Deuteronome 18
18
1Vapristi ni vaLevi ni vontlhe va nyangwa ya ka Levi, va nga ta kuva na tshomba zinwe ni va ka Israeli; vona va ta kuma kuga kabye lomu ka miphahlo leyi yi hiselwako Jehova ni lezi zi nga tshomba yakwe. Mitse. 18:20; 1 Kor. 9:13
2Cima va nga ta kuva na tshomba xikari ka vamakabye vabye; a tshomba yabye hi Jehova, kota lezi a wulileko ka vona.
3Lezi zi fanelako vapristi, hi lezi zi humako ka vanhu lava va nyikelako miphahlo, hambu loku yi hi homu, kutani i yivu; a mupristi va ta mu nyika a woko ni tihlaya, ni khwiri.
4Ni kambe u ta mu nyika a mihanzu yo ranga ya mavele ya wena, ni ya vinya ga wena, ni ya mafura ya wena, ni woya go ranga ga tiyivu ta wena;
5hakuva Jehova Nungungulu wa wena i mu hlawulile xikari ka tinyangwa tontlhe ta wena a ku yima mahlweni kakwe ni ku tira a ntiro wa ku khozela hi vito ga Jehova, yena zinwe ni vana vakwe kala kupinzuka.
6Loku a muLevi a suka ka muti wo kari lomu a tshamako ka wona lomu ka Israeli, loku a zi ranza i ta vumelwa a kuya wutshanwini lego Jehova a ta nga gi hlawula.
7Yena i ta tira a ntiro wa ku khozela vitweni ga Jehova Nungungulu wa wena, khwatsi hi vamakabye vakwe vontlhe va vaLevi, lava va yimako mahlweni ka Jehova.
8I taga lezi zi ringanako vona, ahandle ka lezi zi tako hi le ka tshomba ya raru wakwe.
9Laha u ta nga chikela ka tiko lego Jehova Nungungulu wa wena a ku nyikileko gona, u nga gonzi mikhuwo yo biha ya matiko lawo. Levi 18:24; 2 Tih. 16:3
10Ngha ku nga kumiwi ni munhu munwe ka wena loyi a nyikelako nʼwana wakwe kutani nhanyana wakwe laha nzilweni, ni loyi a tirako wutumbe, kutani mungoma, ni mulori,
11ni noyi, ni loyi a fembako, ni loyi a vumbako, ni loyi a wutisako tinguluve.
12Hakuva kani hi wihi a mahako lezi zilo, xinyenyeko ka. Jehova, hakuva Jehova Nungungulu wa wena i hlongole matiko lawo hi kota ya kona kubiha loku.
13Wena u ta mbhelela mahlweni ka Jehova Nungungulu wa wena.
14Hi lezi a matiko lawo u ta nga ma hlongola, ma ingisa vangoma ni zitumbe, kanilezi Jehova Nungungulu wa wena a nga vumeli wena a ku maha lezo.
15Jehova Nungungulu wa wena i ta ku vuxela muprofeti wo kota mina xikari ka vamakabye va wena, loyi mu ta mu ingisa. Joh. 1:45; Miti. 3:22; 7:37
16Ku ta maheka khwatsi hi lezi u kombeleko ka Jehova Nungungulu wa wena le Horebe, a siku lego ga mutlhangano, u ngaku ngalo: Ngha mina nzi nga hazwi kambe a gezu ga Jehova Nungungulu wa mina, ni lezaku nzi nga ha woni kambe a nzilo wa hombe, nzi ngafa.
17Jehova i te ngalo ka mina: Va wula zona.
18Nzi ta va vuxela muprofeti wo kota wena xikari ka vamakabye vabye, nzi ta enghenisa timhaka ta mina nonwini wakwe, zonake yena i ta va byela zontlhe lezi nzi ta nga mu leletela zona.
19Loku munhu a nga ingisi timhaka ta mina leti muprofeti a ta nga wula vitweni ga mina, mina nzi ta mu maha a ti hlamulela.
20Kanilezi a muprofeti loye a ta nga ti kukumukisa hi ku wulawula hi vito ga mina, a timhaka leti nzi nga mu leletelangiko ku ti wulawula, ni loku a wulawula hi mavito ya vanwani vanungungulu, a muprofeti loye i tafa.
21Kambe loku u wula mbilwini ya wena ku ngalo: Hi ta yi tivisa kuyini a mhaka leyi yi nga wulwangiko hi Jehova ke?
22Tiva lezaku loku muprofeti a wulawula hi vito ga Jehova, zonake a mhaka leyi yi nga humeleli, leyi hi yona a mhaka yi nga wulwangiko hi Jehova; a muprofeti i wulawulile hi matshanza yakwe; u nga mu chavi. Jer. 28:9
Currently Selected:
Deuteronome 18: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
