Hoseya 7
7
Wuwadi wa Pfhumu Nungungulu
1Nya gu vbweta gu vbanyisa Israyeli,
wuvivbi wa Efrayimi, wa gu dzi wonegisa,
wughevenga wa Samariya wa gu tugulega.
Kholu va gu thuma wudambane,
dzimbafa dzi bela dzinyumbani,
tsawa nya vaphangi wuba khu mudzindzilani.
2Gambe kha va pimisi khu myonyoni gwawe,
gukhavo eni nyi ngu alakanya
mithumo yawe yatshavbo nya guvivbe;
va fenengedzidwe khu sighoho sawe,
gikhati gyatshavbo nya gu khedza avo.
3Avo va gu tsakisa mufumeli
khu mithumo yawe nya guvivbe,
va tsakisa vathangeli khu malipha yawe.
4Vatshavbo sibhayi,
va gu fanana ni gidhingiselo nya nilo,
egi muvawuli nya mikati,
a si dzi garadzigo khu gu endzedza,
gukhugela avbo a sugago wuguvbi,
kala avbo wu gugumugago.
5Litshigu nya buzo wa mufumeli wathu,
vathangeli va di vbindrugedza va khala vadwali,
khu gu leva khu vhinya,
va nga selago gumogo ni sidambane.
6Kholu va dongisede myonyo yawe ni litindzalo,
na va gu lindrela,
wutshigu watshavbo va lala khu giviti,
aholu, me ni gugya, gya gu khondra kha nga malavbelavbe nya nilo.
7Vatshavbo va gu vbisa
nga gidhingiselo nya nilo,
va dagaredzisa valamuli vawe;
vafumeli vawe vatshavbo va gu thega,
mwalo ni moyo wa vbakari gwawe a nyi lombelelago.
8Efrayimi a gu dzi tshanganisa ni mambe mayigo;
Efrayimi kati nya gugadzingwe nyamba vbindrugedzwa.
9Tshivba yaye ya gu midzwa khu va nya mayigo,
aholu uye kha dzipwi gilo.
Hungoni gwaye gu tade khu dzinvi,
aholu uye kha si woni.
10Matshandza ya Israyeli,
ma ngu mu girela wufakazi,
ambari khu satshavbo soso,
uye kha wuyi ga Pfhumu,
Nungungulu waye,
ambari gu mu vbweta.
11Kholu Efrayimi a gu fanana ni lituva nya lipemi,
li kanganyiswago khu gumbana mapimo;
a gu lomba Vagipite vaya mu phasa,
a gu dzina a wuya ga Vaasiriya.
12Avbo va na hongolago,
nyi na ladza khoga yangu nyi va goga,
va na thega nga sinyoni sa damboni.
Nyi va tsayisa gu khedza khiso va si pwidego tshanganoni gwawe.
13Va na thegedwa khu libango,
kholu va hambanide neni!
Gumbembiswa gu nata vbakari gwawe,
kholu va nga nyi wugelago!
Nyi ngu gola gu va dzegisa, aholu avo va gu ganela malipha khu eni.
14Kha va lila avbo gwangu
khu monyo wawe watshavbo,
aholu va di keta malawuni gwawe,
va lomba tirigu ni vbinyu,
aholu avo na va hambanide neni.
15Eni nyi va hevbudzide ni gu va ninga tshivba,
aholu va di nyi bweledzela khu guvivba.
16Ambari olu va vbindrugedzago va wuya,
kha va wuyi ga uye a Khusegidego Ngudzu;
va gu fanana ni wulaho nya guwegele.
Vathangeli vawe va na songwa khu matshari,
kholu khu maganani gwawe gu di duga
magana nya gu dzi khusedze.
Khu guralo, va na khala gihegiso
tigoni gwatshavbo gwa Egipito.
Currently Selected:
Hoseya 7: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
