Joyele 2

Litshigu la Pfhumu lomo vbafuvbi

1Wombani pundru Siyoni;

mu lila khu lito nya gukhugege gigomoni gwangu nya guage;

va na khale hwanga vavbanyi vatshavbo va tigoni,

kholu litshigu la Pfhumu Nungungulu li ngu vboha,

gambe lomo vbafuvbi;

2Litshigu nya gidema ni gutshaniseka;

litshigu nya mapfhi ni gidema nya guphume.

Gufanana ni wuronga wu wenengedzago sigomoni,

vathu nya vangi ni tshivba va ngu hidzimela,

avo nya gu gukhugela gikhati gya gale gima kha va nga manega,

ambari khu hwane gwawe kha va na nga manega

ga situgulwana ni situgulwana kala gupindruga.

3Mbeli gwawe gu thangide nilo nya gumbembise; khu hwane gwawe gu wonega malavbelavbe nya nilo;

mbeli gwawe mafu ma gu fanana ni lithembwe la Edheni,

aholu khu hwane gwawe gu di fanana ni giwula nya gihala;

mwalo a na vbulugago.

4Avo va na ni giyemo nya gufanane ni dzikavalu;

va na tutuma kha nga vakhileli nya dzikavalu.

5 # Wona gambe: Gutu 9:7-9. Gudzuma nya sikingo sawe, gu fanana ni ligwaha nya dzikareta

dzi gimbilago dzitshokani nya sigomo;

avo va gu ndraga kha nga malavbelavbe nya nilo

wa gu bani wu gu khondra

wu vbisago mwasi wa thembweni,

kha nga libutho nya vathu nya tshivba va nga dongisedwa gu dwana nyimbi.

6Mbeli gwawe mayigo ma na khala hwanga;

dzikhovbe dzatshavbo dzi na sivbala kha nga wutshita nya khali.

7Va na tutuma kha nga dzindrena, va na lita mabhiyo kha nga vathu nya gudwane nyimbi,

moyo ni moyo a na bela khu ndzila yaye,

gambe kha va na ndreya ndzararani gwaye.

8Kha va liginyani; moyo ni moyo a na thonona guya mbeli;

va vbindra khu vbakari nya litshari,

nyamba bayiswa.

9Va gu vbindra khu madhoropani; va tutumatutuma vbatshani nya mabhiyo,

va lita dzinyumbani, va bela khu sihogo nga mbafa.

10 # Wona gambe: Gutu 8:12. Mbeli gwawe mafu ma gu tsekatseka,

ni damboni gu ndrendremela;

lidambo ni ngima si pfhupela,

ni dzinyeledzi dzi na dusa wenengedzo wawe.

11 # Wona gambe: Gutu 6:17. Pfhumu Nungungulu a ngu khusedza lito laye mbeli nya mabutho yaye;

kholu masotshwa yaye mangi ni tshivba ngudzu

kholu a na ni tshivba uye a yingisago milayo yaye;

kholu litshigu la Pfhumu Nungungulu likhongolo

ni guthisa ngudzu,

khu mani a na gu li tiyelago?

Gilombo nya guvbindrugedze mavbanyelo

12Khu guralo, olu kamwe, a ngu ganela Pfhumu Nungungulu, khuye: Vbindrugedzani mu wuye gwangu khu monyo wanu watshavbo; isoso na mu gu hala khu gu lila ni gu womba dzihuwa. 13Pferulani myonyo yanu, nasiri guambala gwanu, vbindrugedzani mu wuye ga Pfhumu Nungungulu wanu; kholu uye a na ni wuhindzi, ni gu pwela gisiro, a hwelago gu goroga, na tadego khu wuwadi, a ngu thindregisa makungo nya gu gu tsayise. 14A gu dzina saye a na bwelela hwane a dzi laya, a mu ninga makategwa, a mu ninga wuguvbi ni miningelo nya vhinya nya guphasele khiso Pfhumu Nungungulu wanu. 15Wombani pundru Siyoni, vegani litshigu nya guhale nya gu dzi agise, mu huwelela litshigu nya gulolele. 16Tombanisani vathu, mu agisa tshangano; rambani madhota, mu tombanisa sanana ambari niso sa beleni; mudzegi a na duge khu makhuvini gwaye nuye, a dzegwago a na duge khu wulangani gwaye. 17Va na lile vaphasi nya mhamba, va thumelago Pfhumu Nungungulu, va na lile vbakari nya mwanya nya Nyumba ya Nungungulu ni giluvelo, va lombelela khavo: Uwe Pfhumu Nungungulu tsetsa vathu vago, u nga ningeli thomba yago yi khala gihegiso, va nya mayigo va gira guhaladza khiyo; kholu mambe mafumbu ma nga ganela khayo: Womo hayini Nungungulu wawe?

Phindrulo ya Pfhumu

18Khu guralo, Pfhumu Nungungulu a na pwela wusiwana litigo laye, a na tsetselela vathu vaye. 19Pfhumu Nungungulu a na phindrula, a embela vathu vaye, khuye: Wonani, nyi na mi rumela tirigu, vbinyu nya yiphya ni mafura, mu na khura khiso, gambe gima kha nyi na mi ningela mu khala gihegiso vbakari nya mayigo. 20Wule a tago khu Wuronga nyi na mu gira a hongola hwindzo nanu, nyi na mu dzudzuga ga litigo nya gihala nyamba buga gilo; vale va guromo mbeli nyi na va yisa ga yiphwa ya Khugadambo; avo va tshadego hwane, nyi va yisa ga yiphwa ya Pfoladambo; sirumbi sawe si na tala si hina, gununga gakone gu phalalega ni malanga yatshavbo; kholu va mu ghohede ngudzu. 21Uwe litigo u nga thavi; tsaka u nengela ngudzu; kholu Pfhumu Nungungulu giride silo sikhongolo. 22Enu sirengo sa khabini mu nga thavi, kholu mahawo ya giwulani ma na nyuga, kholu misimbo yi ngu ninga mihandro yaye marembwe ni mikandzu ni miuvha yi ngu lemedwa khu mihandro. 23Enu vathu va Siyoni, tsakani mu nengela ga Pfhumu Nungungulu wanu, kholu uye a na mi ninga muhevbudzi nya gululame ni gu wisa ndzadzi khu gikhati ni nango yi vbwetegago, khu ngima nya guhegule. 24Sithala si na tala khu tirigu, ni sikhwati si na tala khu wadwa nya dosi nya dziuvha ni mafura. 25Nyi na mi bweledzela nyaluphye myaga yile dzimbewu dzanu dzi nga mbembiswago khu mbasa, khaba, sibukhwa, mipungu ni libutho langu nya likhongolo nyi nga mi rumelago. 26Mu na hodza mu khura, gambe mu na tsaka mu rungudza lina la Pfhumu Nungungulu wanu, a mi giredego silo nya gusamadzise; ni vathu vangu gima kha va na thega gambe dzitshoni. 27Khavbo mu na dzitigo gukhenu, eni nyi womo vbakari gwa va na Israyeli, a gu eni Pfhumu Nungungulu wanu, mwalo mumbe; vathu vangu gima kha va na thega dzitshoni kala gupindruga. 28Khu hwane nya isoso, Eni nyi na guhula Liphuvbo langu vbatshani ga vathu vatshavbo. Sanana sanu nya sikhwathana niso nya sagadzyana si na profeta, sikhosane sanu si na lora dzindroro, madzaha yanu ma na wona siwoniso. 29Ga matshigu yale nyi na guhula gambe Liphuvbo langu ga sithumi nya vama niso nya vanyamayi. 30Nyi na yeyedza siliwugiso ndzadzini ni mafuni, novba, nilo ni mapfhi nya gutuvige wutshi. 31#Wona gambe: Mat 24:29; Mark 13:24-25; Luk 21:25; Gutu 6:12-13. Lidambo li na vbindrugedza li khala gidema, ngima wu fuvila wu khala novba, li si gu vbohi litshigu nya likhongolo nya guthise la Pfhumu Nungungulu. 32#Wona gambe: Mith 2:17-21; Rom 10:13. Watshavbo wule a ranago lina la Pfhumu Nungungulu a na vbanyiswa; kholu gigomoni gya Siyoni dhoropani ga Jerusalema, gu na manega gutshudziswa, kha nga edzi Pfhumu Nungungulu a ganedego khidzo, ni vbakari nya mitshaledwa va na manega vale va na gu bani va ranidwe khu Pfhumu Nungungulu.

Currently Selected:

Joyele 2: BGE2014

Highlight

Copy

Compare