1 Va le Korinte 15
15
A kuvuka ka vafileko.
1Vamakabye, nza mu alakanyisa hi ivangeli leyi nzi nga kanela ka nwina, leyi mu nga yi amukela, leyi mu yimileko ka yona, Rom. 5:2
2leyi mu hanyisilweko ha yona, loku mu hlayisisa a timhaka leti nzi nga yi kanela ha tona ka nwina, loku mu nga kholwangi mahala. Rom. 1:16; Gal. 3:4
3Hakuva a mhaka ya hombe nzi nga mu fayela yona, leyi minawu nzi nga yi amukela, hi lezaku Kristu i lo fela zionho za hina kota lezi yi wulako mitsalo; Gen. 3:15; Tis. 22:15; Isa. 53:5; 1 Ped. 2:24
4ni lezaku i lahlilwe, a tlhela a vuka hi siku ga wunharu, kota lezi yi wulako mitsalo: Tis. 2:7; 16:10; Isa. 53:10; Hos. 6:2
5ni lezaku i lo woneka ka Kefasi, zonake ka vakhume ni vambiri; Lu. 24:34; Joh. 20:19
6zonake i lo woneka khatiginwe ka 500 wa vamakabye va hlamusa; a vanyingi va vona va ha hi kona ni lezi, kanilezi a vanwani va hunzile.
7Zonake i lo woneka ka Jakobe, zonake ni ka vontlhe vapostoli; Miti. 1:3
8anzhako ka vona vontlhe i lo woneka ka mina kambe, nzi nga ku khwatsi hi munwe a pswalilweko hi ku handliwa. Miti. 9:4
9Hakuva mina nzi loyi wa tsongwani xikari ka vapostoli, a nzi faneli ku vitanwa aku nzi mupostoli, hakuva nzi lo xanisa a bandla ga Nungungulu. Miti. 8:3
10Kanilezi hi tipswalo ta Nungungulu nzi lezi nzi nga zona, ni tipswalo takwe a nzi nyikiwangi tona mahala; hakuva nzi tirile nguvu ku hunza vona vontlhe; na ku nga hi mina, kanilezi hi tipswalo ta Nungungulu leti ti nga hi zinwe na mina. 2 Kor. 11:23; Gal. 2:8; Efe. 3:7
11Hambu loku ku hi mina kutani hi vona, hi kanela zalezo, zonake mu lo kholwa zalezo.
12Makunu loku ku kanelwa ha Kristu lezaku i vukile hi ka vafileko, va wula hi kuyini a vanwani va nwina lezaku a ku kona a kuvuka ka vafileko ke? 2 Tim. 2:17
13Loku ku hi hava a kuvuka ka vafileko, hambu na Kristu a nga vukangi. 1 Tes. 4:14
14Ni loku Kristu a nga vukangi, zonake a kukanela ka hina mahala, ni kukholwa ka nwina mahala.
15Zonake hi kumiwa na hi hi vakustumunyu va mawunwa va Nungungulu; hakuva hi lo kustumunya ha Nungungulu lezaku i vuxile Kristu, loyi a nga mu vuxangiko, loku hakunene a vafileko va nga vuki.
16Hakuva loku a vafileko va nga vuki, hambu Kristu a nga vukangi;
17ni loku Kristu a nga vukangi a kukholwa ka nwina mahala; nwina ma ha hi zionhweni za nwina. Rom. 4:25
18Zonake ni lava va etleleko ka Kristu va lovile.
19Loku hi tsumbile ka Kristu a kuhanyeni loku ntsena, hi na ni khombo ku hunza vanhu vontlhe. 2 Tim. 3:12
20Kanilezi futsi Kristu i vukile hi ka vafileko, hi yena matewula ya vona lava va etleleko. Miti. 26:23; 1 Ped. 1:3
21Hakuva kota lezi a kufa ku ngata hi munhu, lezo kambe a kuvuka ka vafileko ku tile hi munhu. Joh. 11:25; Rom. 5:12
22Hakuva khwatsi hi lezi vontlhe ya fako hi ka Adamu, hizalezo kambe hi ka Kristu vontlhe va ta mahiwa va hanya.
23Kanilezi munwe ni munwani i ta vuka hi xikhati xakwe; a matewula hi Kristu; zonake lava va nga va Kristu va ta vuka a kuwuyeni kakwe. 1 Tes. 4:15
24Zonake ku chikela magumo, laha a ta nga tlhelisela a mufumo ka Nungungulu Dadani; anzhako ka kuva na a hetisile a kufuma kontlhe, ni wuhosi gontlhe ni mintamu. Dan. 7:14; Joh. 17:2; Efe. 5:27
25Hakuva i yimelwe hi ku fuma a kala a veka a valala vakwe vontlhe lahasi ka mikonzo yakwe. Tis. 110:1; Maheb. 1:13
26A nala wo gumesa loyi a ta nga lobyiswa hi kufa. Maheb. 2:14
27Hakuva Nungungulu i vekile a zilo zontlhe lahasi ka mikonzo yakwe. Kanilezi loku aku: A zilo zontlhe zi vekilwe lahasi ka yena, zi te dlunya lezaku loyi a vekileko zilo zontlhe lahasi kakwe, yena i lehandle ka zona. Mat. 28:18; 1 Ped. 3:22
28Ku taku loku zilo zontlhe zi vekilwe lahasi kakwe, zonake na yena Nʼwana i ta vekiwa lahasi ka loyi a vekileko zilo zontlhe lahasi kakwe, lezaku kasi Nungungulu ava zontlhe ka vontlhe. Mat. 13:41; Joh. 14:28; Xip. 3:23; Efe. 1:10
29Loku zi nga hi lezo, lava va bapatizelwako a vafileko va alakanya yini? Loku a vafileko va nga vuki, va ha bapatizelwa a vafileko hikuyini ke?
30Na minawu hikuyini nzi nga le timhangweni a zikhati zontlhe ke? 2 Kor. 11:26
31Nzafa masiku wontihe, lezo nza tiyisa hi kutidzunza loku nzi nga nako ha nwina ka Kristu Jesu a Hosi ya hina. 2 Kor. 4:10
32Za nzi vuna yini lezaku nzi lwile ni zihari le Efesusi? (na nzi wulawula kota vanhu.) Loku a vafileko va nga vuki, a hi geni, hinwa, hakuva manziko hi tafa. Isa. 22:13; Lu. 12:19; 2 Kor. 1:8
33Mu nga kohliswi; a ku tolovetana ni vakubiha ka bihisa a mahanyela ma nene.
34Vukani, mu maha kululama, mu nga onhi; hakuva vanwani a va mu tivi Nungungulu, nzi wula lezi ku mu chela tingana. Efe. 5:14; 1 Tes. 4:5
35Kanilezi munwani i taku ngalo: A vafileko va ta vukisa kuyini ke? Va ta huma na va hi ni miri wa lixaka muni ke? Ezek. 37:3
36Xipumbu nzi wena, a mbewu leyi u yi byalako, a yi mili loku yi nga rangi yifa. Joh. 12:24
37Ni laha u byalako, a ku byali a miri lowu wu ta nga humelela, kanilezi u byala a mbewu ntsena, kutani nja zipfhaki, kutani nja lixaka linwani.
38Kanilezi Nungungulu wa yi nyika a miri kota lezi zi mu xalalisako yena, a ka mbewu yinwe ni yinwani a miri wa yona. Tis. 104:14
39A nyama yontlhe a hi nyama ya lixaka linwe; kanilezi yi kona a nyama ya vanhu, a yinwani i nyama ya zihari, ni yinwani i nyama ya zinyanyani, ni yinwani ya zidluwani.
40Kambe yi kona mimiri ya le tilweni, ni mimiri ya laha misaveni; kanilezi a kungangamela ka ya le tilweni ka limbe lixaka, ni kungangamela ka ya laha misaveni ka linwani lixaka.
41Ku kona a kungangamela ka gambo, ni kunwani ka hweti, ni kunwani ka tinyeleti; hakuva a nyeleti yinwe ya hambana ni yinwani nyeleti hi kungangamela.
42Zi tava nghaho a kuvukeni ka vafileko: a miri lowu wu nga byalwa hi kubola wu ta vuka hi kungaboliko; Dan. 12:3; Mat. 13:43
43wu lo byaliwa hi kusoleka, wu ta vuka hi kungangamela; wu byaliwa na wu hi ni gome, wu vuka na wu hi ni ntamu; Fil. 3:21
44laha ku byaliwa a miri wa nyama, seyo ku vuka a miri wa moya. Wu kona a miri wa nyama, wu kona kambe ni miri wa moya.
45Ku tsalilwe ku ngalo: A munhu wo sangula, Adamu, i lo maha muhefemulo wu hanyako. Na Adamu wo gumesa i lo maha a moya wu hanyisako. Gen. 2:7; Joh. 5:21; 6:33; Rom. 5:14; Kol. 3:4
46Hambu lezo a za moya a hi zona za kusangula, kanilezi lezi za nyama; a za moya zita hi lenzhako.
47A munhu wo ranga i lo mahiwa hi misava, ngwa misava; a munhu wa wumbiri ngwa le tilweni. Gen. 3:19; Joh. 3:13, 31
48Khwatsi hi lezi a nga hi zona a wa misava, va nghaho ni va misava; ni kota lezi a nga zona a wa le tilweni, va nghaho a va le tilweni. Fil. 3:21
49Kota lezi hi nga tekelela a wa misava, hizalezo kambe hi ta tekelela a wa le tilweni. Gen. 5:3; Rom. 8:29; Fil. 3:21
50Makunu vamakabye, nzi wula lezaku a nyama ni nkhata a zi na kuga a tshomba ya mufumo wa Nungungulu; hambu ni kubola a kuna kuga a tshomba ya kungaboli. Mat. 16:17; Joh. 3:3, 5
51Langutani, nza mu byela fihlakalo waku ngalo: Hi nga ta etlela hontlhe, kanilezi hina hontlhe hi ta hunzuluswa xiyimo Fil. 3:21; 1 Tes. 4:15
52hi xikhatanyana xo fanana ni kutsopeta ka tihlo, loku ku biwa a mpunzu wo gumesa; hakuva a mpunzu wu ta biwa, zonake a vafileko va ta vuka va nga ha boli kambe, na hina hi ta hunzuluswa xiyimo. Mat. 24:31
53Hakuva a miri lowu wa kubola wu fela ku ambaliswa a kungaboli, ni miri lowu wa kufa wu fela ku ambaliswa a kungafi. 2 Kor. 5:4
54Kanilezi laha a kubola ku ta nga ngha ku ambele a kungaboli, ni kufa ku ta nga ngha ku ambele a kungafi, zonake ku ta tatiseka a mhaka leyi yi tsalilweko ya ku ngalo: A kufa ku mitilwe hi kuhlula. Isa. 25:8; Kuv. 20:14
55Wena kufa, ku kwihi a kuhlula ka wena ke? Wena kufa, li kwihi a livole la wena ke? Hos. 13:14
56A livole la kufa hi kuonha; ni ntamu wa kuonha hi nayo. Rom. 4:15
57Kanilezi a ku bongiwe Nungungulu, loyi a hi nyikako kuhlula hi Hosi ya hina Jesu Kristu. Rom. 7:25; 1 Joh. 5:4
58Hikwalaho vamakabye va mina va ranzekako, tiyani muku ndende, mu nga tsekatseki, kanilezi mu anza mitirweni ya Hosi xontlhe xikhati, na mu tiva lezaku a ntiro wa nwina a hi wa ipahala Hosini. 2 Kro. 15:7; 2 Ped. 3:14
Currently Selected:
1 Va le Korinte 15: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
