1 Va le Korinte 12
12
A zinyikiwo za Moya.
1Xungetano ni zinyikiwo za moya, vamakabye, a nzi zi ranzi a ku ngha mu kohlwa hi nchumu. Xip. 14:1
2Nwina ma zi tiva lezaku laha na ma ha hi vamatiko mu wa kokelwa zifananisweni lezi za timbeveve, hi laha mu nga kokwa ha kona. Efe. 2:11
3Hikwalaho nza mu tivisa lezaku a ku na munhu loyi a wulawulako hi Moya wa Nungungulu, aku: Jesu a rukiwe; kambe a nga kona munhu a nga wulako, aku: Jesu i Hosi, na a nga wuliswi hi Moya wa ku Basa. Mat. 16:17; Mar. 10:39; 1 Joh. 4:2
4Makunu a zinyikiwo zi hambene, kanilezi a Moya munwe. Efe. 4:4; Maheb. 2:4
5Ma kona matirela ma hambeneko, kanilezi a Hosi njinwe.
6Yi kona mitiro yi hambeneko, kanilezi Nungungulu munwe, loyi a tirako zontlhe ka vontlhe. Efe. 1:23
7Kanilezi a kuwonekeliswa ka Moya ku nyikiwa munwe ni munwani, kasi ku vuna vontlhe. Rom. 12:6
8Hakuva munwani i nyikiwa ha wona Moya a timhaka ta kutlhariha, ni munwani i nyikiwa a timhaka ta kutiva hi wona Moya lowo; Xip. 2:6; 2 Kor. 8:7
9a munwani i kuma kukholwa hi wona Moya lowu; ni munwani a zinyikiwo za ku hanyisa vababyi hi wona Moya lowo munwe. Mat. 17:19; Mar. 16:18
10Ka munwani ku nyikiwa ku tira zihlamaliso; ni ka munwani a ku profeta; ni ka munwani a ku pima mimoya; ni ka munwani a ku wulawula a tirimi ti tsalangeneko, ni ka munwani a ku tlhamusela tirimi. Miti. 2:4; Rom. 12:6; Gal. 3:5; 1 Joh. 4:1
11Kanilezi zontlhe lezi zi tiriwa hi walowo Moya munwe, lowu wu avelako ka munwe ni munwani hi laha wu ranzako ha kona. Rom. 12:6-8; 2 Kor. 10:13; Maheb. 2:4
12Hakuva khwatsi hi lezi a miri wu nga munwe, wu nga ni ziro zo tala, ni ziro zontlhe za miri, hambu lezi zi nga zinyingi, zi maha miri munwe, zinghaho ni ka Kristu. Gal. 3:16
13Hakuva hi ka Moya lowo wa munwe hina hontlhe hi lo bapatizelwa a kuva miri munwe, hambu hi hi vaJuda kutani vaGreki, hambu hi hi tikhumbi kutani vatlhatlhekileko; hina hontlhe hi lo cheliwa Moya munwe. Isa. 44:3-5; Gal. 3:28; Kol. 3:11
14Hakuva a miri a hi xiro xinwe ntsena, kanilezi zi tele.
15Loku a konzo wuku ngalo: Lezi nzi nga hiko canja, a nzi wa miri; mbunwa, ngwa miri.
16Loku a ndleve yiku ngalo: Lezi nzi nga hiko tihlo, a nzi wa miri; mbunwa, nja miri.
17Loku a miri wontihe wu wa hi tihlo, ngha ku hi kwihi kuzwa ke? Loku wontihe wu wa hi kuzwa, ngha ku hi kwihi kunuheta ke?
18Kanilezi Nungungulu i lungelele a xiro xinwe ni xinwani laha ka miri, kota lezi zi nga mu tsakisa.
19Loku zontlhe zi wa hi xiro xinwe, ngha wu hi kwihi a miri ke?
20Kanilezi makunu a ziro zi tele, kanilezi a miri munwe.
21A tihlo a gi zi koti ku wula ka canja, giku: A nzi ku lavi; hambu ni hloko a yi na ku wula ka mikonzo ku ngalo: A nzi mu lavi.
22Kokwihi! A ziro za miri lezi zi nge khwatsi zi na ni gome, za laveka nguvu.
23A ziro lezi za miri hi nge a zi na wudzunzo, hi zona hi zi fenengetako hi wudzunzo ga hombe; ni ziro za hina lezi hi nga ni tingana ha zona, hi chela kota nguvu ha zona,
24kasi a ziro za hina lezi zo saseka a zi vumali nchumu. Hakuva laha Nungungulu a nga tlhanganyisa miri, i lo nyika xichawo xa hombe ka ziro lezi zi nga dzunzekiko,
25lezaku kasi ku fela ku kala ku nga hi kona a kuhambana mirini; kasi a ziro zi fela ku zwelana.
26Hikwalaho loku a xiro xinwe xi xaniseka, ziro zontlhe zi xaniseka zinwe naxo; ni loku xiro xinwe xi dzunziwa, ziro zontlhe zi tsaka zinwe naxo.
27Makunu nwina mu miri wa Kristu, nwina mu ziro zakwe a munwe ni munwani. Rom. 12:5; Efe. 1:23; 4:12; 5:23; Kol. 1:24
28Nungungulu i yimisile vanhu lomu bandleni, kuranga a ku maha vapostoli, ku gamela vaprofeti, a ka wunharu vagonzisi; zonake a vanwani vatiri va zihlamaliso, ni vanwani va nga ni zinyikiwo za ku hanyisa vababyi, ni va ku hlayisa zisiwana, ni vaangameli, ni lava va wulawulako tirimi ti tsalangeneko. Mitse. 11:17; Miti. 13:1; Efe. 4:11; 2:20
29Xana vontlhe mbapostoli ke? vontlhe mbaprofeti ke? vontlhe mbagonzisi ke? vontlhe mbatiri va zihlamaliso ke?
30Xana vontlhe va na ni zinyikiwo za ku hanyisa vababyi ke? vontlhe va wulawula hi tirimi ti tsalangeneko ke? vontlhe va tlhamusela ke?
31Kanilezi navelisisani a zinyikiwo leʼza hombe nguvu. Makunu nzi ta mu kombisa a ndlela yi sasekileko nguvu. Xip. 14:1
Currently Selected:
1 Va le Korinte 12: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
