Amosi 4
4
Gitiviso nya guwugedwe vanyamayi va Samariya
(Isaya 1:16-28)
1Nga yingisani mahungu yaya, enu
dzimombenu nya migadzi dza Bhasani,
mu khadego gigomoni gya Samariya,
mu tshanisago sisiwana ni gu khozisa avo va hamugago,
mu embela vamune vawe, khenu:
Resani wadwa, hi sele.
2 Pfhumu Nungungulu
sambanyide khu guaga gwaye, khuye:
Ma nata matshigu vbakari gwanu,
ma na ta mi ndrindrago khu silowo,
ni situgulwana niso si na ndrindrwa khu silowo.
3Moyo nya enu, a na duga khu sihogo nya libhiyo,
mu ya thegela Herimoni,
a ngu ganela Pfhumu Nungungulu.
Wukhumu nyamba khodwa wa Israyeli
4Indrani Bheteli, mu ya ghoha,
bwelo khavbo mu wuya Ghiligali mu ya gu andrisa khu sighoho,
resani miphaselo yanu nya dzimindrudzile,
gugya ni gugya, resani miphaso yanu,
guvbelani nya matshigu mararu ni mararu, resani gipandre gyanu nya likhumi.
5Ningelani miphaselo nya gubonge
khu sibaba nya guthedwe mela,
mu huwelela khu miphaso yanu nya guningele khu gugola;
kholu khiso enu, sanana sa Israyeli, khiso mu si golago,
a ngu ganela Pfhumu Nungungulu.
6Khu guralo, enu nenu
nyi mi guhide magwaha
madhoropani gwanu gwatshavbo,
ni malangani gwanu gwatshavbo
gu mwalo guhodza.
Ambari khu guralo, enu kha mwa vbindrugedza
mu wuya avbo gwangu,
a ngu ganela Pfhumu Nungungulu.
7Gu diga isoso, nyi mi segede ndzadzi yi siwi,
na gu nga tshade migima miraru nya nango nya guvbwere.
Nyi yi wisa ga lidhoropa limwedo,
aholu ga limbe nyi si yi wisi.
Nyi yi wisa ga lithembwe limwedo,
aholu ga limbe yi nga ngamba mbawa,
ilo li di banga.
8Va di legalega va khuga khu ga madhoropa mavili mwendro madhoropa mararu,
va hongola ga limbe lidhoropa
gasi guya sela mati,
aholu kha va dzi kodza gu tshima lidora;
ambari khu guralo,
kha mwa vbindrugedzani mu wuya avbo gwangu,
a ngu ganela Pfhumu Nungungulu.
9Nyi vetide marembwe yanu nya mangi khu nilo ni gipupwane,
ni marembwe yanu nya miuvha,
miguhu ni miolivha yanu,
satshavbo si hodzidwe khu mbasa,
ambari khu guralo,
enu kha mwa vbindrugedza mu wuya avbo gwangu,
a ngu ganela Pfhumu Nungungulu.
10Nyi rumede tungu
nya gufanane ni uwo nyi nga rumela Vagipiti.
Nyi songa madzaha yanu khu litshari;
dzikavalu dzanu dzi di phangwa.
Nyi di tadza dzithonvuni gwanu
khu gu nunga nya sirumbi nya mabutho yanu;
ambari khu guralo,
kha mwa vbindrugedzani mu wuya avbo gwangu,
a ngu ganela Pfhumu Nungungulu.
11 # Wona gambe: Gen 19:24. Nyi mbembiside va nya gukari va vbakari gwanu,
kha nga idzo Nungungulu a nga mbembisago khidzo Sodhoma ni Ghomora,
aholu enu nyi mi vbulugisani kha nga khuni yi duswago niloni wu khondrago;
ambari khu guralo,
enu kha mwa vbindrugedzani mu wuya avbo gwangu,
a ngu ganela Pfhumu Nungungulu.
12Khu guralo, nyi nga na gu gu tsayisa, uwe Israyeli!
Kholu nyi na gu gira kharalo!
Olu uwe Israyeli dzi dongisele,
gasi u ta tshangana ni Nungungulu wago. 13Kholu khuye a wumbago sigomo,
a girago dziphuvbo,
a pwadzela muthu makungo ma guromo monyoni gwaye,
a vbindrugedza mihani gu khala gidema,
a gimbila khu malangani nya gukhugege ya mafuni;
Pfhumu, lina laye, khuye Nungungulu nya Tshivba Yatshavbo!
Currently Selected:
Amosi 4: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
