1 Va le Korinte 14
14
Xinyikiwo xa ku wulawula tirimi.
1Hlotani a liranzo, mu lavisisa a zinyikiwo za moya, nguvunguvu a kuva mu profeta. Levi 19:18; Mitse. 11:25; Mat. 22:39; Rom. 12:6; Xip. 12:31
2Hakuva loyi a wulawulako hi lirimi limbe a nga wulawuli ka vanhu, kanilezi ka Nungungulu; hakuva a ku na munhu a zi pimako, hilezi i wulawula mifihlakalo te moyeni. Mat. 13:11; Miti. 2:4; 10:46; 19:6
3Kanilezi loyi a profetako i byela vanhu a zilo zi akako, ni ku tangalisa, ni ku chavelela. Rom. 15:4
4Loyi a wulawulako hi lirimi limbe o ti akela yena wutsumbu; kanilezi loyi a profetako i akela bandla.
5Nza ranza lezaku nwina nwentlhe mu wulawula hi tirimi, kanilezi nguvunguvu a kuva mu profeta. Loyi a profetako ngwa hombe ku hunza loye a wulawulako hi tirimi ahandle ka mutlhamuseli, kasi a bandla gi fela ku vuneka.
6Makunu vamakabye, loku nzita ka nwina na nzi wulawula hi tirimi, nzi ta mu vunisa kuyini ke, loku nzi nga wulawuli na nwina hi ku mu vululela timhaka, kutani hi kutiva, kutani hi kuprofeta, kutani hi kugonzisa?
7Hambu ni zilo lezi zi nga hiko na kuhanya, lezi zi nga ni pfumawulo, kutani i nanga kani xitende, loku a kuvuma ka zona ku nga hambani, ku ta tibyiwa hikuyini aku ku biwa nanga niku xitende xi hi wako ke? Joba 21:11, 12
8Loku a mpunzu wu hi ni pfumawulo lowu wu nga tibyiwiko, himani a ta nga hloma a kuya yimpini ke?
9Hizalezo na nwinawu; loku mu nga humesi a magezu ma zwalako hi tirimi ta nwina, zi ta tibyiswa kuyini lezi zi wulawulwako ke? Mu ta wulawula mahala. Xip. 9:26
10Ti kona tirimi tinyingi laha misaveni, kanilezi a li kona ni linwe leli a magezu ya lona ma nga humesiko nchumu.
11Kanilezi loku nzi nga tivi a magezu ya lirimi la kona, nzi tava wamatiko ka loyi a wulawulako, ni loyi a wulawulako i tava wamatiko ka mina.
12Zinghaho na nwina, kota lezi mu navelako a zinyikiwo za moya, lavani lezaku zi enzeleka ka nwina kasi a bandla ga vuneka.
13Hikwalaho ngha loyi a wulawulako a lirimi limbe a khongela kasi a fela ku zi kota ku tlhamusela. Xip. 12:1
14Hakuva loku nzi khongela hi lirimi limbe, ku khongela a moya wa mina, kanilezi a kupima ka mina a ku vuni vanwani.
15Nzi taku yini ke? Nzi ta khongela hi moya, nzi khongela kambe hi kupima; nzi ta yimbelela hi moya, nzi yimbelela kambe hi kupima. Tis. 47:7; Efe. 5:19; Kol. 3:16
16Hakuva loku u khesa Nungungulu hi moya ntsena, a munhu wa lahandle i ta wulisa kuyini aku, Amen, a kukheseni ka wena ke, kota lezi a nga zi tiviko lezi u zi wulako? Xip. 11:24
17Hakunene wa bonga khwatsi, kanilezi munwani a nga vuneki.
18Nza mu bonga Nungungulu, hakuva nzi wulawula tirimi ku hunza nwina nwentlhe.
19Ahembalokoke lomu bandleni nzi ranza ku wula a ntlhanu wa timhaka ntsena hi kupima ka mina, kasi nzi fela ku gonzisa vanwani, ku hunza ku wula zana ga mazana ya timhaka hi lirimi limbe.
20Vamakabye mu nga mahi zihlangi kupimeni ka nwina, kanilezi mahani zihlangi ka zakubiha, mu maha madota kupimeni. Tis. 119:99; 131:2; Mat. 11:25; 18:3; 1 Ped. 2:2
21Ku tsalilwe nayweni ku ngalo: Nzi ta wulawula ni lava vanhu hi vanhu va tinwani tirimi ni milomu ya vamatiko; hambu zi hi tano, va nga ta nzizwa, ku wula Hosi. Isa. 28:11; Joh. 10:34
22Hikwalaho a tirimi xikombiso, na ku nga hi ka lava va kholwako, kanilezi ka lava va nga kholwiko. Kanilezi a kuprofeta xikombiso ka lava va kholwako, na ku nga hi ka lava va nga kholwiko.
23Hikwalaho loku a bandla gontlhe gi tsombene, na vontlhe va wulawula hi tirimi, loku ku enghena a valahandle kutani lava va nga kholwiko, va nga ta wula vaku mu hungukile ke? Miti. 2:18; 26:24
24Kanilezi loku vontlhe va profeta, zonake ku enghena munhu loyi a nga kholwiko kutani wa lahandle, i ta koniwa hi vontlhe, a lamuliwa hi vontlhe.
25A zigungu za mbilu yakwe za tsetsulwa, zonake i tawa hasi hi nghohe yakwe a khizamela Nungungulu aku: Hizinene Nungungulu i kona xikari ka nwina. Isa. 45:14; Zak. 8:23
26Za kuyini ke, vamakabye? Laha na mu tsombana, munwe ni munwani wa nwina i na ni lisimu, kutani gonzo, kutani kuvululwa, kutani kuwulawula lirimi limbe, kutani kutlhamusela; ngha zontlhe lezi zi mahiwa kasi mu vunana. Rom. 14:19; Xip. 12:8, 9; 2 Kor. 2:19; Efe. 4:12
27Loku mu ranza ku wulawula hi tinwani tirimi, a ku wulawule vambiri kutani vanharu; ku mahiwa hi ku lanzelana, ni munwani a tlhamusela.
28Kanilezi loku a mutlhamuseli a hi hava a va miyele lomu bandleni; va wulawula ka wutsumbu gabye ni ka Nungungulu.
29A vaprofeti ngha va wulawula na va hi vambiri kutani vanharu, ni vanwani va lamula lezi zi wulawuliwako.
30Loku munwe wa lava va tshamileko a vululelwa mhaka, loyi a nga ranga i ta miyela. 1 Tes. 5:19
31Hakuva nwina nwentlhe mu nga profeta ha munwe munwe, kasi vontlhe va fela ku gonziswa, ni vontlhe va tangaliswa. Rom. 12:7
32A mimoya ya vaprofeti ya ingisa a vaprofeti va kona. 1 Joh. 4:1
33Hakuva Nungungulu a hi Nungungulu wa woyonga, kanilezi wa kurula. Xip. 11:16
34Khwatsi hi lomu mabandleni wontihe ya vobasa, ngha vavasati va miyela mitlhanganweni; hakuva a va vumelwi ku wulawula. Va fanele ku ingisa kota lezi wu wulako nayo. Gen. 3:16; Xip. 11:3; Efe. 5:22; Kol. 3:18; 1 Tim. 2:11
35Loku va lava ku tiva nchumu, ngha va wutisa a vanuna vabye le kaya; hakuva tingana ka wasati a kuva a wulawula lomu chechini.
36Xana a mhaka ya Nungungulu yi lo huma hi ka nwina ke? Kutani yi tile ka nwina nwece ke? Isa. 2:3
37Loku a hi kona munhu a ti alakanyako aku muprofeti, kutani ngwa Moya, ngha a tiva lezaku lezi nzi tsalako ka nwina kulaya ka Hosi. Lu. 10:16; 2 Kor. 10:17; 1 Joh. 4:6
38Loku munhu a ala ku tiva lezi, ngha a tshama a nga tivi.
39Hikwalaho vamakabye va mina, navelisisani a xinyikiwo xa kuprofeta, mu nga beleteli munhu ku wulawula hi tirimi. Xip. 12:31; 1 Tes. 5:20
40Kanilezi ngha zilo zontlhe zi mahiwa hi fanelo ni nayo.
Currently Selected:
1 Va le Korinte 14: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
