Mikeya 7
7
Libango la Israyeli
1Libango langu! Kholu nya gu fanana ni gikhati nya guvbwerwe mihandro
nya nango nya maronga;
gu mwalo ni gitsatsa gimwegyo gi tshadego nya dziuvha nya guhodze,
ambari ndzawa nya guvidzwe nyi yi golago ngudzu.
2Va nya gululama va fuvide tigoni;
gu mwalo gambe vbakari nya vathu uye a lulamidego;
vatshavbo vomo va dzi lulamisela gasi gu vbaladza novba;
moyo ni moyo womo gu demba ndriyaye khu ligoga.
3Mandza yawe ma dzi emisede gasi gu gira guvivba;
vathangeli va gu lomba siningwa,
mulamuli a gu dzumela gu rengeledwa,
va nya guthavisega va gu ganela khu manavelo ya monyoni gwawe,
khu magirelo yaya, vatshavbo vadzuwungeli.
4Uye a gu wadi vbakari gwawe a gu fanana ni girangalabwa;
ni uye a lulamidego ngudzu a gu fanana ni litamo nya miba.
Li vbohide litshigu li huweledwego khu vawoneleli vawe,
a gu litshigu nya tsayiso wa Nungungulu;
olu gu na bani guri pfilupfilu vbakari gwawe.
5Mu nga vegi gitumbo gyanu ga dzipari,
ni gu tumba ga valongo,
ambari ni wule u mi gumbarelago;
vegedza gwadi malito ma dugago khu kanani gwago.
6 # Wona gambe: Mat 10:35-36; Luk 12:53. Kholu, gyanana nya gikhwathana gya gu yeyisa babe waye,
nyamahegyane a wugela mayi waye,
ngadzamwane a wugela mayinasale;
valala nya muthu khu valongo va ndrangani gwaye kamwe.
7Gasi eni, nyi na tumba Pfhumu Nungungulu;
nyi na namarela ga Nungungulu a gu muvbulugisi wangu;
kholu Nungungulu wangu a na nyipwa.
IV. SITUMBISO
Pfhumu Nungungulu a ngu pwela gisiro Israyeli
8Uwe nala wangu, u nga tsaki kholu nyi thegedwego khu libango;
ambari nya gu bani nyi thegide,
nyi na wuga nyaluphye;
ambari nya gu vbanya gidemani,
Pfhumu Nungungulu a na khala wenengedzo wangu.
9Nyi na rwala likhulo la Pfhumu Nungungulu,
kholu nyi mu ghohedego;
kala a vhikela mahungu yangu a nyi lamula;
a na nyi yisa guwonegelani
nyi nata wona gululama gwaye.
10Nala wangu a na si wona isoso, a tedwa khu dzitshoni,
uye a nga bani a nyi embela, khuye:
“Womo hayi Pfhumu Nungungulu wago?”
Maho yangu ma na wona guthega gwaye;
na gu gandredzedwa kha nga maraga ya mudzindzilani.
11Khu litshigu nya guvbahedzwe nya mabhiyo yago,
khilo litshigu lolo mivbingano yago yi na dusedwago yi yiswa hwindzo.
12Khu litshigu lolo, va nata avbo gwago vathu
nya gukhugele Asiriya,
kala madhoropani ma bhiyidwego khu makhokhola,
gukhugela Egipito kala tsongoni wa Ewufrate,
khu yiphwa kala ga yimbe yiphwa,
khu gigomoni, kala ga gimbe gigomo.
13Aholu, litigo leli li na khala giwula,
khu kotani nya wuvivbi wu giridwego khu vathu va vbanyago umo
ni kotani nya mihandro yawe va giridego.
14Havisa vathu vago khu ndronga yago,
a gu dzinvuta nya tshambi nya thomba yago,
dzi vbanyago khabini basi,
vbakari nya mahawo nya gunone;
dzi yise wuhaviseloni ga Bhasani ni Gileyadhi,
kha nga matshigu ma vbindridego.
15Eni nyi na mi yeyedza sisamadziso,
kha nga matshiguni u dugidego khayo khu tigoni ga Egipito.
16Mayigo ma na si wona ma tala khu dzitshoni,
khu kotani nya tshivba yago nya yikhongolo;
va na vega nyala kanani, dzindzeve dzawe dzi na khala sivbwiri.
17Va na dandzela kudzudzwane kha nga dzinyoga,
ni simbe sirengo si khwirirago khu lididi mafuni,
va na duga khu mugusihalani gwawe
na va gu ndrendremela khu hwanga,
va nata gwago Pfhumu Nungungulu wathu,
na va gu gu thava.
18Khu mani uwe Nungungulu a fananago ni uwe,
u tsetselelago guvivba,
ni gu divalela guyeyisa ga mitshaledwa nya thomba yago?
Pfhumu Nungungulu kha khali na gu vbisega khu likhulo gikhati gyatshavbo,
kholu a gu tsaka khu gupwela wuhindzi.
19U na simama gu hi pwela gisiro;
u gandredzela guvivba gwathu,
u dzudzuga sighoho sathu satshavbo guetani nya yiphwa.
20U na yeyedza gutumbega gwago ga Jakobe,
ni ga Abrahama, wuwadi wago,
kha nga u sambanyedego ga vababe vathu gukhugela matshiguni ya gale.
Currently Selected:
Mikeya 7: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
