Hoseya 8
8
Tsayiso wa Israyeli
(Ezekiyeli 32)
1Thela pundru kanani gwago!
Kholu nala a nguta khu guvbuvba kha nga lighama,
guta dhumela Nyumba ya Pfhumu Nungungulu,
kholu mu hambanide ni gidzumeledzwano gyangu,
mu wugela nayo wangu.
2Va na lila avbo gwangu, khavo:
“Ethu va na Israyeli, hi ngu guti gukhethu khuwe Nungungulu wathu.
3Israyeli nyenyide ndzila nya yadi;
valala vaye va na mu landrelela.
4Va dzi hathede vafumeli khu gugola gwawe,
aholu, nasiri khu guruma gwangu,
va dzi vegela vathangeli nyamba vati.
Khu ndralama ni parata yawe,
va di wumba vanungungulu nya sithombe,
gasi va dzi mbembisa khiso.
5Githombe gyago nya gimombyana uwe Samariya
gi ngu nyi hasimisa monyo;
likhulo langu li khondride vbatshani gwawe!
Kala lini na va nga gu padwa khu gu dzi agisa?
6Gimombyana gegi gi di girwa khu va na Israyeli!
Gi di pfhudwa khu moyo nya vameseri vanu,
khandri Nungungulu.
Githombe gyogyo nya gimombyana gya Samariya,
gi na khungumuledwa gi tshala khu sipandre.
Giprofeto nya guvbagedwe
7Kholu va di yala maphuvbo, va na vbwera singulu.
Givbila nyamba rumbuga,
kha gi dusi wuguvbi.
Ambari gya gu rumbuga,
wu na hodzwa khu va nya mayigo.
8Israyeli midzidwe;
olu womo vbakari ga mambe mayigo
kha nga gyombo nyamba phasa gilo.
9Kholu tshatugide aya Asiriya,
a fanana ni giburwana nya likhabi,
gi golago gu khala genga,
aholu Efrayimi, a dzi rengiside ga sibhayi saye.
10Ambari va nga bani va dzi rengiside ga va nya mayigo,
olu nyi va tshanganiside,
Va phede gu lemedwa khu mirwalo
ya mufumeli ni ya manganagana.
11Ambari Efrayimi a nga emisago
siluvelo nya singi nya miphaso nya gudivaledwe sighoho,
iso si khade siluvelo nya gu mu kutsedzele gu ghoha.
12Ambari nyi nga va lovelago
mazanazana nya milayo yangu,
avo isoso va di si wona nga gilo nyambana giphaso.
13Avo va gu gola gu ningela miphaso,
va songa sirengo, va gola guhodza dzinyama dzakone,
aholu Pfhumu Nungungulu kha salali khiyo.
Kha na diga gualakanya wuvivbi wawe,
a na va tsayisa khu sighoho sawe,
avo va na bwelela tigoni ga Egipito.
14Kholu Israyeli divaledwe khu Muvangi waye,
a dzi vbahela dzinyumba nya dzikhongolo nya wufumu,
Judha, a di engedzela madhoropa nya makhokhola;
aholu eni nyi na rumela nilo madhoropani gwawe
wu ya dagaredzisa dzinyumba dzawe dzatshavbo nya wufumu.”
Currently Selected:
Hoseya 8: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
