheb. 10:28
16Loku a kustumunyu wa mawunwa a lumbeta munhu hi ximaho xo biha,
17zonake a vanhu lavo vambiri va holovisanako va ta ya yima mahlweni ka Jehova, ni mahlweni ka vapristi ni Valamuli lavo va ta ngava kona lawo masiku.
18Ni Valamuli va ta hlolisisa a zinene za mhaka leyo, zonake loku a kustumunyu loye a kustumunyile wunwa, a hembela wakelane wakwe,
19zonake mu ta mu maha lezi a nga wa lava lezaku zi mahiwa ka wakelane wakwe, mu susa kubiha xikari ka nwina.
20Kasi vanwani va fela ku zizwa, zonake va chava, va nga ha engeti kambe va maha kubiha ko kota loko xikari ka nwina.
21A tihlo ga wena gi nga mu tsetsi; a wutomi gi ta rihiwa hi wutomi, a tihlo hi tihlo, a tino hi tino, a woko hi woko, a nenge hi nenge. Ekso. 21:23; Mat. 5:38
Currently Selected:
Deuteronome 19: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
