Guti 6
6
II. WUZUNDZO NYA GUTI
(Guti 6:1—9:18)
Vafumeli ni Wugengeli
(Mavingu 8:15-16; Varoma 13:1-7)
1Khu guralo, upwani, enu vafumeli, mu si pimani;
hevbulani enu mu fumago litigo latshavbo!
2Tulani dzindzeve, enu mu fumelago vbatshani nya sidzemo
ni gu dzi zundza khu wungi nya tengo nya vathu vanu!
3Kholu, wufumu mu wu hakhidego khu ga Pfhumu Nungungulu,
ni tshivba khu ga Uye a Khusegidego ngudzu;
uye a na khedzisa mithumo yanu,
gambe a na holelela mipimiso yanu!
4Kholu, na muri vathumegeli nya mufumo,
kha mwa fumela khu gululama,
kha mwa thavani nayo, gambe kha mwa landrisani gugola gwa Nungungulu.
5Uye a na dzi wonegisa gwanu khu magirelo nya guthise
mu ngamba ma lirela,
kholu avo va fumago va na lamudwa khu tshivba.
6Uye nya dugwane a na pwedwa wuhindzi a tsetseledwa,
aholu avo va gu na ni tshivba
va na tsayiswa nyamba tsetseledwa.
7Pfhumu Nungungulu muhevbudzi wa vatshavbo,
gima kha na thava muthu,
gambe kha na thedwa hwanga khu wugulu wa muthu,
kholu khuye a nga vanga vakhongolo ni vadugwana,
a wuya a sayisa vatshavbo idzosaye.
8Aholu va nya tshivba a na va lamula khu gugaradza.
9Magana yangu, nya gu ma ganela gwanu enu vafumeli,
gasi mu kodze gu hevbula guti, mu si thegi gighohoni.
10Vale va na vbanyago khu gu landra milayo yi agidego, va na tidwa kha nga vathu va agidego,
ni avo va na hevbulago milayo, va na kodza gu dzi vhikela gikhati va lamudwago.
11Khu guralo, ningani wuzundzo magana yangu gukhwatshi phera nya lisima,
ma vbweteni khu tshivba, ayo ma na mi hevbudza.
12Wenengedzo nya guti wu ngu phatima khu tshivba,
ni gumbura gwaye kha gu na tshimega,
avo va gu golago va ngu gu tugula nyamba garadzega,
ni avo va gu vbwetago va ngu gu mana.
13Guti gu ngu thanga mbeli,
gu phela khugo gu dzi wonegisa ga vale va gu vbwetago.
14Oyu a vindrugago wu si gu khugi wuronga a vbweta guti,
kha na nga garala,
kholu a na gu mana na gu khade vbamwanyatunu gwaye.
15Gupimisela guti, khugo gugengela nya lisine gu vbeledego.
Oyu a pilekelanago wutshigu watshavbo na gu pimisela guti, a na vbiredza gu tshulega musigaradzoni.
16Guti gu ngu gimbila gu vbweta vale va yedwago khugo,
mudzindzilani gu ngu dzi wonegisa khu wuwadi ga avo,
gu va khinga mipimisoni gwawe gwatshavbo.
17Kholu guphela nya guti khu gugola, khu lisine, gu hevbudzwa,
gasi guvbweta gu hevbudzwa khidzosaye ni gu gola guti.
18Aholu, guhaladza guti gu yingisa milayo yaye,
gambe, guyingisa milayo yaye
i tiyiso nya gumba khala gidambane.
19Gumba khala gidambane gu ngu hi hidzimisa ngudzu vbafuvbi ni Nungungulu.
20Kharati, gugola guti gu ngu gira muthu a khala mufumeli!
21Mwa gu khedzani ndronga ni gikhalo nya wufumu,
enu vafumeli nya mayigo,
ningani wuzundzo guti, mu na fumani kala gupindruga.
Solomoni na gu vbweta guti
22Eni nyi na mi embelani ginani guti,
ni gukheni khu gevbini gibuga gyaye,
kha nyi na nga mi sihela misihalo yaye.#6:22 Kha nyi na nga mi sihela misihalo yaye: avba Mulovi nya guage a gu dzi hambanisa ni vambe vahevbudzi nya guti nya wuthu, va sihago misihalo nya guti va fela gu yi tivisa basi ga valandreli vawe. Kharato nuwo wugengeli nya tumbunugo nya wukhozeli nya giwuthu ni wunyanga mwendro wungoma wa vale va vegedzago misihalo nya wusingalagadzi wawe gasi gu wu tivisa basi ga vale va hanidego ngoma yoyo. Guti gwa Nungungulu gwa gu tuledwa ga vathu vatshavbo vale va golago ni gukhodwa ga Nungungulu. Wona Mavingo 8:8.
Aholu nyi na mi funungulela dzindzila dzaye, gukhugela gutumbuluga gwaye ga gale ngudzu;
nyi na wonegisa guti gwaye,
gambe kha nyi na nga ndreya hwindzo ni lisine.
23Kha nyi na nga gimbila ni wule a dzi hodzedzelago khu lidiwo,
kholu lidiwo li ngu hambana ngudzu ni guti.
24Gidzemo gya vanyaguti guvbanyiswa nya litigo,
mufumeli nya guti a ngu ninga gukhadzisega vathu vaye.
25Khu guralo, dzi digeni mu hevbudzwa khu magana yangu,
khu ga ayo mu na mana gihevbulo nya gikhongolo.
Currently Selected:
Guti 6: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.