Deuteronome 20
20
1Loku wena u hloma yimpi ku yalwa ni valala va wena, loku u wona mahaxi ni tikareta ni vanhu vo tala ku hunza wena, u nga va chavi; hakuva Jehova Nungungulu wa wena i zinwe na wena, yena loyi a ku humesileko tikweni ga le Gipite.
2Loku mu longile a kuya yimpini, a mupristi i tata mahlweni a ta wulawula ka vanhu, aku:
3Ingisa Israeli! Mu longile inyamutlha a kulwa ni valala va nwina! A timbilu ta nwina ti nga mbheli ntamu, mu nga chavi, mu nga rurumeli, hambu ni ku dzukiswa ha vona;
4hakuva Jehova Nungungulu wa nwina i famba zinwe na nwina ku mu lwela ka valala va nwina ni ku mu nyika kuhlula.
5Zonake a tinduna ti ta wulawula ka vanhu, tiku ngalo: Himani a akileko a yindlu yiswa, kanilezi a nga se nga yi nyikelisisa ke? A tlhele a famba kaya kakwe, ku nga taku a yafa le yimpini, zonake a munwani a ya yi teka a yi nyikelisisa.
6Himani a byalileko a xivina, kanilezi a nga se ngaga mihanzu ya xona ke? A tlhele a famba kabye, ku nga taku a yafa le yimpini, zonake munwani a sala aga mihanzu ya xona.
7Himani a wutileko a nhwana, kanilezi a nga se nga mu teka ke? A tlhele a famba kaya kabye, ku nga taku a yafa le yimpini, zonake munwani a sala a mu teka.
8Ni tinduna ti ta simamisa ti wulawula kambe ka vanhu, tiku ngalo: Himani a chavako, a tsemekileko hlana ke? A tlhele a famba kaya kabye, ku nga taku a timbilu ta vamakabye ti nyeka khwatsi hi ya yena mbilu. Vala. 7:3
9Zonake loku a tinduna ti mbhetile ku wulawula ka vanhu, va ta yimisa tinduna ta mabutho to rangela vanhu.
10Loku u chikela kusuhani ni muti a kuva u wu hlasela, u ta wu kombela hi kurula.
11Loku wona wu ku hlamula hi kurula, va ku vulela tontlhe tinyangwa, vontlhe vanhu lavo va nga ka wona va tava mahlonga ya wena, va ku tirela xibalu.
12Kanilezi loku va nga zwanani na wena, va lava kulwa na wena, u ta wu vimbezela.
13Loku Jehova Nungungulu wa wena a wu nyikele canjeni ga wena, zonake wena u ta hlasela vontlhe vavanuna ni tlhari.
14Kanilezi a vavasati ni vanana, ni zifuyo ni zontlhe lezi zi nga lomo mutini, a muphango wontihe wa kona, u ta wu teka wu maha wa wena, uga a muphango wa valala va wena, lowu Jehova Nungungulu wa wena a ku nyikileko.
15U ta mahisa zalezo ka yontlhe miti leyi yi nga kule na wena, leyi yi nga hiko miti ya lawa matiko.
16Kasike loku yi hi miti ya matiko lawa Jehova Nungungulu wa wena a ku nyikileko a kuva tshomba ya wena, u nga siyi hambu ni munhu munwe wa ku hanya. Ekso. 23:32; Jox. 10:40; 11:11
17U ta lovisa bhi a vaHiti, ni vaAmori, ni vaKanani, ni vaPerezi, ni vaHivi, ni vajebusi, khwatsi hi lezi Jehova Nungungulu wa wena a ku leleteleko.
18Kasi ku fela ku kala va nga mu gonzisi a ku maha wontihe manyala lawa vona va mahelako vanungungulu vabye, nwinawu mu onha ka Jehova Nungungulu wa nwina.
19Loku mu vimbezela xikhati xo leha a muti lowu mu lavako ku wu wutla, u nga tsemeleli tisinya hi xihloka; hakuva xinwani xikhati mu taga mihanzu ya kona; hikwalaho mu nga ti tsemi, hakuva a sinya ya le masinwini a hi munhu loyi a fanelweko ku vimbezelwa.
20Kanilezi a tisinya leti u ti tivako ku ngalo a ti giwi, u ta ti tsema u tira ha tona a mitiro ya ku vimbezela a muti lowu u lwako nawo, kala u wu hlula.
Currently Selected:
Deuteronome 20: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
