1 Pedro 3

A tifanelo ta vasati ni ta vanuna.

1Hizalezo na nwina vasati, ingisani vanuna va nwina; lezaku kasi hambu loku va hi kona lava va nga ingisiko mhaka, va fela ku kokiwa hi mahanyela ya vasati vabye hi handle ka mhaka; Mat. 18:15; 1 Kor. 7:16

2na va wona a mahanyela ya nwina ya kubasa zinwe ni xichawo.

3A kubomba ka nwina ngha mu nga bombi hi lahandle hi ku luka misisi, ni ku bomba hi zilo za nzalama, kutani hi ku ambala tinguwo; 1 Tim. 2:9

4kanilezi ngha mu bombisa a munhu loyi a fihlilweko wa mbilu, hi tinguwo leti ti nga boliko ta moya wa kurula ni kuolova, lowu wu nga ni tsengo wa hombe mahlweni ka Nungungulu. Tis. 45:13; Rom. 2:29; 7:22

5Hakuva a kale a va bombisa lezo a vavasati va kubasa, lava va nga tsumba Nungungulu, va ingisa vanuna vabye.

6Kota lezi Sara a nga ingisa Abrahama, a mu vita aku i hosi yakwe; loyi mu nga vana vakwe makunu loku mu maha zinene, mu nga dzukiswi hi nchumu. Gen. 18:12

7Hizalezo na nwina vanuna, tshamani ni vasati va nwina hi ku chela kota, na mu tiva lezaku a wasati xibya xa wukheta, mu va dzunza kota lezi va nga zigatshomba-kuloni ya tipswalo ta wutomi, kasi a mikhongelo ya nwina yi nga tsanzekiswi. Mat. 5:23

A livalo li nene.

8Hi kugumesa, ngha nwina nwentlhe mu hi ni mbilu yinwe, mu zwelana, mu ranzana ni vamakabye, mu hi ni wuxinji, mu ti koramisa. Rom. 12:10; Fil. 3:16; Kol. 3:12

9Mu nga tlheliseli a kubiha hi kubiha, hambu ku tlhelisela a nzhukano hi nzhukano; kanilezi katekisani vanhu, hakuva mu vitanelwe lezo, lezaku mu taga a tshomba ya kukateka. Mat. 5:39

10Hakuva:

Yena loyi a lavako a kuva a tsakela wutomi

Ni ku wona a masiku ya kusaseka,

Ngha a tsimbetela a lirimi lakwe ka za kubiha,

Ni milomu yakwe lezaku yi nga wulawuli kukhohlisa. Tis. 34:12; Jak. 1:26

11Ngha a fularela a za kubiha, a maha kusaseka;

A lave kurula, a ku lanzela. Isa. 1:16, 17

12A mahlo ya Hosi ma cuwuka a valulamileko,

Ni tindleve ta yona ti kangatele mikombelo yabye;

Kanilezi a nghohe ya Hosi yi tsuvile ka vona lava va mahako kubiha. Joh. 9:31

13Xana himani a ta nga mu mahela kubiha loku mu pangamela lezi za zinene ke?

14Kanilezi mu katekile loku mu xaniseka hi kota ya kululama; mu nga chavi a kudzukisa kabye, hambu ni ku karateka. Isa. 8:12, 13; Mat. 5:10, 11, 12

15Dzunzani Kristu kota Hosi timbilwini ta nwina; na mu longile ku hlamula hi kurula ni xichawo ni wihi munhu loyi a mu wutisako hi xigelo xa kutsumba ka nwina, Kol. 4:6

16na mu hi ni livalo li nene, kasi va fela ku telwa hi tingana hi lezi va mu hlevako ha zona, lava va rukatelako a mahanyela ya nwina ya ma nene ka Kristu. Tit. 2:8; Maheb. 13:18

17Hakuva i chukwana a kuva mu xaniseka hi kota ya ku maha kusaseka, loku Nungungulu a ranza lezo, ku hunza a ku xaniseka hi kota ya kubiha.

18Hakuva na Kristu i lo xaniseka kanwe hi kota ya zionho; yena loyi a lulamileko i lo xanisekela lava va nga lulamangiko, kasi a fela ku hi yisa ka Nungungulu; na a dayilwe nyameni, i lo hanyiswa hi ka moya; Rom. 8:11; Kol. 1:21; Maheb. 9:26

19lowu a nga famba ha wona a ya kanela ka mimoya leyi yi nga hi makhotsweni, Isa. 42:7

20leyi a kale yi nga kala yi nga ingisi, laha Nungungulu a nga rinzela hi lihlaza-mbilu a masikwini ya Noa, na ka ha akiwa a taru, legi ku nga hanyiswa ha gona matini a ntlhanu wa vanhu ni vanharu ntsena, Gen. 6:3; 7:7; Maheb. 11:7

21a ku fanana ni mati lawa ma mu hanyisako makunu hi kubapatizwa, na ku nga hi ku susa a chaka ga miri, kanilezi hi ku kombela a livalo li nene ka Nungungulu, hi kuvuka ka Jesu Kristu; Rom. 10:10; Efe. 5:26

22loyi a yileko tilweni, a ya tshama reveni ga xinene ga Nungungulu; a tingelosi ni tihosi ni mintamu na zi vekilwe a lahasi kakwe. Tis. 110:1; Rom. 8:28; 1 Kor. 15:24

Currently Selected:

1 Pedro 3: TSC72

Highlight

Copy

Compare