Deuteronome 17
17
1U nga mu tlhaveli Jehova Nungungulu wa wena a xifuyo xa hombe, hambu xa xitsongwani lexi xi nga ni bawa kutani mbulema, hakuva lezo za yila nguvu mahlweni ka Jehova Nungungulu wa wena.
2Loku a hi kona munhu ka munwe wa miti leyi Jehova Nungungulu wa wena a ku nyikileko yona, kutani ngwanuna, kutani ngwasati, a mahako kubiha mahlweni ka Jehova Nungungulu wa wena hi ku hambunyeta xivumelwano xa yena,
3a khozela vanwani vanungungulu, a khizama mahlweni ka vona, kutani mahlweni ka gambo ni ka hweti, kutani hi ka handla gontlhe ga tilo, lezi mina nzi nga leletelangiko,
4loku a mhaka leyo yi bikilwe ka wena, ni loku u yi zwile, u ta yi wutisisa khwatsi; zonake loku a mhaka yi hi yona, na yi bikilwe, na xionho xa kunghaho xi mahilwe lomu ka vaIsraeli;
5zonake wena u ta humesa loye wanuna kutani loye wasati lahandle ka muti, u ta mu gandla hi maribye loye wanuna kutani wasati, afa. Ekso. 22:20
6Yena i ta dawa hi wukustumunyu ga milomu ya vakustumunyu vambiri kutani vanharu, cima a nga na ku dawa hi nomu wa kustumunyu munwe, Mat. 18:16; Joh. 8:17; Maheb. 10:28
7A mandla ya vakustumunyu hi wona ma ta nga ranga ma tlhateka hehla kakwe ku mu daya, zonake ku lanzela a mandla ya vontlhe vanhu. Hi ku maha lezo mu ta susa lezi zo biha xikari ka nwina.
8Loku ku nehiwa timhaka to karata ka wena, na ti hi timhaka ta kudaya, kutani kubangelana, kutani ta timbanga, a timhaka leti ti vuxako mazolonga lomu mitini ya nwina, zonake u ta suka uya ka wutshamu legi Jehova Nungungulu wa wena a ta nga gi hlawula;
9u taya ka vapristi a va ka Levi, ni ka mulamuli loye a ta ngava kona lawo masiku; uya wutisa, zonake va ta ku byela kulamula ka nongameto;
10na wena u ta maha khwatsi hi lezi va ta nga ku byelisa zona laho ka wutshamu lego Jehova a ta nga gi hlawula, zonake u maha hi zontlhe lezi va ta nga ku byela zona.
11U ta maha kota nayo va ta nga ku leletelisa wona, ni laha va lulamisileko mhaka ha kona, u nga tsiki a gezu legi va ku byelileko gona, u hambuka kuya xineneni hambu xibhabheni.
12A munhu loye a kanyisako, a nga ingisi mupristi loyi a yimisilweko ku khozela mahlweni ka Jehova Nungungulu wa wena, hambu ku ingisa mulamuli, a munhu loye i tafa. U ta susa lezi zo biha xikari ka vaIsraeli.
13Vontlhe vanhu va fela ku zizwa va chava, va nga ha kanyisi.
14Laha u ta nga chikela tikweni legi Jehova Nungungulu wa wena a ku nyikileko gona ku gi fumela ni ku aka ka gona, loku wena u alakanya ku ngalo: Nzi lava ku ti yimisela hosi, kota manwani matiko lawa ma nzi ranzelekeleko; 1 Sam. 8:5
15hi zona, wena u ta ti yimisela a hosi leyi Jehova Nungungulu wa wena a ta nga yi hlawula. U ta teka munwe xikari ka vamakabye va wena, u mu yimisa a kuva hosi hehla ka nwina; kanilezi u nga yimisi a wamatiko, loyi a nga hiko munwe wa vamakabye va wena.
16Ntsena lezaku a nga ti longiseli a mahaxi yo tala, hambu ku zwanana ni Gipite kasi kuva ni mahaxi yo tala; hakuva Jehova i te ngalo ka nwina: Mu nga ha tlheli kambe muya hi ndlela leyo. 1 Tih. 10:26, 28; Isa. 31:1
17Ni kambe a nga teki vasati vo tala, ku nga taku a mbilu yakwe yi hambukiswa; hambu ni ku hlengeletela a nzalama ni siliva yo tala.
18Ni laha a ta nga tshama xitshanwini xa wuhosi, yena i ta tsala a nayo lowu lomu ka bhuku, kota lezi wu tsalilweko bhukwini legi gi tshamako ni vapristi va ka Levi.
19Yena i ta tshama nago, kasi a fela ku gonza lomu ka gona a masiku wontihe ya kuhanya kakwe, lezaku a gonza ku chava Jehova Nungungulu wakwe, ni ku hlayisa a timhaka ta lowu nayo ni zileletelo za kona, a zi maha;
20kasi a mbilu yakwe yi nga ti kukumukisi hehla ka vamakabye vakwe, ni lezaku a nga hambuki nayweni, aya tlhelo ga xinene hambu a tlhelo ga xibhabha, kasi yena wa fela ku engetelwa a masiku yakwe lomu mufunweni wakwe, yena ni vana vakwe lomu xikari ka va ka Israeli.
Currently Selected:
Deuteronome 17: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
