Amosi 3
3
Gu na ranwa dzifakazi gasi guta rwega nandru Israyeli
1Upwani magana yaya Pfhumu Nungungulu a ganedego gwanu, enu va na Israyeli, ni ga lihundzu latshavbo leli a li dusidego khu tigoni ga Egipito wari khuye:
2Ga mafumbo yatshavbo ya mafuni,
nyi hathide enu basi;
khu guralo, nyi na mi tsayisa
khu kotani nya guvivba gwanu gwatshavbo.
3Ina vathu vavili va ngu dzi kodza
gu longoloka na va si pwanani, gani?
4Ina nghala yi ngu gungurangura khabini,
ya sa mola pfimba, gani?
Ginghalana gi ngu khusa lito
phalani gwaye, gya sa mola gilo, gani?
5Ina ginyoni gi ngu modwa khu naphwi,
wa sa dembwago, gani?
Ina naphwi wu ngu kodza gu tshaphuga,
nyamba mola gilo nya gukari, gani?
6Ina gu ngu wombwa pundru dhoropani,
vathu va si ndrendremeli khu hwanga, gani?
Ina gu ngu kodzega gu dugelela mhango dhoropani
nyambata khiyo ga Pfhumu Nungungulu, gani?
7Khu lisine, Pfhumu Nungungulu,
kha na gira gilo nyamba phela khu gu ninga giwoniso
ga sithumi saye, a gu vaprofeti.
8Ya gu bhonga ngala, khu mani a gumba ndrendremela?
Pfhumu Nungungulu a gu ganela,
khu mani a na gumba profeta?
Gumbemba ga Samariya
9Pwadzani esi umo nya dzinyumba nya wufumu dza Asidhodhi
ni dzinyumba nya wufumu dza tigoni ga Egipito,
mu va embela, khenu:
Tombanani musigomoni sa Samariya,
mu wona pfilupfilu nya yikhongolo yi guromo umomo,
ni wughevenga yi guromo mabhiyoni gwaye.
10Kholu avo kha va kodzi gu gimbila khu gululama,
a ngu ganela Pfhumu Nungungulu,
va gu wungedzela dzinyumbani gwawe nya wufumu
esi va nga phangago khu wurena ni dzihanyi.
11Khu guralo, Pfhumu Nungungulu,
a ngu ganela kharati, khuye:
“Nala a na dugelela, a ta randrela litigo lago,
a na khungumula likhokhola lago,
a phanga dzinyumbani gwago nya wufumu.”
12 Pfhumu Nungungulu a ngu ganela gambe kharati, khuye:
“Kha nga muhavisi a vbulugisago mawundru mavili nya nvuta
mwendro gipandre gimwegyo nya ndzeve kanani nya nghala,
kharato nugo va na vbulugisa guralo sanana sa Israyeli,
va vbanyago tigoni ga Samariya,
va khadego havo ghagha vbatshani
nya masofa nya seda.
13Olu, tulani dzindzeve mu yingisani esi, khu mahungu nya livelego la Jakobe,
a ngu ganela Pfhumu Nungungulu nya Tshivba Yatshavbo.
14 # Wona gambe: 2 Dzipf 23:15. Khu litshigu nyi natago nyita tsayisa Israyeli
khu kotani nya sighoho saye,
nyi na khungumula siluvelo sa Bheteli
ni dzikeho nya siluvelo dzi na pidwa
dzi thega vbavbatshi.
15Nyi na khungumula nyumba ya vbagirametunu
ni nyumba nya maronga,
dzinyumba dzi mburisedwego
khu magwaha nya dzindzofu dzi na fuviswa,
gu na fuviswa gambe ni dzinyumba nya dzikhongolo,
a ngu ganela Pfhumu Nungungulu.”
Currently Selected:
Amosi 3: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
