Nahume 1
1
Pfhumu Nungungulu a ngu dzi phodzela ga valala vaye
1 # Wona gambe: Isa 10:5-34; 14:24-27; Sof 2:13-15. Gulamudwa ga Ninivha. Libhuku nya giwoniso gya Nahume, nya lifumbu la Elikosi.
2 Pfhumu Nungungulu nya wufu ni gu dzi phodzela!
Pfhumu Nungungulu a ngu dzi phodzela na tade khu likhulo!
Pfhumu Nungungulu a ngu dzi phodzela ga avo va mu wugelago,
na gu yeyedza likhulo laye ga valala vaye.
3 Pfhumu Nungungulu a ngu hwela gu goroga,
gambe khongolo khu Tshivba;
kha na diga gu tsayisa gighohi.
Ndzila yaye yomo omu nya gingulu
numo nya gipupwane;
mapfhi i kudzudzwane nya migondro yaye.
4Uye a ngu kawuka linene, livbwa,
a bangisa ni mitsongo yatshavbo;
a vbedza tshivba Bhasani ni gigomoni gya Karimelo,
a wunisa senge sa Libhanoni.
5Sigomo sa gu ndrendremela mbeli gwaye,
sigomwana si nyiviliga;
mafu ma tsekatseka mbeli gwaye,
li ndrendremela litigo ni vatshavbo va vbanyago umo.
6Khu mani a na gu emago mbeli nya likhulo laye?
Khu mani a tiyelago guvbisa nya likhulo laye?
Likhulo laye li vbalagide nga nilo,
khungumulede siwindri mbeli gwaye.
7 Pfhumu Nungungulu khwadi,
likhokhola nya wuthavelo litshigu nya wuvi.
A ngu vhikela avo va mu tumbago,
8aholu khu ndrambi nya gukhulunge, a na mbembisa
khu gumogo basi
wulanga wowu nya lidhoropa;
khu gidema a na lundra valala vaye.
9Ginani enu mu gi alakanyago khu Pfhumu Nungungulu?
Uye kamwe a na mbembisa makungo yanu yatshavbo;
tshanisa kha yi na wuyelela nyondro nya wuvili.
10Kholu ambari na va tshunganede kha nga miba,
va gu fanana ni vathu nya guleve khu wadwa,
va na vbiswa nga mwasi nya gubange.
11Dugide khavbo gwago uwe Ninivha,
muthu a girelago makungo nya guvivbe
Pfhumu Nungungulu,
singalagadzi nyamba phasa gilo.
12 Pfhumu Nungungulu a ngu ganela kharati, khuye:
“Ambari na mu tiyide kharini,
ni gu bani muri vangi kharini,
kha mu na vbuluga gumbembiswa,
uye a na vbindra,
aholu uwe Judha, nyi gu thede dzitshoni,
olu kha nyi na engedza gambe gu gu poyila.
13Gasi olu, nyi na fanya kanga
u wu rwadego magatani gwago
nyi kavilela ni dzitshinga dzi gu hungidego.
14Aholu, Pfhumu Nungungulu
ningide nayo nya gukhuye,
khu mahembeni gwago, kha gu na velegwa gambe muthu
a na gu yisago mbeli lina lago;
Nyi na khungumulela satshavbo sifananiso nya guvatwe
niso nya gupfhudwe
si guromo nyumbani ga nungungulu wago.
Nyi vega umo lithowo lago,
kholu uwe khu phasi gilo.”
15 # Wona gambe: Isa 52:7. Wonani musigomoni
migondro ya wule a resago mahungu nya yadi,
a huwelelago gurula!
Uwe Judha, gira mikhuwo nya mibuzo yago,
u landrisa sisambanyo sago,
kholu va nya mayigo, gima kha va na nga gu sasela gambe;
avo va na mbembisedwa muphelo.
Currently Selected:
Nahume 1: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
