Amosi 7
7
Siwoniso nya mbasa
1 Pfhumu Nungungulu a di nyi yeyedza esi: Wonani, guphelani nya gurumbuge nya mela nya wuvili nya mwasi, uye a di gira mbasa. Hwane nya gu mufumeli na vbedzide guvbwera dzimbewu. 2Avbo mbasa yi nga bani yi vbedzide gu hodza mwasi watshavbo wa tigoni, nyi di ganela, kheni: “Pfhumu Nungungulu, va tsetselele!” A na ema kharini Jakobe, olu a ngari dugwana?
3Khu guralo, Pfhumu Nungungulu, a di dzi laya khisoso a ganela, khuye: “Kha si na nga girega, a di ganela Pfhumu Nungungulu.”
Giwoniso nya nilo
4 Pfhumu Nungungulu a di nyi yeyedza esi, khuye: Wona nya gukhuwe Pfhumu Nungungulu a ngu vbweta guta lamula vathu vaye khu nilo, uwo wu na vbisago nondrwa nya guete, wu gu mbembisa gambe linene. 5Khavbo avbo, nyi di ganela, kheni: Pfhumu Nungungulu gira wuhindzi olu u eme: A na khuga kharini Jakobe? Olu uye a ngarigu gyanana.
6Khu guralo, Pfhumu Nungungulu a di dzi laya khisoso, khuye: “Ambari isoso kha si na girega gambe, a di ganela Pfhumu Nungungulu.”
Giwoniso nya ngodzi
7Khu hwane nya ugo, Pfhumu Nungungulu a di nyi yeyedza gambe esi: Nyi di wona Pfhumu na emide vbatshani nya libhiyo na pharide ngodzi nya gupime mandzani gwaye. 8Pfhumu Nungungulu a di nyi wudzisa, khuye: “Amosi, ginani u gi wonago?” Eni nyi di mu hakha, kheni: “Ngodzi nya pimo.” Khavbo avbo, Pfhumu a di nyi embela, khuye: “Wona nya gukhuwe nyi na pima vathu vangu va na Israyeli khu ngodzi nya pimo; gima kha nyi na nga va tsetselela gambe. 9Malangani nya sigomo nya miphaso ya Isaki, ma na vbindrugedza ma khala marumbi, ni malangani nya miphaso ya Israyeli ma na khungumudwa; nyi na wugela nyumba ya Jerobhowamo khu matshari.”
Amaziya a ngu wugela Amosi
10Khu guralo, Amaziya, muphasi nya mhamba wa Bheteli, a di rumela guya embela Jerobhowamo, mufumeli wa Israyeli, khuye: Amosi giride gikungo nya gu guwugele, vbakari ga va na Israyeli; litigo kha li dzi kodzi gutimisela magana yatshavbo a ganelago. 11Kholu Amosi a gu ganela kharati, khuye:
Jerobhowamo a na songwa khu litshari,
Israyeli a na vbagedwa a yiswa wugumbitunu,
vbavbandze nya litigo laye nya mavelego.
12Khu guralo, Amaziya, a di embela Amosi, khuye: Uwe muwoni nya misihalo! Khuga avba, kha nyi gu vbweti! Thavela tigoni gwa Judha; umo u na guya manago guhodza u naya gira iyoyo wuprofeti wago. 13Aholu, omu tigoni ga Bheteli, gukhugela olu guya mbeli, khu na nga profeta gambe, kholu, wulanga nya guage wa mufumeli ni nyumba nya miphaso nya mufumo.
14Amosi a di hakha a embela Amaziya, khuye: Eni nyi di siri muprofeti, ambari gyanana gya muprofeti; aholu nyi diri muhavisi nya dzimombe ni musayisi nya miguhu. 15Aholu Pfhumu Nungungulu a di nyi dusa thumoni nya wuhavisi, a nyi embela, khuye: Indra u ya profeta ga vathu vangu va na Israyeli. 16Gasi olu yingisa magana ya Pfhumu Nungungulu. Uwe wari, khuwe: Nyi nga profeti gambe ga va na Israyeli, ambari gu ganela ga livelego la Isaki 17Khu guralo, Pfhumu Nungungulu a ngu gu embela, khuye:
Mwangadzi wago a na gira wubhayi dhoropani,
sanana sago nya sikhwathana niso nya sagadzyana,
si na songwa khu matshari,
litigo lago li na kabaniswa khu ngodzi,
uwe u naya fela tigoni nya mahedheni,
Israyeli a na vbagedwa a yiswa wugumbitunu,
hwindzo ni litigo laye.”
Currently Selected:
Amosi 7: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
