1 Va le Korinte 7
7
Timhaka ta kutekana ni ku tsika sati.
1Xungetano ni timhaka leti mu nga nzi tsalela, nzi ngalo: A wanuna i maha khwatsi loku a nga khumbi wasati,
2kanilezi hi kota ya wubhayi, ngha wanuna munwe ni munwani a hi ni sati wakwe, ni wasati munwe ni munwani a hi ni nuna wakwe. Mav. 5:19
3Ngha wanuna a nyika ka sati wakwe lezi zi faneleko; zinghaho ni wasati ka nuna wakwe. Ekso. 21:10; 1 Ped. 3:7
4A sati a nga fumeli miri wakwe, sine nuna wakwe; zinghaho ni nuna wa kona, a nga fumeli miri wakwe, sine a sati.
5Mu nga tsonani, saseka loku mu vumelana hi xikhati xo kari, kasi mu fela ku ti nyikela kukhongeleni, mu tlhela mu tlhangana kambe, lezaku Satani a nga mu ringi hi kuhluleka ka nwina a ku ti khoma. 1 Tes. 3:5
6Kanilezi nzi wulile lezi hi ku mu tsetsa, na ku nga hi kulaya. 2 Kor. 8:8; 11:17
7Kasike mina nzi waku ngha vanhu vontlhe vaku khwatsi hi mina. Ahembalokoke, munhu ni munhu i nyikilwe xinyikiwo xakwe xi mu faneleko na xi nyikiwa hi Nungungulu; a munwani hi tshamela legi, ni munwani hi legiya. Mat. 19:12; Miti. 26:29; Xip. 9:5
8Kanilezi ka lava va nga tekangiko, ni va nga tekwangiko, ni ka tinoni, nzi ngalo: Zi va sasekele loku va tshama kota mina. Vesi 26
9Kanilezi loku va nga zi koti ku ti khoma, a va teke ni ku tekiwa; hakuva i chukwana a ku teka hambu ku tekiwa a ku hunza a kuswa hi kunavela. 1 Tim. 5:14
10Kanilezi nza laya lava va tekeneko, na ku nga hi mina, kanilezi hi Hosi, nzi ngalo: A wasati ngha a nga suki nuneni wakwe, Mal. 2:14, 16; Mat. 5:32; Lu. 16:18
11(kanilezi loku a suka ngha a tshama a nga tekiwi, kutani a tlhela a zwanana ni nuna wakwe;) ni wanuna ngha a nga tsiki a sati wakwe.
12Kanilezi a ka vanwani nza wula mina, na ku nga hi Hosi, nziku: Loku a hi kona makabye a nga ni sati loyi a nga kholwiko, a nga dzuki a mu tsika, loku a sati a ranza ku tshama naye.
13Ni wasati loyi a nga ni nuna a nga kholwiko, a nga dzuki a mu tsika, loku a ranza ku tshama naye.
14Hakuva a wanuna loyi a nga kholwiko i basisilwe hi kota ya sati wakwe, ni wasati loyi a nga kholwiko i basisilwe hi nuna. Loku zi wa nga hi lezo ngha vanana va nwina va nga hlazekangi, kasike lezi va basile. Mal. 2:15
15Kanilezi loku a suka loyi a nga kholwiko, a suke; a makabye wa xi-i na kutani wa xisati a va khungwangi hi timhaka ta kunghaho, hakuva Nungungulu i hi vitanele ku hanya kuruleni.
16Hakuva wena wasati, u zi tiva hikuyini lezaku u ta hanyisa a nuna wa wena ke? Na wena wanuna, u zi tiva hikuyini lezaku u ta hanyisa a sati wa wena ke? 1 Ped. 3:1
17Ntsena lezaku munhu ni munhu a hanye kota lezi a Hosi yi mu nyikileko zona, ni laha Nungungulu a mu vitanileko ha kona. Nzi laya lezo mabandleni wontihe. 2 Kor. 11:28
18Loku munhu a vitanilwe na hi xitshiva, ngha a nga mahi nkhuna. Loyi a vitanilweko na hi nkhuna, ngha a nga engheni wukwera. Miti. 15; Gal. 5:2
19A wutshiva a hi nchumu, ni wuhkhuna a hi nchumu; a xa hombe hi ku hlayisa a milayo ya Nungungulu. Joh. 15:14; Gal. 6:15; Kol. 3:11; 1 Joh. 2:8
20A munwe ni munwani a simamise ka tshamela lego a vitanilweko na a hi ka gona. Efe. 4:1; 2 Tes. 3:11
21Loku u vitanilwe na u hi khumbi, u nga karateki ha gona; kanilezi loku u zi kota ku tlhatlheka, hlawula lezo. Isa. 58:6; Gal. 3:28
22Hakuva loyi a vitanilweko hi Hosi na hi khumbi, mutirulwa wa Hosi; zinghaho ni loyi a vitanilweko na a tlhatlhekile, i khumbi ya Kristu. Gal. 5:13; Efe. 6:6; 1 Ped. 2:16
23Mu xabyilwe hi ntsengo, mu nga dzuki mu maha tikhumbi ta vanhu. Levi 25:42; 1 Ped. 1:18
24Vamakabye, ngha na munhu ni munhu a simamisa mahlweni ka Nungungulu ka tshamela legi a nga vitanwa na hi ka gona.
25Makunu hi xungetano ni vanhwana, a nzi na nayo wa Hosi; kanilezi nzo luleka khwatsi hi munwe loyi a tsumbekileko, kota lezi nzi kumileko wuxinji ga Hosi. 2 Kor. 8:8, 10; 1 Tim. 1:12, 16
26Hikwalaho nza alakanya mina, hi kota ya kukarateka ka nguva leyi, lezaku zi sasekile ka munhu a kuva a simamisa ka tshamela lego a nga ka gona.
27Loku u bohilwe ka wasati, u nga lavi ku tlhatlheka. Loku u nga hi ha sati, u nga lavi sati.
28Kanilezi loku u teka, a ku onhi; ni loku a nhwana a tekiwa, a nga onhi. Kanilezi a va kunghahi va ta karateka nyameni, mina nza va xanisekela.
29Kanilezi nza mu byela vamakabye a xikhati xi komile, kusukela lezi ngha lava va nga ni vasati va hanyisa ku khwatsi a va navo; 1 Ped. 4:7
30ni lava va rilako vaku khwatsi a va rili; ni lava va tsakako vaku khwatsi a va tsaki; ni lava va xavako vaku khwatsi a va na nchumu;
31ni lava va tirisako a za misava vaku khwatsi a va zi tirisi nguvu; hakuva a matshamela ya misava leyi ma hunza. Tis. 39:6; Xip. 9:18; Jak. 4:14
32Kanilezi nzi ranza ku ngha mu tlhatlheka kukaratekeni. Loyi a nga tekangiko i chela kota hi zilo za Hosi, lezaku i ta yi nengelisisa kuyini a Hosi. 1 Tim. 5:5
33Kanilezi loyi a nga ni sati i chela kota hi zilo za misava, lezaku i ta nengelisisa kuyini a sati wakwe.
34Hizalezo ku kona kuhambana xikari ka pswatsi ni nhwana. Loyi a nga tekwangiko i chela kota hi zilo za Hosi, lezaku kasi a fela ku basa le mirini ni le moyeni; kanilezi loyi a nga ni nuna i chela kota hi zilo za misava, lezaku i ta nengelisisa kuyini a nuna wakwe. Lu. 10:40
35Nza wula lezi a kuva mu vuneka, na ku nga hi a ku mu khunga hi gota, kanilezi kasi ma famba hi kufaneleko, mu namarela ka Hosi na mu nga tsopetiswi hi nchumu.
36Kanilezi loku a munhu a alakanya lezaku a chela tingana a nhwana loyi a mu tsumbisileko hi ku mu hunzisa a xikhati xakwe xa ku tekiwa, ni lezaku i fanele ku tekiwa, ngha a maha lezi a zi ranzako; a va tekane, a hi kuonha.
37Kanilezi loyi a tiyisileko a mbilwini yakwe, na a nga kurumetwi hi nchumu, kanilezi a hi ni ntamu ku maha kuranza kakwe, loku a pimile mbilwini yakwe a ku hlayisa a nʼwana wakwe wa xisati le kabye, i maha khwatsi.
38Lezoke loyi a nyikelako a nʼwana wakwe wa xisati a kuva a tekwa, i maha khwatsi; ni loyi a nga mu nyikeliko ku tekwa i maha khwatsi nguvu. Maheb. 13:4
39A wasati i bohilwe na a ha hanya a nuna wakwe; kanilezi loku a nuna afa, i tlhatlhekile; a nga tekana ni wihi loyi a mu ranzako, ntsena ku mahiwa Hosini. Deut. 17:3; Rom. 7:2; 2 Kor. 6:14
40Kanilezi mina nza alakanya lezaku i tava a katekile loku a tshamisa zalezo. Kambe nza kholwa lezaku na minawu nzi na ni Moya wa Nungungulu.
Currently Selected:
1 Va le Korinte 7: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
