Amosi 8
8
Giwoniso nya gitundru nya gutale khu mihandro nya guvidzwe
(Jeremiya 24:1-3)
1 Pfhumu Nungungulu a di nyi yeyedza esi, khuye: “Wona avba gitundru gi gu ni mihandro nya guvidzwe.” 2A di nyi wudzisa, khuye: “Amosi, ginani u gi wonago?” Eni nyi di mu hakha, kheni: “Nya gu wona gitundru nya mihandro nya guvidzwe.” Khavbo avbo, Pfhumu Nungungulu a di nyi embela, khuye: Ma vbohide mahegiso ya vathu vangu va na Israyeli; gukhugela olu guya mbeli, gima kha nyi na va tsetsa gambe.
3Aholu dzindzimo dza Nyumbani ga Nungungulu, khu litshigu lolo, dzi na vbindrugedza dzi khala gililo, a ngu ganela Pfhumu Nungungulu; malangani gwatshavbo gu na tala khu sirumbi nya vathu, si na dzudzugwa vbavbandze na va degude.
4Yingisani enu mu midzago vahamugi,
mu mbembisa sisiwana sa mafuni,
5mu ganela, khenu:
Li na vbela lini litshigu nya gumege ngima,
gasi hi fela gu rengisa sivbila?
Li na vbindra lini litshigu nya Sabhadho
gasi hi tule sisangala nya tirigu hi rengisa,
hi vbungula mipimo,
hi engedzela mitengo nya gurengise,
hi thumisa sikalo nya wudambane,
6gasi hi renga sisiwana khu dzitsapawu,
ni muhamugi khu patwa nya silato?
Hwane nya ugo, hi na rengisa mungu nya tirigu.
7 Pfhumu Nungungulu a di sambanya khu matshandza ya Jakobe, khuye: “Eni gima kha nyi na divaledwa khu mithumo yaye yatshavbo a giridego!”
Litshigu la Pfhumu
(Malakiya 2:17; 3:5,16-18)
8Khu kotani nya isoso, ina litigo kha li na tsekatseka,
ni vatshavbo va vbanyago umo, kha va na lila, gani?
Litigo leli latshavbo li na khugega
nga tsongo nya wukhongolo Nilo,
li na khugega bwelo khavbo li bosa
nga tsongo wa Egipito.
9Khu litshigu lolo, a ngu ganela Pfhumu Nungungulu,
Lidambo li na pfola gu ngari vbakari nya mihani,
tigoni gu na sivbala khu gidema
gu ngari safa nya mihani.
10Nyi na vbindrugedza mibuzo yanu yi khala gililo,
ni dzindzimo dzanu dzi khala dzihuwa,
musiwununi gwanu, mwatshavbo
mu na hunga myendra nya silendra,
mihungoni gwanu mwatshavbo mu na vbaludwa makhwalu.
Litshigu lolo, li na khala na liri la gililo
nya gufanane ni wule a nga fedwa
khu gyanana gya gimwegyo,
mahegiso gwaye nga litshigu nya wuvi.
Ndzala nya mahungu ya Pfhumu
11Wonani ma nguta matshigu, a ngu ganela Pfhumu Nungungulu,
nyi na rumelago ndzala tigoni,
nasiri ndzala nya guhodze, mwendro lidora nya guvbwete mati,
aholu a na bani nari ndzala ni lidora
nya gupwe mahungu ya Pfhumu Nungungulu.
12Va na legalega khu linene vaya ga limbe linene,
gukhugela Wuronga kala Khugadambo;
va na gimbila maphuvbo yatshavbo,
na va guvbweta mahungu ya Pfhumu Nungungulu,
aholu kha va na ma mana.
13Khu litshigu lolo, makendzi nya gumbure
ni madzaha ma na dzima khu lidora.
14Vale va sambanyago khu nungungulu nya malipha wa Samariya,
va ganela, khavo:
“Hi ngu sambanya khu nungungulu wago, uwe Dhani;
ni avo va gukhavo:
Hi ngu sambanya khu ndzila yiyago Bherisebha!
Vanungungulu wowo va na thega, nyamba wuga gambe.”
Currently Selected:
Amosi 8: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
