Guti 5
5
Gulamudwa nya guhegise
1Khavbo avbo, khu gutumba nya gukhongolo,
uye a lulamidego a na khuga a ema khovbeni ga vale va nga mu tshanisa
ni gu mu tseketsela gutshanisekani gwaye.
2Avbo va mu wonago, va nya guvivbedwa khu monyo
va na khunguvanyega, va thedwa hwanga nya guthise,
nya guvbindre ni tanga yawe;
gambe va na liwuga khu gu wona guvbanyiswa ga muthu nya gululame va ngamba gu virela.
3Va na dzi laya, va ganela khu gyawe,
na va gu dilela gugaradzegani nya hefemulo wawe, khavo:
4“Oyu khu wule gale hi nga mu hembulula,
Khuye oyu, khu wupumbu wathu, hi nga mu fenengedzago khu givalo!
Hi di pimisa gukhethu guvbanya gwaye guhandruga,
ni gufa gwaye khethu dzitshoni.
5Khu ginani uye a sayedwago vbakari nya sanana sa Nungungulu,
ni gu mana makategwa vbakari ga va nya guaga?
6Khu guralo, khethu hi ndreyidego ndzilani nya lisine;
wenengedzo nya guvbanyise kha wa phatima gwathu,
ni Lidambo kha la khuga vbatshani gwathu.
7Hi dzi nyenyeziside ndzilani nya guvivbe ni gumbemba,
hi legalegide siwulani nyambana ndzila,
hi hangidwe khu ndzila ya Pfhumu Nungungulu!
8Matshandza yathu ma hi phaside ginani,
dzithomba ni gu dzi gugumugisa gwathu si hi thumede ginani?
9Satshavbo soso si mwalalegide kha nga mutsa,
kha nga mapongowongo ma vbindrago khu guvbiredza,
10kha nga paketi wu pilago mavimbi ma khugegago,
nyamba tshiya hweha nya guvbindre gwaye,
mwendro lidawu nya lipulango laye mavimbini.
11Mwendro kha nga ginyoni gi vbuvbago vbatshani
nyamba tshiya giwonegiso nya guvbuvbe gwaye,
khu kharato, na gi gu ghubhuta phuvbo khu mambapi,
gi ngu yi tula khu tshivba nya guliginye gwaye,
gi gu pola ndzila khu gu khuthakhutha nya mambapi yaye,
nyamba tshiya hweha nya guvbindre gwagye.
12Mwendro kha nga giholoma gi khwandrwago gasi gu ya hekha gilo,
gi tula phuvbo, yi segega khu guvbiredza,
gu si tugudwi khu hayini gi vbindridego khavbo.
13Khidzo kharato, anethu,
nugunugu ha gu velegwa, hi dzegela gu mwalalega,
nyamba tshiya ni ndzati moyo basi nya mithumo yathu nya ndruda.
Hi midzidwe khu guvivba gwathu.”
14Khidzo kharato gitumbo gya muthu nya guvivbedwe khu monyo
gya gu fanana ni kudzudzwane wu vbuvbiswago khu phuvbo,
kha nga liguvi nya guvbevbuge li phalalegiswago khu gingulu,
kha nga wutshi wu hangalaswago khu liphuvbo nya gupepemele,
gya gu fanana gambe ni gualakanya pfhumba a vbindrago litshigu limwedo.
15Aholu va nya gululama va na vbanya kala gupindruga,
tshatshazelo yawe yomo ga Pfhumu Nungungulu,
ni Uye a Khusegidego Ngudzu a na va vhikela.
16 # Wona gambe: Dzind 119; Mav 4:9; 21:16; Isa 28:5; 1 Kor 9:25. Khu guralo, va na hakha mufumo nya wuzundzo,
ni gihugu nya guphatime khu mandzani ga Pfhumu Nungungulu;
khu nyamudye gwaye
a ngu va fenengedza ni gu va vhikela khu libogo laye.
17Gu dzi ningela gwaye gu na khala kha nga gitshangu,
a na somisa matshari sivangwa gasi gu tsayisa valala vaye.
18Gululama gwaye gu na khala gikete nya guvhikele khana,
ni wulamuli nya gutumbege wu na khala gihugu nya dzisimbi, nya guvhikele hungo.
19Guaga gu na khala kha nga gitshangu nyamba padwa.
20A na lodza likhulo laye li mu thumela kha nga litshari,
ni sivangwa satshavbo gumogo naye si na dwana ni va nya guvivbedwa khu monyo.
21Dzinyangafula dzi na pandra kha nga siholoma si rinyidwego gwadi,
dzi na duga khu mapfhini,
gu fanana ni wulaho wu ghwimbidwego gwadi gasi guya hekha avbo wu potiyedego.
22Kha nga siwindri si rinywago hwindzo khu tshivba,
siwindri nya gulemele si na thega kha nga ndzadzi vbatshani ga valala,
mati ya linene ma na vbenya ma va wugela,
ni mitsongo yi na va ndrindra nyamba va pwela.
23Phuvbo nya tshivba ngudzu,
yi na khuga yi va wugela, yi na va phalalegisa gu fanana ni gingulu.
Guvivba gu na vbindrugedza litigo latshavbo li khala giwula,
wumbasiwadi wu na thesela sikhalo sa va nya tshivba!
Currently Selected:
Guti 5: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.