2 Va le Korinte 5
5
1Hakuva ha zi tiva lezaku loku wu hahluka a xaxa wa miri wa hina, yi nga yindlu ya hina ya misava, hi na ni yindlu leyi yi akilweko hi Nungungulu, leyi yi nga akiwangiko hi mandla, ya pinzukelwa le tilweni. Fil. 3:21; Maheb. 11:10; 2 Ped. 1:13
2Hakuva hakunene ha keta hi kunavela lezaku hi ambala a yindlu ya hina ya le tilweni; Rom. 8:23
3hakuva loku hi yi ambele, zonake hi nga ta kumiwa na hi hi zimbyiri. Kuv. 3:18
4Hizinene, hina lava hi nga ka lowu xaxa ha keta ni ku binzwa; na ku nga hi lezaku hi ranza a ku tlumulelwa tinguwo, kanilezi hi ranza ku ambaliswa, kasi lezi zi fako zi fela ku mitiwa hi kuhanya. 1 Kor. 15:53
5Makunu loyi a hi tirileko a kuva hi ringana lexi xilo hi Nungungulu, loyi a nga hi zimela seve hi Moya. Isa. 29:23; Rom. 8:23; Efe. 1:14
6Hikwalaho hi tiyilehlana xontlhe xikhati, na hi tiva lezaku loku ha ha tshamile mirini lowu, hi le kule ni Hosi,
7hakuva hina hi famba hi kukholwa, a hi fambi hi kuwona. 1 Kor. 13:12
8Nzi ngalo: Hi tiyilehlana, na hi ranza a kuva hi rura a mirini, hi ya tshama kaya zinwe ni Hosi. Fil. 1:23
9Hikwalaho ha xuva nguvu a ku yi tsakisa, hambu hi hi kona mirini kutani hi humele ka wona.
10Hakuva hina hontlhe hi yimelwe hi ku wonekeliswa kota lezi hi nga zona mahlweni ka xitshamu xa kulamula xa Kristu; kasi munwe ni munwani a fela ku amukela lezi zi ringanako lezi a zi mahileko na a ha hi mirini, kutani zo saseka hambu zi hi za kubiha. Kuv. 22:12
A ntiro wa ku tlhanganyisa vanhu ni Nungungulu.
11Hikwalaho kota lezi hi tivako a kuchaveka ka Hosi, ha khongotela vanhu a ku kholwa, kanilezi Nungungulu wa zi tiva lezi hi nga zona; nza tsumba lezaku ha tibyiwa kambe livalweni la nwina.
12A hi tlheli hi ti dzunza ka nwina, kanilezi hi mu nyika xikhati xa kuva mu ti dzunza hi kota ya hina, kasi mu fela zi tiva ku hlamula lava va ti kulisako hi nghohe, na ku nga hi mbilu.
13Hakuva loku hi hungukile, hi hungukele Nungungulu; hambu loku hi hi ni kupima ku nene, hi nako hi kota ya nwina. Xip. 11:1
14Hakuva a liranzo la Kristu la hi kurumeta, kota lezi hi alakanyako ku ngalo: Munwe i lo fela vontlhe, hikwalaho vontlhe va file. Rom. 5:15
15Yena i lo fela vontlhe kasi lava va hanyako va nga ha ti hanyeli wutsumbu, kanilezi va hanyela loyi a ngafa a tlhela a vuka hi kota ya vona. 1 Ped. 4:2
16Hikwalaho a ha ha tivi munhu hi ka nyama; hambu lezi hi nga mu tiva Kristu hi ka nyama, makunu a ha ha mu tivisi lezo. Mat. 12:50
17Hikwalaho loku munhu a hi ka Kristu, ximahwa xiswa; a za kale zi hunzile, zi mahile ziswa. Isa. 43:19; Kuv. 21:5
18Kanilezi zontlhe lezi zita hi ka Nungungulu, loyi a hi tlhanganyisileko naye hi Kristu, a hi nyika a ntiro wa kutlhanganyisa,
19hakuva Nungungulu i wa hi ka Kristu loku a tlhanganyisa tiko zinwe naye, lezaku a nga ha va hlayeli a zihambuko zabye; makunu i hi nyikile a mhaka ya kutlhanganyisa. Isa. 43:25; Rom. 3:25
20Hikwalaho hina hi mitsumi ya Kristu, hi Nungungulu a mu khongotelako ha hina; ha mu khongotela hi kota ya Kristu, ngha mu tlhanganyiswa ni Nungungulu. Mal. 2:7; Efe. 6:20
21Hakuva loyi a nga kala a nga ku tivi kuonha, Nungungulu i lo mu maha xionho hi kota ya hina; lezaku ha yena hi fela kuva kululama ka Nungungulu. Isa. 53:6, 9; Jer. 23:6; Rom. 1:17; Gal. 3:13; Fil. 3:9; Maheb. 7:26
Currently Selected:
2 Va le Korinte 5: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
